حينما يسقط قناع الأنوثة عن وجه المرأة ==مالذي يظهر؟
الصورة:
للأنثى صاحبة القناع الاول :
مكان الحادثة احدى صالونات النساء الراقيه
سيدة جميلة الطلة ، أنيقة اللبس تنتظر دورها في الصالون بمنتهى الوقار والذرابه ،،
وصل دورها ... ولما خلصت وستانست من الكياج وكان شكلها " واو"
قررت ان تلبس عدسات !!
لبسة العدسة ودمعت العين وبالتالي نزل الكحل على الخد
اممممممم
هنا وبهذه اللحظة :
سقط ذالك القناع " الذرب " لتظهر من خلفه امرأة سليطة اللسان ،، و قحة المفردات ،،
زفت العاملات والخبيرة زف 7 سنين في 3 دقائق استخدمت فيها كل ماهو مشروع وغير مشروع من المفردات السوقيه
مع العلم بان الخطاء مؤ من المؤلفات ولا من خبيرة التجميل
الخطاء كان منها لبست العدسات بعد الميك اب يعني إدارة الصالون مالهم شغل
لكن ولانها لازالت في الصالون حست ان الخطاء منهم
طبعا :
تدخلت صاحبة الصالون و( تكرمي بنزبط لك إياه ) ...
زبطته لها على قولتها وطلعت من الصالون مخلفة وراءها مجموعة من النساء مابين زبائن و عاملات يقولون :
واااااااااااااااااي شهالاسلوب ؟ من وين يابت هالحجي ؟؟؟؟
اما العاملات كانوا متعودين على زبائن يحطون الحرة فيهم حتى وان كان الخطاء مؤ منهم
الصورة الثانية :
السيدة صاحبة القناع الثاني :
مكان الحادثة " احد مراكز التسوق العائليه "
طويله القامة ،، لبس محتشم ،، كانت قد اشترت سلعة منهم وقررت بعد (( شهرين )) انها تردها وان السلعة غير مناسبة لها ..
فتوجهت الى موظف خدمة الزبائن وطلبت منه أعاده القطعة او استبدالها باخرى
راجع الموظف الفاتورة واللي مكتوب فيها بشكل صريح الاستبدال خلال 3 ايام من تاريخ الشراء
قالها : مايصير أختي الفاتورة طاف عليها شهرين !!!!!!!
بعد عدة محاولات منها الا ان سياسة السوق كانت واضحة برفض الاستبدال ولاسترجاع للبضائع المباعة
هني سقط ذاك القناع ،،،
ليرتفع صوت هذه المحتشمة ،، وتبدء بوصله ردح محترمه حق الموظف اللي ما قالها شي غير اللي مكتوب بالفاتورة
للمحل مليان بالزبائن... مو مهم !!!
الناس تسمع صوتها العالي مغردا بعبارات سخيفة .... مؤ مهم !!!!
عدم احترام حق نفسها اولا وحق الموظف ثانيا وشرشحة لذاتها قبل ذات الموظف ( المقرود) ..... مو مهم !!!!
كل
هذة التصرفات لم تكن كافيه لها لذلك قررت الاتصال بوحده من جماعتها اللي وعلى ما يبدوا انها سألتها ليش مايبي يردها ؟
تدرون شنو ردت عليها بصووووووووت عاااااااااالي اخترق مسامع الجميع
قالت لها بالحرف : مارضى يردها .. إيه / الظاهر انه ما شتهاني !!!!!!!!!!!!
===>> لا تعليق !!!
الصورة الثالثة:
المكان من امام احد منازل المواطنين بإحدى المناطق المعروفة بهدوء سكانها نسبيا ...
تقول مصدرنا بهذا المشهد:
كنت بالحديقة انا وزوجي و خالتي نشرب جاي ،،، فجاءة سمعنا صوت مرآة تصيح ( من قمة راسها) : عطها الفلوس يا ك-- ب.
==>> كملوها انتم ...
ومن باب الشهامة والنخوه طلع ريلي يشوف سالفة المراة ،، جان يشوف سيارة مطعم تقف جدام بيت جيرانهم
وجارته تطل من الدردشة كاشفة لشعرها وهي اللي كانت تصيح على السائق ...
طبعا ريلي راح صوب السائق يسال شنو تبي ؟
قال له السائق: ولاشي يا استاذ الأخت كانت طالبه طلب وماكنش عندي خردة قلت للشغاله اروح أجيب خردة وارجع ثاني ولسه بركب السيارة لقيتها بتبص علي من فوق وبتشتم فيني !!!
طبعا طلع الجار بوكه : قال جم يبون منك؟؟
ولكم المفاجأة الثانيه : 450 فلس !!!!
الجار : بس !!!!!!!
السائق :نعم حسابهم 4،550 وعطوني 5 الباقي لهم / 450 فلس
الجار: طيب هاك هذا نص دينار عطه الخدامة ...
سائق المطعم : متشكر ياستاذ الحين أجيب لك الفلوس من المطعم ..
الجار : يا بن الحلال مسموح اشرب فيهم شي بارد ...
وانتهى الموقف ....
حرك السائق ورد الجار بيته .. بينما كانت لاتزال الجارة تطل من الدريشه تتابع باقي الاحداث يعني ماستحت من جارها ولا من السائق وهم رجال طلت عليهم بمنتهى الوقاحة ولم تنكسر لها عين ...
تكمل ناقلة الموقف لنا :
شسالفة ؟؟؟ منهي اللي تصيح !!!
الزوج : جارتنا تحاسب السائق على نص دينار لايبوقها ...
الخاله : وي ...وخزياه !! نص دينار وكل الصيحه انا على باللي داش عليهم حرامي .
الزوج : استغربت من حركتها طاله عليه سفور !! وانا اللي اعرفه انها محجبه أشوفها لما تروح الدوام ... الله يقوم بعون زوجها ..
الزوجة : الله يهديها ان شالله .
تقول رفيجتنا طاف اسبوع او اكثر على السالفة وشفتاها مرة بالجمعيه تدرون شنو قالت لي : ها المطعم رد حق ريلج فلوسه ،، الله يهديه شكو يدفع عنه جان مخليه مثل الك --- يروح ويرد الفلوس ..!!
===>> كان وااااااضح انها زعلانه ومنغثة من تصرف الجار
رفيجتنا: ريلي ماسوى هالشي الا على شان أنكم جيراننا وحنا حسبت اهل لا تشيلين في بالج .
تقول رفيجتي بس قلت لها هال جملة وما كملت كلامي
جان تقول :
إيه .،،،، أوكي ،، أوكي
وعطتني ظهرها ومشت .
حتى ماقالت مع السلامه او فمان الله ...
انا انقهرت ودقيت على ريلي قلت له : النص اللي دفعته عن جارتنا ترده !!!!
فهمت وقعدت اضحك
لما قالت له الموقف
رد عليها :يوبا هذي وحده ماتستحي حقريها خلاص لو مو زوجها الطيب جان ما تدخلت ..
==>> طبعا ادري ان اغلبكم قال : قطع شهالجاره ...
اما انا فأقول : الله لا يبلا كم بجذي جارة .
غريب امر بعض الحريم اللي ماتحشم نفسها او اهلها
يعني طاله من الدريشة مفرعه جدام اللي راييح واللي راد عشان تزفين سايق مقال الا " ماعنديش خردة "
يمكن ماعندوش صج وبيروح يخرد ويرد ليش إهانة الناس عند البعض تكون ابيزة !!
الله المستعان ..
اما اخر صورة فالبطله فيها فتاة مراهقة يعني بعمر 14 او 15 سنه
المكان : احد المنتزهات الترفيهية
محل مخصص لبيع الهدايا والتذكارات
لم احضر الموقف من بدايته لكن قدرت اتخيله
كانت البنت وافقه وبينها وبين البائع طاولة مليانه بالمعروضات فالظاهر انها كانت تبي تشتري ومن نظام نزل هذي ! وأشوف هذيج !
البنت: لا لا خلاص بس هذي تقدر تحفر عليها اسم ؟
البائع: هذي بالذات صعب ، اذا حابه خشب ولا زجاج ممكن أحفر عليها ..
البنت : حاول عفيا.
البائع: والله مئدرش ...
البنت بصيغة " طنازة" وهي طالعة من المحل : مئدرش والله ... جبح ويهه ،، هالويه البارد ..!!!
طبعا البائع : هز راسه وتوجه لنا بسؤال معتاد تفضلي اي خدمة ...
انتهى الموقف :
صايرة موضه عند البنات هالايام الوقاحة وقلة الحياء ،، طبعا بجانب المياعه بالحديث ومخارج الحروف الضاربة!!
اللي مادري منو اللي قاص عليهم وقايلهم هذا شرط الانوثه والجمال ان نقول حرف الضاد مثلا (د)
يعني ضاري يصير اسمه " داري"
==>> الله لايبلانا ولا يبلاكم ويصلح مخارج حروف بناتنا وحالهم ...
كل المواقف اعلاه نقطة في بحر من تصرفات نساء فصخن الحياء والتستر في الاماكن العامه
من فيكم شافت جذي مواقف بعد ؟؟
أتوقع الخوات المدرسات لهم سجل حافل مع هذا النوع من النساء ؟؟
بانتظاركم ...
http://m002.maktoob.com/alfrasha/ups...924/398867.gif
* ام يوسف*
* مطبخ الذواقة*
