الامومه..كنز و باب من ابواب الجنه .. هل انتي قدها؟
السلام عليكم ورحمة الله وبركاته
قريت موضوع من عضوه من العضوات
تقول فيه الله يهديها و يصلح حالها
انها لمن تعصب تكسر الاثاث على راسها
وانها اذا تناجرت مع زوجها ووصلت لمرحله من مراحل الحاله النفسيه السيئه طقت بطنها و طقته وطقته طبعا لأنها حامل تبي تطلع الحره في بطنها و باللي في بطنها
وبعد ما يرجع الوضع طبيعي و ترتاح نفسيتها تتندم و تروح تسوي سونار تتطمن عالجنين ووضعه و حالته الصحيه
رديت عليها بانفعال
و قلت كلام يمكن عضوات وايد استنكرووووه مني
و قعدو يلوموني على كلامي
لكن تدرون ليش انفعلت
تضايقت
حسيت بالألم
لأنها ما تدري شنو نعمة الحمل السليم
ماتدري شنو يعني لمن اثنين الله يرزقهم بضنى يشيل اسمهم
و يحبهم
ويحبونه
يربونه على طاعة الله سبحانه و حب نبيه و الصحابه و آل البيت
ماتدري و لا راح تدري
و في من امثال هالمره وايد
وايد حريم قاطين عيالهم عالخدم
وايد تعامل عيالها بعنف
وايد تطقهم و تحرمهم و تعقدهم
ليش !
لأنها ما جربت انها تنحرم من هالنعمه و النعمه زواله
ما جربت يقولون لها ترا الجنين مات في بطنج:eh_s(2):
ماجربت اشلون تشيل جنين ميت في رحمها و خايفه عليه و اهو اصلا ميت خلاص نقطه عالسطر
انتهى الحلم
انتهى
الامومه شي عظيم
مو تجهيز لإستقبال ولاده
مو برستيج بان تلبس ولدها ماركات و تحطله سستر و خادمه
مو اكسسوار لابد منه في حياتها
نعمه
احساس
مسؤوليه
عمري ما شفت او سمعت عن ام تتعرض لحاله من الضغط من زوجها او من ظروفها و تطق ضناها او تعرضه للأذى
عمري ما سمعت او شفت ام تتناجر مع زوجها و تروح تطلع الحره بعيالها لأنهم منه
عمري ما حسبت الامومه ضغطت زر ابيه احمل ما ابيه اطق بطني عشان اعاقب ابوه
تقتلين جنين في بطنج عشان تنتقمين من الابوووو!!
امهات ازواجهم سكيريين
مدمنين
مريضين نفسيا
شايب ما يدري عن عياله من اكثر من مره
فقير ما يقدر يوكل عياله
مريض مقعد ما يقدر يكد على عياله
مجرمين بالسجون
ميتين متوفين مالهم وجود في الدنيا
يطلع من تربية الام و صبرها و تحملها و قوتها
رجال ينشد الظهر فيهم
بنات تفتخر الام فيهم
الام اهي اللي تتحمل
اهي اللي تزرع القوه بعيالها
اهي اللي تحمي الطفل
اهي اللي تسهر
تحاتي
تبجي اذا تأذى ولدها لو شوكه تقول ياليتها بقلبي ولا فيك
اللي مو قد الامومه
لا تظلم طفل في هذا العالم
ذنبه الوحيد انه ولد لأم موأهل لشرف الامومه
الله يرزقكم بالأطفال الأصحاء المعافين كاملين الخلقه و الأخلاق
والله يرزق كل محرومه و محروم من الضنى
ويفرح قلبكم
ملاحظه :
الشهاده اللي تعتزين فيها
هي شهادة تربيتج لضناج
شهادة الناس باسلوبج و تعاملج معاه
شهادة تخرجه
تفوقه
تميزه
مو شهادة ردودج اللبقه و مشاركاتج مع العضوات
احلى شي بالموضوع انج انتي عرفتي غلطتج و طلبتي حذف الموضوع
وهذا اذا دل على شي يدل على انج ندمانه ومفتشله و مالج ويه يظل موضوعج جدام الناس
اذا كل هالاهتمام بزوجج و مناسباته و عيد ميلاده و اهله و مع كل هذا مشاكل و انتي ماصارلج 8 شهور
اتوقع انج تحتاجين لإعادة برمجة حياتج
تعرفين وين نقاط الخلل
و لا تنسين ان العين حق
داري امورج بالكتمان احسن
ترا الناس ما تعطي خير
و لا تنسين تدعين بالثلث الاخير من الليل
:eh_s(7)::eh_s(8):
