احترام قبل الاعدام

صراحة مالقيت عنوان يليق الا هذا
.................................

يالمباحث بلغوا عني وزير الداخليه
استوا ياكاتب التقرير موتي مع حياتي

سجلوها واحفظوها عندكم بإسمي خطيه
مانفع غيري سكاته كيف ينفعني سكاتي؟

ولو هواجيسي توردني علا حوض المنيه
ماكتمت اللي بصدري لو تسبب في وفاتي

ياجعل دار الملوك تزلزل الصبح وعشيه
والمساء تدكها زرق النجوم السارياتي

لين تصبح روضة التنهات جرداً مهمهيه
يستوي عالي ثراها والجبال الراسياتي

اليا زل القول عن بيتين خلاق البريه
البيوت العامرات الباقيات الطاهراتي

كيف ترضون المهونه للشعوب اليعربيه؟
ترضخون لروس قومن بالسواد معمماتي

لين بشار استباح الدم والنفس الزكيه
واصبحت روس العروبه دون حده هايباتي

ينحر الرجال بالمنشار مافيكم حميه
ويدفن المسلم بقبره حي من قبل المماتي

واطيب اللي تفعلونه منع حفل جنادريه
فزعة ٍ للي عليهم القنابل هاوياتي

وسط درعا وفي حماه ووسط حي الخالديه
جوعوهم واحرموهم حتى من حلو المباتي

تحت همال الرصاص وتحت صفق المدفعيه
يذرفون الدمع مابه من فزع للنايحاتي

نرتجي من اليهود تحل بالكذب القضيه
والنفوس بغير عز الله تعيش مذللاتي

وتدفعون المال للمصري وأيادينا خليه
شعبكم ماله مساكن والفيافي مشبكاتي

ومن تكلم بالحقايق دونه شبوكن قويه
فالسجن يقضي حياته والقفول مقفلاتي

بين ضيم وبين هم يساير النفس الشقيه
جايع ٍ في جنة الدنيا وحوله جايعاتي

والوفي وسط البلد يجوع وماله مقدريه
والمنافق والحرامي فالوكور العالياتي

بعد اخو نوره وفيصل لانت عزومن قويه
ارتخا عزم الملوك اللي تدك النايفاتي

وكان جبت العيد قبلك يارمضان ويالضحيه
جعلني فدوة بلادي فالسنين المقبلاتي..
.................................................. ............

الشاعر زناد العتيبي