شئ غريب...حقائق...! خسرنا ياسر فهل نخسر المنقور!

لن أقول الأغلبيه...ولن أستطيع أن أحدد نسبه ولكن كثرة المواضيع الغير هادفه والتي في غير محلها ولا أوقاتها...غريبهّ!!!
هو أحد أمرين من وجهة نظري:
1/ العضو عاطفي ولايعرف ينتقد وسم ماشئت...!
2/ مندس

بجي واحد مطفي النور ويقول أيام قرتس وأيام قرتس كنا نمدح شغل الإداره.... أكيد ماراح يكون في نقد... ومع ذلك في أخطاء أيام قرتس....

عموما يوم طاح الجمل كثرة سكاكينه....اللي صاير في الهلال مايسر بس هذي فرصه للمندسين لزرع الفتنه بكتابة مواضيع تشتت الإداره ولاتجعلها تعمل بالشكل الصحيح، طبعا المواضيع ليست وليدة اليوم ولكن كلما تعرض الهلال لهزه كلما رأينا هذه المواضيع وأحينا نراها بشكل مستمر. والعاطفي ياأما ينجرف ورا هالمواضيع أو هو في الأصل من حبه يبي يطلع اللي في قلبه أو اللي يراه مناسب وبس مهما صار.

طبعا ممكن تكون وسيلة الضغط تجعل الإداره تعمل ولكنها تربكها في نفس الوقت، انظرو إلى إدارة الشباب ماذا عملو ورشة عمل وخطه خمسيه لماذا لأن جمهور قليل ويعملون بصمت
جمهور الهلال (ليسو الأغلبيه) => مندس+ عاطفي => ضغط
وأنت أيها المحب الهلالي يوم إنك تنتقد وتطالب برحيل الإداره، منب سائلك...هل تحضر المباريات وتدعم الفريق ولاجيد في الحتسي...! اعذرني من حقك انك تنتقد ولكن ياخي اصبر إلى نهاية الموسم وخن نشوف وش اللي صاير وبالنسبه للرئاسه، إذا في مرشحين للرئاسه بنشوف منهم وشنهم من لحيه ولكل حادث حديث.....

هروب اللاعبين

ياسر القحطاني صحيح واجه ضغط من الاعلام ومن الجماهير الأخرى، ولكن أيضا للأسف الإداره لم تقف معه....
وااااااااااااسفاااااااااا ااه نحن الأهم أيضا لم نقف معه إذا بدع صفقنا له وإذا أخفق الفريق حملناه المسئوليه وهو مسيكين ماله دخل أحيانا. السبب قد يكون واحد محب ولكنه عاطفي خانته كتاباته في بعض الأمور أو مندس. طيب ليه كذا بس نبي ننتقد ياسر طفش، من حيني لانيب من مشجعين اللاعبين ولكن والله قهر ياسر يبدع في الإمارات،
وعندنا إذا جاب هدف قلنا ياسر 2007 وياسر 2007 ونبي 2007، ياجماعه اللي يصير غريب يعني حرام ياسر يبدع هناك في سنه ولا ويصاب ويرجع ويحسم الدوري لهم. إذا رجع حياه الله وإذا مارجع الله يوفقه هو مرتاح هناك وش يجيبه عند هالضغوطات. صحيح كلن صار ضده طيب حنا ماسألنا أنفسنا هالسؤال ليش مانظمنا حمله تدعم ياسر وماتوقف بدع ولا مابدع في النهايه هو بشر بس آآآه راحت هم نظمو حمله ضده وحنا....!! إذا راح ياسر مانبي نجم يروح!

الرؤساء والمقارنه

كل رئيس وله سلبياته وإيجابياته وغالبيتهم بما فيهم الرئيس الحالي إيجابياته تطغو على سلبياته، يعني أهدا من كذا لو الأمير جمع إيجابيات مثلا بند بن محمد و غيره من الرؤساء كان وش صار، خفو على الرجال والموسم قرب مع أني أعترف بأخطائه الكبيره بالذات هالموسم وعادي بشر ويخطي جاب لنا بطولات ولاقصر وهالسنه جاب بطوله، ولا تبونه سوبرمان مثلا امركم غريب تدققون وتقارنون في كلش وفي التفاصيل...


الدعم

لنغير طريقة تفكيرنا في تشجيع فريقنا، الحين احمدو ربكم واشكروه 53 بطوله والزعيم من يطوله.
صحيح نطمح للأفضل والتطور، ولكن يعني تبون مافي أخطاء ولا وش تبون بالضبط، كل فريق يخطي...
اللي يقول موسم للنسيان واللي يقول موسم فاشل... صحيح الموسم لم يكن ناجح ولكن الزعيم خلاك تفرفش وتغني وتبتهج وتنبسط وتتفاخر ملايين المرات وإذا جا هالموسم وصار في لخبطه شوي خلاص نهاية العالم، إذا إنت تشتغل ترا باقي الأنديه تشتغل....

الدعم ثم الدعم ثم الدعم حاليا وبالأخص مباراة الموت الغرافه، وإذا أردت أن تنتقد انتقد ولكن ارجوك فكر ثم فكر قبل ان تنتقد وليكن هذا منهجك إذا استطعت. أرجو من الجماهير الهلاليه في جميع مناطق المملكه أن تنظم حمله منظمه لدعم الهلال دائما وأبدا، فالهلال محارب ونبون الإداره تسوي كل شئ... طيب وش دورنا حنا بس ننتقد!!!!!!!!!!!!!!!!!!!!!! لازم ندعم الهلال دائما وأبدا في السراء والضراء، لاأقصد باالإستنقاص من الأنديه الأخرى، فاستنقاصهم نقص من قيمتهم، أقصد فقط بدعم القريق،أجل فهموني إذا ماأفهم وش دور الجمهور الأساسي في سبيل تحقيق الإنتصارات... وتأتي المرحله الثانيه النقد بس اللي صاير مع البعض طرد وسم ماشئت وليس نقد!

الحملات المنظمه
الحملات المنظمه ضد اللاعبين وضد الإداريين وضد أحيانا الجماهير في فترات سابقه لماذا؟ لأجل سقوط الهلال... ولكن هيهات هيهات فليكن دورنا نحن سندعم الفريق الكيان الهلال بغض النظر في أخطاء ول لا... ألسنا نشجع الهلال ألسنا نحب الهلال ألسنا نفرح إذا انتصر ونحزن إذا خسر فعلاقتنا علاقة عشق ويجب أن يصل هذا العشق الإيجابي للاعبين لكل الهلاليين، فأنا هلالي ولست بندر بن محمد أو عبد الرحمن بن مساعد، فأنا هلالي ولست سامي الجابر أو ياسر القحطاني، أنا هلالي لأني هلالي باختصار.. فنحن فريق القرن وفريق العقد وزعيم آسيا ونحن جن الملاعب خسرنا ياسر فهل نخسر المنقور، لندعم من يخدم نادينا ونشجعهم سواءا لاعبين أو إداريين و ليكن هذا ديدنا، لاننتظر رد إداره أو إعلامي الرد يكون بالملعب عبر زئير يرعب كل الحساد والخصوم ويجعلهم يحسبون ألف حساب...

لذا أتمنى من تركي الهديب من تنسيق مع الرابطه لترديد اسم الناقور واذا استطاعو عمل اهزوجه مرعبه تحفظ حقه ولا تتستهزئ بالآخرين فيستاهل فهذا أقل شئ نقدمه، وأتمنى من الجمهور الأول في الخليج العربي أن يدعم الهلال بكل ماأوتي من قوه في مباراة الغرافة القادمه.

تقبلو ودي