ماء براس الجنين او استسقاء براس الجنين بالشهر الثالث

اغنام - ابل - دواجن - طيور

بسم الله الرحمن الرحيم
أسال الله ان لا يرينا وإياكم جميعاً أي مكروه
البدايه بذكررها عن التالي ( سالفة فائدة جهاز السونار – سالفة المتابعه للزوجه الحامل لدى طبيبة متابعة برنامج الحمل – سالفة الدكتور العنزي ماغيره اللي يدور في المنتديات عن اختراعه اللي سواه ومدى فائدته اللي يتناقلها العالم بالمنتديات – اخيراً اماكن والاطباء المختصين لمثل هذه الحاله )

ماء براس الجنين أو استسقاء برأس الجنين
فيه فرق يحصل واضح في اغلب الحالات
استسقاء الرأس (وجود الماء في اعلى الرأس يكون ضاغط على الدماغ للطفل ومع مرور الوقت لحين عمر خمسة اشهر يكبر حجم الرأس للجنين عن الحجم الطبيعي ففي هالحاله يكون التشخيص استسقاء او ماء برأس الجنين واغلب مثل هالحالات يصاحبها تشوهات خلقيه بالايدي والارض والخشم والعيون )
بعض الحالات يشتبه انها تكون استسقاء او ماء في راس الجنين وهي في الاساس ضمور في العقــل ونمو الرأس بشكل طبيعي (وعند التقدم بالعمر لعمر خمس اشهر يكون حجم الراس طبيعي في نموه ويلاحظ صغر حجم الدماغ فهذا لايكون استسقاء انما ضمور في عقل الجنين )
مصدر المعلومه الدكتوره /صفيه السلطان مستشفى الحرس الوطني بالرياض
أول سالفه لجهاز السونار وسالفة المتابعة لدى طبيبة متابعة برنامج الحمل
بدأت سالفة زوجتي الله يحفظها ام نايف ومتابعتها لبرنامج الحمل لدى الدكتور ماجده بمستوصف الملز الطبي
من البدايه كانت متابعه لدى الدكتوره وللاسف كان نظامها دائماً ينتقد من اغلب المراجعين والاكيد اغلبية الاخوان يعرفونها والاخوات اللي يراجعون عندها
بدأت زوجتي من الشهر الاول والشهر الثاني وكل جلسه (دفع فلوس على الفاضي ) وتكشف لنا بجهاز السونار والحاله قدامها كانت واضحه (مع جهلنا السابق للحاله ) وكان نظامها بس مشي مشي اللي بعدها على شان تكسب زباين أكثر من غير أي تدقيق في عملها (دليل ان عملها لايتصف بالامانه )
بداية الشهر الثالث في بدايته حضرنا لها كالعاده بس الحمد لله قررت أم نايف تسحب تقارير المراجعه بالشهرين الاولى وقالت لي نغير المستشفى لان حتى الدكتوره ماتعطي لها الوقت تسال عن أي شي في حملها قلت توكلنا على الله
مع العلم اننا نجهل حد الحين حالة الجنين وعلى انه سليم ومافيه شي
الشاهد غيرنا مستوصف آخر وبالكشف بجهاز السونار من قبل الدكتوره منال بمستوصف الطبي بحي الريان قالت لي الطفل في راسه ماء حاله تسمى (استسقاء برأس الجنين ) وهو ظهور ماء بالقسم العلوي من الرأس يكون ضاغط على الدماغ ويقلل من نموه
كلنا خير ان شاء الله طلعنا من عندها رحنا لطبيب متخصص في الاشعـه اللي بيعطينا تخصصه اللي هو متعلمه بمركز الشعاع الطبـي بطريق الملك عبدالله (تقاطع الملك عبدالله مع العليا باتجاه الشرق يجيك على اليمين )
وبالفعل ذكرنا لنا وأكد الحاله
وبعد هالتشخيص وين العلاج كل صار يقول الحبيب الحبيب (مستشفى الحبيب )
بعدها بديت اشوف والف الشبكه العنكبوتيه طلع لي اسم الدكتور عبدالرحمن العنزي اللي اكتشف جهاز لتصريف ماء الراس للجنين قبل الولاده (يعمل العمليه للجنين في بطن الام ) ويرجع يكمل حياته
ولفيت المنتديات وهات لك تكسير ومدح في هالدكتور
انا صراح بديت ادور النتائج لهالاختراع اللي سواه أو وين الحاله اللي سواها فيه وللأسف لم يتبين لي أي معلومه
حصلت له ايميل للتواصل راسلت الدكتور عبدالرحمن العنزي رد علي وقال العياده حقته في مجمع اسطون الطبي بالخبر يوم السبت والثلاثاء مع ضرورة الاتصال قبل الحضور (خصوصاً للناس اللي قاعده تكبكب عليه من مناطق المملكه واللي منهم انا )
الشاهد (تخصص هالدكتور ياجماعه لاحضوا (مخ واعصاب ) بالفعل رحت للخبر وقابلنا الدكتور ودفعت 200 ريال على الفاضي ، طبعاً تجربه اختراعه والكلام الفاضي هذا اللي بالمنتديات لما سالته قعد يضحك علي صراحه ولا جاوبني دليل عدم المصداقيه في نشر الخبر وسالته عن التجربه قال لي لايهمك الموضوع وصرفني
المهم ذكر لي وبافتخاار الرجال يقول لي يجوني كثيررررر من مناطق المملكه قلت بس والله يوم انه كفو بيني وبين نفسي
بس طلعت من عنده بكلمتين
الجنين بعمر 3 شهور انتظر لعمر ست شهور وتعال لي لانه مابيبين معي شي والحاله ماتخوف ومن هالكلام قلت في أمان الله وطلعت من بابه (عرفت ان الرجال ماحولك احد وطلعت )

رجعت للرياض وبعدها رحنا لمستشفى الملك فهد للحرس الوطني
عند الدكتوره / صفيه السلطان (موجوده بعيادة النساء ) تخصصها حسب علمي بتشوهات الاجنه وعلمها بالاجنه
وثبت الخلل بعد التحليل واخذ العينه ان الخلل في كروموسوم 13 وهو اللي يسبب هالشي ويكون مصاحب له تشوهات خلقيه
كذلك الدكتوره / خديجه القحطاني بمدينة الملك فهد الطبيه اللي بطريق خريص دخلت اوراقنا عليها لكن لم اكمل معهم للاسف
لمثل هذه الحالات الاغلبيه بعد الولاده فيهم من يتوفى ومنهم من يعيش الى سنه ونصف ويموت
وفيهم من يموت قبل الولاده كما حدث مع معنا وتوفاه الله البارح السبت بتاريخ 27/5/2012م
بعمر خمس شهور فتمت الصلاة على الجنين اليوم الاحد ودفنه بمقبرة النسيم كون نفخ فيه الروح بهالعمر
واسال الله ان يجعله شفيع لأمه وابوه وأن يبدله بدار خير من داره وأهل خير من أهله
الفائده ياخوان من موضوعي
اول شي : تعرفون فائده جهاز السونار وكشفه المبكر لأي حاله لاقدر الله خصوصاً مع طبيبات برامج الحمل اللي الناس تركض عليهم من السمعه واخر شي مايطلعون كفو للشغله بس يبي يلحقون اشغالهم ويتسببون في تاخر كشف الحاله لمثل الحاله اللي صارت معنا
ثاني شي : لمن والله لايقدر تجيه الحاله انصحه نصيحه لوجه الله لايروح يركض كم الف كيلو من محله على شان يروح الدكتور عبدالرحمن العنزي لان تخصصه (مخ واعصاب ) وليس له أي علم في استسقاء وذا السوالف وان حصل حول الحاله لقسم النساء والولاده وسحب يده
ثالث شي : لمثل هذه الحالات المستشفيات اللي يتابعونها قله لكن ذكرت لكم
اما مستشفى الحرس الوطني لدى الطبيبه / صفيه السلطان والي ماعنده المقدره يفتح ملف الله يعينه على الواسطه وان فشل
يراسلني وباذن الله بفيده وادخل اوراقه لمدينة الملك فهد الطبيــه (خصوصاً للناس اللي برا الرياض ) وضروري يكون فيه تقرير للحاله مكتوب بالعربي + كرت العائله صوره منه وماله الا ان شاء الله يجي على الموعد
واللي متخصص لمثل هالحالات أي طبيب تخصصه (علم الاجنه ) (واذا هو زائر للمنتدى يسجل بالمنتدى وبقدر اتواصل معه بخصوص اوراقه لو مايقدر )
اجابه لبعض الاسئله التي قد تسال لمن مرت الحاله عليه
- هالحمل هو الحمل الثاني ولدي طفل بعمر 9 شهور والحمد لله سليم وطيب ومافيه شي والله يحفظه لامه وابوه
- من طرف الام والاب لم تحدث الحاله وليست وراثه ابداً .
- الجنين بعد ولاده الله يرحمه اتضح لي كبر الرأس كما ذكرت لي الدكتوره صفيه + تشوه خلقي وهو عدم وجود الخشم (بدون أنف ) + تقارب العينين من بعضهما اكثر من اللازم + ظهور اصبع سادس في اصابع اليد اليسرى + تشوه واضح في اصابع اليد اليمنى بانعكافات غريبه

واخيراً اسال الله ان يرزقنا واياكم جميعاً الذريه الصالح ويجنبنا أي مكروه