هو بقى راس .. يطيح فيها الفاس !!

للاسف الاداره فشلت بجميع المقاييس ومن بداية الموسم والكل يقولها شغلك غلط وتقول اصبروا لنهاية الموسم !!

يعني بنهاية الموسم ايش ممكن يصير بكل بساطه بيطلع طويل العمر ويقول انا بتحمل المسئوليه مثله مثل رئيس الاتحاد السعودي ونقوله لا طال عمرك ماصار شي
وخلاص ينتهي الموضوع ..

لكن بعد ايش بعد ان شهد النادي سقطه قويه في مسيرته وموسم متخبط لم يمر عليه حسب علمي في تاريخه ..

اللي بيعترض على كلامي يوريني ايش قدمت الاداره للنادي على مستوى الصفقات المحليه خصوصا واننا نشتكي من عدة مراكز ..

ياناس جارنا النصر على سبيل المثال ادارته استقطبت في مركز الظهير الايمن والايسر 6 لاعبين محليين واستفاد منها الفريق ونحن نكابر ونقول عندنا افضل اظهره !!!

الاداره دفعت مبلغ كبير جدا في عقد العربي حتى ان البلجيكي جريتس استغرب ولكنهم رفضوا اي تدخل ولما جا الدور على لاعبين النادي طلعت الاداره بفكره سقف لعقود اللاعبين !! كيف احتراف وكيف تحطون سقف وصرنا مضحكه بسبب هالمقترح وانعكس على اللاعبين المحليين وهم يشوفون كيف الاداره تبخسهم حقهم ..

الاداره من بعد ماجاملت جريتس على حساب النادي وسمحت له يتعاقد مع المغرب وهو مازال مرتبط بعقد مع الهلال وجلست 8 اشهر تنفي هالشي ومع هذا ماجهزت مدرب غيره !!
ومن بعده في فتره موسم ونصف فقط تدرون كم مدرب مسك الهلال ؟
خمسة مدربين في موسم ونصف !!!
عمرها ماصارت في تاريخ الهلال .. كالدي وبعده سامي وبعده دول وبعده بونان واخيرا هاسيك وفيه احتماليه يصيرون 6 الله اعلم ..

المدربين صايرين كنهم خدامات نجيبهم على عماها ونجلس نغير فيهم .

بسبب الاداره خسرنا ياسر القحطاني وانخفض مستواه بسبب الهجوم والضغط من اطراف خارج النادي والاداره وقفت تتفرج بكل شفافيه وشفن كيف الامارات من اول مباره حصلت اساءه للقناص كيف وقفوها ومنعوها وارتحا ياسر وابدع واكيد بيعمل الف حساب قبل يرجع .

ونفس الشي رادوي تمت مضايقته بشكل كبير حتى في دينه ومع هذا محد وقف معاه ورغم ان ديننا يحترم الاديان حتى النظام الاساسي في الاتحاد السعودي يعتبر محايد في الاديان واللاعب طفش وراح ..

المصيبه الاداره طلعت وتقول سمحنا لسامي يروح للدورة التدريبيه اللي بيستفيد النادي منها ومع هذا وقفنا مستحقاته !!! يعني ماجيتوا تتشطرون الا على سامي وجريتس عادي يروح محد قاله شي ونفس الاداره اعترفت ان سامي دفع للنادي مبلغ مليونين ريال في فتره كان الرئيس منشغل عن النادي ..

اداره متناقضه ومتخبطه ..

هالموسم طلعوا بحجه تغيير جلد الفريق ومع هذا نشوف الغنام اساسي والقرني احتياط وشفنا تخبطات الغنام كيف ومستواه المنخفض ومعروف ان الغنام من بعد اصابته الشهيره يخاف من اي احتكاك .. الغنام لعبه عالواقف ولا يقدر يواجهه لاعب الا بالبركه تمشي معاه الكوره ..

المشكله فيه ناس تقول ماخسرنا الا ثلاث مباريات !!
في المقابل تعادلت في مباريات كثيره في وقت كان التعادل كالخساره مثل مباراه الرائد في الدوري او الاتفاق او المباريات الاسيويه ..

حتى صفقه الشهراني اعتقد لولا هبوط القادسيه ومحاولة ادارتهم تحريك النادي ماقدرنا نحسم الصفقه اللي لهم سنه فيها واخر شي اعاره !!

واخر شي الاداره تبتعد وتكتفي بالتغريدات في وقت كنا ننتظر وقفات ورفع للمعنويات وتجديد الثقه في اللاعبين على المستوى الاعلامي لاسكات الكثير من المتربصين ..
ومثل مانقول ان اي شي سلبي بيأثر على اللاعبين طيب وين الامور الايجابيه !

الله يستر علينا في مباراه الاياب وباقي مباراه الغرافه وكلنا شفنا الغرافه كيف يرتفع مستواه وتاهل لنهائي الكاس في قطر

اخيرا انتهى الموسم وبنشوف ايش وصفهم لهالموسم الغريب !!
وهل بيكون هناك امتداد لهذا العمل !!