باب ماجاء في التميلح , واللوحه ام 230.000 والكثير من الفضائح بالداخل
أكيد انكم لاحظتم بالفترة الاخيرة , كثر الاعلانات عن لوحات للتنازل , بصراحة الاسعار خيالية , لكن اللي لاحظته ان اللوحة اذا صارت تنتهي ب "666" يصير سعرها اغلى من اي ارقام متشابهه غير "666" , طبعاً فاهين , ان 666 = ستات = بنات .ومن قبل ماتصير على اللوحات رسوم , والستات هي المطلوبة دائما , ويبيلك واسطة قوية بالمرور عشان تطلع ستات .
المهم من الفراغ اللي طاقني ذا الايام قعدت اتفكر بمستوى التفكير عند شبابنا "نيوتن مهوب ازين مني يوم يتفكر بالجاذبيه " واستغربت حرصهم الزايد على التميلح على البنات , يعني لوحة "أ ح ب 666 " (دعاية مدفوعة ) تخيلو كم وصل سعرها ؟ , وصل 230.000 ريال , لوحة , قطعة حديده , ب 230.000 , الله لايسخط علينا , لا وابشركم سوم مابعد باع يمكن تجيب زود .
تخيلوا معي لوحة "ا ح ب 555 , او 444 كم تسوى , أجزم انها ماتاصل 15.000 , الفكرة هنا بالستات .
عز الله لو اشتري لوحه ب 230.000 ماركبتها الا على "بوينج " و 777 ام تلفزيون بعد , ولا وشي السيارة اللي تستاهل اركب عليها لوحة ب 230.000.
انا عارف انه من طبيعة البشر محاولة لفت الانتباة , ومحاولة الشباب للتميلح على البنات شي طبيعي الى حد ما , لكن ياصل لدرجة السفه , والسخافة , لما يصير كل همي في الدنيا بنات , وكل تصرفاتي , عشان ألفت انتباه البنات , فأعتقد انه شخص يعاني من مشكله فعليه ..
واحد شرا سيارة ب 365.000 طلعها من الوكالة مباشرة لورشة عشان يصبغها , وردي لماع ,يوم قالو له يا ابو فلان , حرام عليك سيارة جديده وشاريه بذيك القيمة , وتغير بوية الوكالة , قال وبكل ثقة , الحين اكسر رقاب البنات من كثر مايتلفتون على سيارتي .
وهذا واحد من الشباب , أقل وصف له انه رخمة , ويخاف يركب الدباب في صغره , لما كنا نروح للثمامة منول , ونستأجر دبابات , كان يعيي يركب اي دباب , حتى لو ذاك الصغير اللي لفته ب 5 ريال يقول اخاف اطيح . وكبر الولد وطاح بالبنات طيحة قشرا , ولاحظ ان حقين الدباب عند كل اشارة يرقمون , وان البنات يقطون معهم , ويروح ويتسلف عشان يشتري دباب , ويقعد يتعلم عليه , ويبدا ويروح ويجي ويرقم والولد مبسوط , بس توه يعتبر مبتداء بالدبابات , ويجي مره يلحق سيارة فيها بنات , ومسرع , ويلف ويخش بالرصيف , ولاجاه شي بس انكسر حوضه , ورجله
وواحد من الشباب وجهه فكوك , والا يبي بنات , ووضعه المادي اقل من متوسط , ويقعد يجمع لين شرا "دب " ب 850 ريال "المشكله ماسدد فاتوره جواله عشان يشتري ذا الدب , ويركبه جمبه ويربط له الحزام , وانواع التميلح كل يوم الله يصلحة "ياشين عنز البدو لين طاحت بمريس " عاد يقول انه كد خير ورا ذا الدب .
وعلى مستوى المنتديات , نشوف شباب يردون على مواضيع بنات , ويطيرونهن للسماء "وهو ماقرا الموضوع اصلا " والموضوع اصلا اقل مايقال عنه انه سخيف , غير الرسايل الخاصة اللي تروح للبنات والترحيبات .وحدة بالمسينجر تقولي , جتني رسالة من واحد يقول انا ماسجلت بالمنتدى الا يوم قريت مواضيعك , تقول ومن باب اللقافه , دخلت على ملفة الشخصي , ولقيته مسجل قبلي ب 4 شهور .
وبمنتدى ثاني , واحد ارسل رسالة لكل بنات المنتدى وبنفس الصيغه , وكشفته وحده مسجلة بيوزرين , وجتها رسالتين ولما سألت كم بنت بالمنتدى اكدو لها , نفس الرسالة , المشكله يقول بالرساله اني ما ادخل المنتدى الا عشان اشوف مشاركاتك .
ـــــــــــــــــــــــــ ـــــــــــــــــــــــــ
انا ما أعمم على الشباب كلهم , لكنها ظاهرة ملاحظه خصوصاً بالرياض , شي محبط لما يصير مستوى فئة مهيب قليلة كذا , والمفروض اننا نتوقع منهم دور في خدمة المجتمع والدولة .
مافية شك ان أول واهم الاسباب هي ضعف الوازع الديني , ويجي بعدها الكبت والفراغ وسوء التربية , كلها اسباب تؤدي لنتائج مثل كذا
** لا احد يزعل من الاخوة المتميلحين , تراها نصيحة لله في لله
يعطيكم العافيه جميعا
-------------------------------------------
طبعا وكما هي عادتي |4|
الموضوع ملطوش بس اعجبني مره وقلت مابدهاش ننقله لغرابيل |4|
تقبلوا فائق تحياتي
ابو نوال
