_
السلام عليكم و رحمة الله و بركاته
تكفون خواتي أبي مساعده منكم حيييييل حييييييل محتاجتها و اللي ما عندها خبره أبي منها دعوه بظهر غيب
بنات أنا حامل صارلي شهرين و حملي حمل متأخر ( التبويض صار عندي متأخر )
أول حملي قالولي كيس بدون جنين نطري أسبوعين
و بعد أسبوعين رحت لهم قالولي بيّن الجنين و عمره 6 أسابيع بس النبض ماكو نبض و نطري أسبوعين بعد
و قبل أمس رحت لهم قالولي الجنين عمره وقف على 6 أسابيع المفروض يكون عمره ألحين 8 أسابيع و النبض ماكو نبض بس انا شايف في مشكله بالرحم
ذبحني يا بنات بهالفحص
اذا سوالي سونار خارجي ما يبين الجنين بس كيس فاضي و اذا سوالي سونار داخلي بين الجنين
انجنيـــــت شنو هذا ؟؟؟
آخر شي قالي بحولج على دكتور سونار شاطر حيــــــــــل و السونار اللي عنده مطور و جديد و معرف إيش كلامه واجد
طلعت من عنده و رحت لـ مستشفى العرف و سوت لي سونار قالت الجنين عمره واقف على 6 أسابيع و ميت لازم تنظيفات اصلا هذا صارله شهر و نص و هو ميت
اقولها دكتوره انا حملي متأخر و ما بين الجنين اللي تو .. شلون صارله شهر و نص اذا كان كيس فاضي ماكو جنين وقتها و تقعد تخربط على راسي لا هذا ميت من شهر و نص لا تقعدين لازم تنظيفات و بأسرع وقت تسوينها .. يلا اسويلج دخول و تسوينها عندنا قلت لها لا مابي اسوي تنظيفات
قالت لي كيفج بس مو زين لج يلوث دمج و يسممه
مت يا بنات انهرت شنو هذا كل واحد يقولي كلام و بعدين !!
و توكلت على الله و قلت بشوف هذا دكتور السونار و بشوف شنو يقولي ؟
و رحت له أمس
والله يا بنات زين ما قمت و مسكته و سطرته من الحره اللي فيني
سوالي سونار
جان يقولي ما ينزل معاج شي
قلت لا
قالي كلش
قلت اول شهر و ما كان فيه جنين والدم كان خفيف و ماطول معاي
جان يضحك يقولي انتي تبين تطمنين روحج يعني خلاص خليني انا اعرف شغلي انتي بتعلميني شنو و الا شلون اشتغل
قلت له دكتور انت سألتني و انا جاوبتك
حيل حيل حيل عصبني و خالتي أم زوجي تقولي هدي خلينا نشوف شنو يقول !
حتى هي عصبت من كلامه شنو هالاسلوب ؟
آخر شي قام من كرسيه جان يقولي مثل ما كان دكتورج متوقع
اللي موجود عندي كيس حمل عمره 8 أسابيع
و فـــــــــــــــاضي مافي جنين انا ما اشوف اي شي يثبت ان فيه جنين
و لو يسألني دكتورج راح اقوله نفس الكلام .؟
والله يا بنات ما عطاني مجال اسأله فتح الباب و طلع
رحت لـ دكتوري جان يقولي خلاص هذا اجهاض منسي يعني بيطيح بيطيح لو شنو ما راح يستمر
قلت له دكتور انا ما ينزل علي شي و الوحام ذبحني شي فضيع انا اللي اعرفه اللي يموت جنينها ما تتوحم يوقف عندها
قالي لا عادي حتى لو سويت لج تنظيفات راح تحسين بالوحام يمكن لـ مدة اسبوعين
بس بما أن ما ينزل عليج شي انا بنطر أسبوع بس و تجيني الاحد لو ما تغير شي راح ادخلج و تنظيفات
تقوله خالتي ماعليها خطوره قال لا عادي لو انطرها 4 اسابيع ما فيه أي مشكله بما أن هي ما ينزل عليها شي
بنــــــــــــات شسوي ؟
مت احتريت انقهرت انجنيت
ياربي لك الحمد على كل حال لو كان حي او ميت
بس ليش يسوون فيني جذي اصدق منو و إلا اجذب منو !
كل واحد يقولي كلام أنزين أنا نفسيتي تعبت و الحمل بروحه تعب
قولولي كلام صح و إلا لا تقولون !
إما كل واحد يعطيني كلام عسى ما شر
مع العلم كذا مره اسوي تحليل هرموني و يطلع لي الحمل سليم
شوروا علي خواتي شسوي ؟؟؟؟؟؟؟؟؟؟
أدري طولت عليكم بس شسوي من حرت ما فيني
_
