طريقة عمل الزيوت الطبيعية العشبية فى المنزل بالصووور

السلام عليكم ورحمة الله وبركاته


انا انهرده جيبالكم طريقة عمل الزيوت الطبيعية فى البيت
طبعا كلنا عارفين الزيوت دى اهميتها وفايدتها كبيرة بالنسبة لكل وحده فينا بتدور على الجمال
سواء كان لبشرتها او شعرها او جسمها
وانا اخترت اكتب الموضوع ده هنا فالقسم ده بالذات عشان الزيوت معظمها بنستخدمها للشعر
واتمنى يكون فى كوبى للموضوع فى قسم البشرة وكمان قسم الاعشاب والطب البديل
عشان نفيد اكبر عدد ممكن ويكون موضوعى صدقة جارية ليا ومرجع للجميع


ندخل فالمفيد بقا
انا وحده من الناس بحب كل حاجه طبيعية واكون انا اللى عملاها بايدى طبعا ماعدا الحجات المستعصية
اما بالنسبة لموضوع الزيوت ده فانا لقيت ان فى كتير زيوت مبنلقهاش عند العطارين وممكن كمان تكون غالية
زى بظبط زيت الحبهان كده
فعملت بحث متكامل عن الطريقة من النت وقلت ليه بقا مجربش اعمل كل الزيوت وبأقل التكاليف
عملت كذا نوع من الزيوت وحابه اشارككم تجربتى
ومن الزيوت اللى عملتها
زيت الزنجبيل
زيت الحلبة
زيت الشطة
زيت الثوم
وطبعا ده على حسب احتياجتكم لزيوت معينة


يلا تعالو معايا نبدأ بالخطواااااااات
بس الاول
صلو على النبى ... عليه الصلاة والسلام


انا هشرح زيت الثوم وزيت الزنجبيل الاول لانهم زى بعض فى الطريقة
اول حاجه احنا محتاجين 100 مل زيت زيتون ((((او)))) زيت ذرة
وممكن تزودو عن 100 مل بس هتزودو طبعا فالعشب كمان اللى بتستخدموه
لو زيت الزيتون موجود اوووك لو لاه يبقى زيت ذرة عادى


اول حاجه زيت الزنجبيل
بنجيب الزنجبيل حوالى 2متوسطين الحجم او وحده كبيرة بنقشرهم وده شكله
http://files2.fatakat.com/2012/5/13371087928150.jpg


هنقشر القشرة ونقطعه حلقات زى كده


http://files2.fatakat.com/2012/5/13371088549081.jpg


ونحطه ينشف الميه اللى فيه لمدة 10 ساعات وبعدها
نقطعه عشان نعرف نحطه فى الزيت بالشكل ده وممكن تقطعوه مكعبات اصغر
لو البرطمان صغير


http://files2.fatakat.com/2012/5/13371091913775.jpg


وبعدين بنجيب مقدار معلقتين صغيرين زنجبيل ناشف مطحون


http://files2.fatakat.com/2012/5/13371095056851.jpg


بنجيب ال 100 مل زيت الزيتون او زيت الذرة ونخلط فيهم الزنجبيل البودرة والزنجبيل الاخضر
ونحطهم فى طاسه على النار بس بشرط النار تكون خفيفة جدا يعنى توطى على الاخر
وتفضلى تقلبى بالمعلقة لحد ما تحسى ان الزيت بدأ يغلى تقومى طافيه عليه
طبعا خلى بالك من النار عشان ممكن تحرق الزنجبيل وبدل ميكون زيت زنجبيل
يبقى زيت عرق سووس
وده شكله بعد ما خلطت المكونات وحطيته عالنار


http://files2.fatakat.com/2012/5/13371097657574.jpg


وهنا بعد ما صبيته فالبرطمان بعد ما برد وشرط مهم جدا
يكون كل برطمانات الزيووووت زجاااااااااااااااااج انا قلت اهو


http://files2.fatakat.com/2012/5/13371098998047.jpg



نيجى بقا لزيت الثوم
طبعا فوايد الثوم للشعر رهيبة وكلنا عارفين
هنجيب طبعا 100 مل بردو زيت زيتون او زيت ذرة
ونجيب راسين ثوم حلوين كده
هنفصفصهم ونقطعهم ونسيبهم بردو فى حدود 10 ساعات
عشان الميه اللى جواه تنشف لان لو حطينا الزيت والعشب كان فيه ميه
بيبوظ الزيت والخلطة


http://files2.fatakat.com/2012/5/13371108506838.jpg


ولو عندكم بردو ثوم بودرة حطو معلقتين صغيرين على الزيت ونفس خطوات زيت الزنجبيل
يتحط على نار هادية مع التقليب المستمر


نيجى بقا لزيت الحلبة


الحلبة معروف فوايدها كمان للشعر وتنعيمه
هنجيب مقدار معلقتين كبار حلبة حصا
و 100 مل زيت زيتون او ذرة


http://files2.fatakat.com/2012/5/13371111261319.jpg


هنحطها فى المطحنة تتطحن لحد ما تبقا بودرة
وهنجيب مصفه او منخل عشان ننزل الحلبة المطحونة
وده شكلها بعد ما اطحنت


http://files2.fatakat.com/2012/5/13371112413498.jpg


هنجيب مقدار الزيت ونحط بردو الحلبة فيه
على نار هادئة مع التقليب المستمر
وده شكلهم بعد ما حطيتهم عالنار
http://files2.fatakat.com/2012/5/13371113764065.jpg


نيجى لزيت الشطة بقا
طبعا بردو هنجيب شطة حمرا بودرة
و 100 مل زيت زيتون او زيت ذرة
وبنفس الخطوات السابقة
http://files2.fatakat.com/2012/5/13371117289443.jpg


بعد ده كله بقا مش هينفع نستخدمهم علطول احنا هنحطهم
فى مكان معتدل الحرارة وياريت ميكنش فى نور
انا عموما حطيتهم فى فرن البوتجاز
ولمدة اسبوع يوميا تطلعى الزيوت تقلبيها وتسخنيها على نار هادئة
لحد ما توصل درجة الغليان بس طبعا زى ما قلت مع التقليب
عشان المكونات متتحرقش وتكونى موطيه النار
وبعد مرور الاسبوع تصفى الزيوت بشاش من الاعشاب كويس
عشان الزيت ميتعكرش وتبدأى تستخدميه
ولو عاوزاه مركز بزيادة بعد اسبوع بتجيبى نفس الاعشاب
لكل نوع زيت عوزاه وتنقعيها فى الزيت من جديد
وتخليها عندك اسبوع تانى وهكذا
انا كده خلصت بس لسه مخلصتش عمايل كل الزيوت اللى محتجاها
ان شاء الله انزلكم قريب ازاى تعملو الزيوت بتاعت النباتات الخضراء
زى
زيت الجرجير
زيت البقدونس
علشاااااااان شعوركم تلعلع وتدلع اكتر


يارب اكون قدرت افيدكم بشىء
متنسوش التقييم لو عجبكم موضوعى
وادعولى ربنا يجعل قبرى روضة من رياض الجنة


وده شكل الزيوت بعد ما خلصت وحطيتهم فى برطمانات زجاااااااج
http://files2.fatakat.com/2012/5/13371121777665.jpg



ودى صور مقربة عشان تشوفو شكلهم اكتر


http://files2.fatakat.com/2012/5/13371125457700.jpg



http://files2.fatakat.com/2012/5/13371126081993.jpg


السلام عليكم ورحمة الله وبركاته لامانه م ن ق ول:krkrkr: