" يــ لحون العود" لشاعر/ سلطان بن وسام

اغنام - ابل - دواجن - طيور

يالحـون الـعـود والا يامجـاريـر الربـابـه
إختلف معنـى القصيـد وضيّـع الفنّـان فنّـه
حلم مدري علم مدري نوض برقٍ فـي سحابـه
أثرهـا طلّـة جبينـه يـوم زاح الليـل منّـه
أقبلت مثل الفرس لا سمعـت طبـول الحرابـه
مقتفيهـا ليـلٍ أســود والنـجـوم يفرقـنّـه
النهـار يمـر ويعـدّي وليلـه فـي عقـابـه
النحـر صبـحٍ تجلّـى والجدايـل كنّهـنّـه ..
مخمـلٍ يلتـفّ فـوق الجيـد الأتلـع بالنيابـه
عن سلاسيل الذهب والمـاس خـوف يجرّحنّـه
غاب عنّي والولـه خـلاّه عنـدي فـي غيابـه
مادرى أن فرقاه نار !! ولا درى أن لاماه جنّه !!
ياوجودي وجد من صفّق على ماضـي شبابـه
بـان شيبـه والسنيـن اللـي يبيهـن خالفنّـه
غرّته خضر السنين وراح عمـره مـادرى بـه
غرّرنّـه وارفعنّـه لـيـن ســجّ وحولـنّـه
وياوجـودي وجـد عـودٍ لا عيـال ولا قرابـه
ماجـداه إلا يـونّ ويـردف الـونّـه بـونّـه
مالقـى فزعـة رفيـق ولا دعـاةٍ مستجـابـه
كلّ ماامسـى لـه بظـنٍ خيّبـت الايـام ظنّـه
هذا وجدي في غيـاب اللـي نـزح والله جابـه
صح فرض الله فـرض وسنّـة الرسـول سنّـه
الغلا جسمٍ رقيـق ومرهـف إحساسـي ثيابـه
مثل غصن الـورد يـوم أن الهبايـب يطرقنّـه
مازرعـت إلا غـلاه ولا نقـلـت إلا صـوابـه
والحشا ماضاق من خضر الطعـون المستكنّـه
ياحبيبـي مازهـا كـفّ الخضـاب إلا خضابـه
فيـه نظـم المفـردات وفيـه للعشّـاق عنّـه
الظبـي مالـه شبيـه وبينـك وبينـه تشابـه
إلتفت بشويش وألقى فيـه منـك وفيـك منّـه
خالقك من فضّل محمـد علـى كـل الصحابـه
وسخّرك مثل المهـار اللـي تسخّرهـا الأعنّـه
والثنا والشكـر للـي رحمتـه تسبـق عذابـه
لا لخلـق الله شـكـر ولا لخـلـق الله مـنّـه
قالـه اللـي ماخـذا ممـا يريـد إلا هبـابـه
خيرة الفـارس ثنيّـة خيـل صفـراً مستعنّـه