ســوالــيــف ... قبل النوم وبعده

فيه كذا شغله براسي حبيت نتشارك معكم فيها .. أتمنى تعجبكم وهي من هنا ومن هناك.

في البداية قلوبنا معكم يا أهلنا في سوريا صارت اللقمة غصة وصارت الضحكة بالحسرة .. خذلناكم وتخلينا عنكم .. لكن ولا يهمكم ما دامكم تقولون
( يا الله يا الله مالنا غيرك يا الله ) ومن توكل على الله فهو حسبة .



سالفة مستشفى عرقة .. تؤكد لي أن كثير من شبابنا سطحي وما عنده سالفة .. من حقك تدخل مستشفى يعتبر عار بتاريخ وزارة الصحة واصبح مهمل لكن مو من حقك تزعج الناس والسكان .. ما كفاكم التفحيط .


شاب مقبل على الزواج وراتبه على قد حاله ويشكي ويبكي من أن عينه بصيرة ويده قصيرة ولما جا وقت العرس راح يجب له شوية شعراء وكم شاب يشكله صفين ويدفع لهم على الأقل حول 60 ألف ريال .. يا أخي أذا ما أنت قد الزواج من أصله ليش تكلف على نفسك زيادة وتهايط .


وبنت حلال عرسها قرب كل شوي وهي جالسة مع ( خبيرة في شؤون الرجال ) وخذ نصايح واستفسارات وكلها تدور حول : ( لا تعطينه وجه لا تخلينه يسيطر عليك لا تعطينه كل ما عندك ... ) هذي وصايا قائد جيش لجنوده مو وحده بتتزوج .. هل الزواج اصبح صراع أو مودة ورحمة .


شاب ما يذاكر ومهمل اختباراته .. تقول له ليش ما تذاكر ؟ يرد ويقول : واذا نجحت وين بروح يعني !؟ بتوظف مثلاً !؟ ... طيب يا أخي هل تعلم الغيب .. يمكن ربك يفرجها لما تتخرج وتتوفر الوظايف .. خذ شهادة بيدك أحسن لا تتحسر بعدين وتعظ أصابع الندم .


شاب متبطح بملحقهم بالفنيلة والسروال بيده اليمين ريموت الدش وباليسار لي الشيشة وخذ حش : الشعب الفلاني ما عنده سالفة الشعب العلاني عندهم بلاوي وناس كذا وبشر كذا .. وخذ حش وسب وشتم ومو عاجبه أحد .. وآخر شي يقول : آآآآخ لو الأمر بيدي .. أخس يا ريتشرد قلب الأسد .


عزيزتي يا أم .... قلب أبيض يا وردة بيضاء عطرة تفوح عبقاً يأسر القلوب أنتي ما عندك سالفة غير الشنط والجزم وغريب الدار .. ما تملين ما تطفشين من هالسوالف اليومية السرمدية الأبدية .




السلام عليكم