شعر قصيدة الشاعر الشريف بركات الله يرحمه يوصي ابنه......

يالله ياللـي كـل الأمـات ترجيـك=يا واحدٍ مـا خـاب حـيٍ ترجـاك

يا رب عبد ما مشى في معاصيك=ولا يمشي إلا في محبتك ورضاك

يا مرقبٍ بالصبـح ظلّيـت اباديـك=مـا واحـدٍ قبلـي خبرتـه تعـلاك

وليت يا ذا الدهر ما اكثـر بلاويـك=الله يزودنـا السلامـه مـن أتـلاك

ياللي على العربان عمت شكاويك=وليت يا دهـر الخطـا ول مقـواك

واليـوم هالكانـون غـادٍ شبابيـك=تلعب به الأرياح مـن كـل شبـاك

يا مالك اسمع جابتي يوم أوصيـك=واعرف ترى يا بوك بآمرك وانهـاك

وصيـةٍ مـن والـدٍ طامـعٍ فيـك=تسبق على الساقه لسانـه لعليـاك

أوصيك بالتقوى عسـى الله يهديـك=لهـا وتدركهـا بتوفيـق مــولاك

احفظ دبشك اللي عن الناس مغنيـك=اللي إلى بان الخلـل فيـك يرفـاك

اجعل دروب المرجله مـن معاليـك=وادراج سيّسها على العـز مرقـاك

لا تنسدح عنها وتبغينـي أعطيـك=جميع ما يكفيـك مـا حاصـل ذاك

احذر امـر ليعـات أبيهـا لتاليـك=ايضا وترخص عندها قـدر مـأواك

أدّب ولدك إن كان تبغيـه يشفيـك=واستسعفه من بعـد مربـاه بـالآك

أما سمج واستسمجك عنـد شانيـك=ويفر من فعله صديقـك وشـرواك

وإلاّ بعد جهله تـرى هـو بياذيـك=ولو زعلـت أمـه لا تخليـه يـالاك

احذر تضيع كل من هو ذخر فيـك=معروفه لا تنساه واوفـه العرفـاك

ترى الصنايع بين الاجواد تشريـك=إلـى طمعـت بركزهـا لا تـعـداك

واوف الرجال حقوقها قبـل تعنيك=لا تعتمـد بالعفـو فالحـق يقفـاك

وهرج النميمة و القفا لا يجي فيـك=واياك عرض الغافل ايـاي وايـاك

تبدي حديث النـاس و فيـه تشكيـك=وتهيم عند الناس بالكذب واشـراك

واذا نويـت احـذر تعلـم بطاريـك=كم واحد تبغي به العـرف واغـواك

واحذر شماتة صاحب لك مصافيـك=والى جرا لك جـاريٍ قـلت لـولاك

لا تحسب إن الله قطـوعٍ يخليـك=ولا تفرح إن الله على الخلق بـداك

إن اشتهى حط الطمع فـي تواليـك=لو ما لقيته يا فتـى الجـود يلقـاك

والضيف قـدم لـه هلا حيـن يلفيـك=مما تنوشه يا فتـى الجـود يمنـاك

اكرم قبالـه فانهـا مـن شواديـك=وابذل له المجهـود مـا دام يعنـاك

احذر تلقي الضيف مقرن علابيـك=خله محـب لـك صديـق إذا جـاك

وأوصيك زلات الصديق إن عثا فيك=ما زال يغطاها الشعر فاحتمـل ذاك

راعه ولو ما شفـت انـه يراعيـك=عساك تكسر نيّتـه عـن معـاداك

لا تامنه فاطلـب مـن الله ينجيـك=ويكفيـك ربـك شـر ذولا وذولاك

شفني أنا يابـوك بآمـرك وانهيـك=عن التعرض بين الاثنيـن حـذراك

إذا حضرت طلابة مـع شرابيـك=اسع لهم بالصلح والـلاش يفـداك

ابذل لهـم بالطيـب ربـك ينجيـك=لا تجضع الميـزان مـع ذا ولا ذاك

أما الشهادة إدّهـا إن دعـوا فيـك=بيّن عمود الدين لا عميـت اريـاك

بالك تماشـي واحـد لـك يرديـك=طالع بني جنسـك وفكـر بممشـاك

رابع أصيل فـي زمانـك يشاكيـك= لى شاف خملاتك عن الناس غطاك

واحذرك عن طرد المجفـي حذاريـك=عليك بالمقبـل وخـل اللي تعـداك

ثم العـن الشيطـان ليـاه يغويـك=تـرى إن تبعتـه للشّرابيـك وداك

اوصيك لا تشكي علينـا بلاويـك=أنت السبب طرفك عيونـك بيمنـاك

واعرف ترى اللي قد وطا الخلق واطيك=ولا أنت أعز من الجماعة هـذولاك

المسك يا راسي عن الذل واخطيـك=واحذر تكلـم يـا لسانـي حـذاراك

والطف بجارك ثم قـم دون عانيـك=وافطن إلْما يعنيك عن ربعة أخـواك

يا ذيب وان جتك الغنم في مفاليـك=فاكمن إلى حيـث الرعايـا تّعـداك

من أولٍ يا ذيـب تفـرس بياديـك=واليوم جا ذيبٍ عن الفـرس عـداك

يا ذيب عاهدني وأعاهدك ما رميـك=ما رميك أنا يا ذيب لـو زان مرمـاك

والنفس خالف رايها قبـل ترميـك=ترى لها الشيطان يرمـي بـالادراك

ومن بعد ذا لا تصحب النذل يعديـك=وعن صحبة الأنذال حاشاك حاشـاك

ترى العشير النذل يخلـف طواريـك=وأنا أرجي إنك ما تجي دون آبـاك

والهقوة انك ما تجـي دون أهاليـك=ولا ذكر عود الورد يثمـر بتنبـاك

والحر مثلك يستحي يصحب الديـك=وان صاحبه عاعا معاعات الاديـاك

لا تستمع قول الطرف يـوم يلفيـك=بالكذب يقضي حاجته كل مـا جـاك

من نم لك نم بك ولا فيـه تشكيـك=والاَّه قــد أزرا رفـيـقـك وأزراك

عندك حكى فيني وعندي حكـى فيـك=وأصبحت كارهنـا وحنـا كرهنـاك

ما اخطاك ما صابك ولو كان راميك=واللي يصيبك لو تتقيت ما اخطـاك

مير استمع مني عسـى الله يهديـك=النصح يـا مالـك لـك الله مـولاك

عنـدي مظنـة مـا تمثلتهـا فيـك=واطلب لك التوفيق من عند مـولاك