السلام عليكم ورحمة الله وبركاته
*الحمدلله الذي اطعمني هذا الطعام ورزقنيه من غير حول مني ولا قوة*
صباح ومساء الورد والتفاؤل..صباح ومساء الخير والامل
عسى ايامكم خير وسعاده ان شاء الله.
حبيبااتي..سويت قبل يومين هالطبخه..طرا على بالي مكوناتها وسويتها..وكيفوا عليها بالبيت والدليل انهم من باجر طلبوهااا..هههههه
تغيير..والتغيير مطلوب خصوصا بطرق العيش
نبتدي باسم الله
نغسل الدجاجه وننقعها بشوية ليمون وننثر عليها طحين..نخليها فيهم لمدة ربع ساعه يسحبون اي زفره..وعقب نغسلها ونقصها لقطع صغيره.
نحطها بجدر على النار مع اضافه ماي يغطيها وبهارات صحيحه(هيل، كزبره، كمون، دارسين، مسمار),
نطبخها حوالي 30 دقيقه على النار..وعقب نشيلها على جنب..مع الاحتفاظ بماي السلق لانه راح نحتاج بعدين.
نقلي بطاط مقطع مكعبات نفس حجم الي بالصوره بزيت غزير..واذا ابتدا يتحمر..نشيله على جنب.
بمقلاة نضيف كميه مناسبه من الزيت ونحمس حوالي بصلتين كبار مقصصين ناعم..واذا ابتدوا يتشوقرون نضيف حوالي 3 فصوص ثوم ووزنجبيل مدقوق عليهم ..ونحمس.
نضيف قطع الدجاج الي سلقناها للحمسه..ونحرك نخلي البصل يغلف الدجاج، ونحمس تقريبا خمس دقايق
ووراها نضيف مكعبات البطاط المقليه..وتديرين بالج وانتي تحمسين لا ينهرس معاج البطاط.
نضيف ملعقة اكل بهارات مشكله+ ربع ملعقة اكل كركم+ نص ملعقة اكل كزبره مطحونه+ نص ملعقة اكل كمون مطحون+ نص ملعقة فلفل اسود+ رشة هيل ناعم+ مكعب ماجي ..والي ماتحب المكعب مو لازم..
نحمس..نخلي الدجاج والبطاط ياخذون نكهة البهارات
عقب نضيف مقدار استكانه ونص كريما سائله..انا حطيت كريمة المراعي..وبعد كريمة كي دي دي تعطي نفس الطعم والنتيجه..ولج الاختيار.
نحرك بخفه..نخلي المكونات تتشرب الكريمه
وعقب نضيف قلاصين من ماي سلق الدجاج الي احتفظنا فيه( المعيار قلاص الجبن الكبير ).
بس انا ضفت قلاصين ونص..عيالي يبون المرقه خفيفه..
بس انتم حطوا قلاصين كافي..
ونخليها على نار هاديه حيل..تستوي على راحتها لمدة نص ساعه.
والي تحس ان المرقه خفيفه..تقدر تذوب ملعقة اكل نشا بماي بارد وتضيفهم على المرقه تعطيها قوام ثخين.
(طريقة العيش المشخول..الي يشتهيه قلبج)
تنقعين عيشج عقب ماتغسلينه عدل عن الشوائب بماي دافي لمدة ساعه..وتسلقينه بماي حار مع ملح حسب رغبتج.
واذا استوى ثلاث ارباع استوا تشخلينه عن الماي
وديري بالج لا تطبخين العيش حيل وينهرس معاج عقب..
بجدر..نحط زيت ونحمس حلقات بصل عالخفيف مع اضافة ربع ملعقة كركم ونص ملعقة بهارات مشكله ورشة فلفل اسود.
نضيف طبقه مناسبه من العيش على البصل ..ونساويها بالملاس( الملعقه الكبيره)
ونرش على الوجه نص كوب ماي منقع فيه نص ملعقه من صبغ العيش..ضروريه هالشغله علشان بالنهايه يطلع معاج عيش حباته ملونه ..بين بيضا وصفرا وبرتقاليه..
ونرجع نحط طبقه من العيش بيضا فوق العيش ..ونكرر الي سويناه..نضيف صبغ العيش الي ذوبناه بالماي على وجه العيش
وننثر على الوجه على جنب نص شدة بقدونس..او كزبره..حسب اختيارج وذوقج
و نسكر الجدر ونغمته بالقصدير او قطعة قماش او فوطه نظيفه.
ونخليه لمدة نص ساعه على نار هاديه يستوي بالبخار الحار.
وتفضلوا عزيزاتي
*عيش ناطع مع مرقة الدجاج بنكهة الكريمه*
هني قلبت الجدر بصينيه..علشان انجب..احب يكون العيش جدامي ترس الصينيه وانا انجب
وهذا جدر المرقه بنكهة الكريمه مع البطاط نزلناه عن الجوله..ريحته خنينه..
العيش بصورته النهائيه..وفوقه البصل المحمش
وصفيت قطع الدجاج والبطاط عليه
ونثرت البقدونس المخلوط مع العيش..
الي كان على وجه الجدر..على الدجاج والعيش.
حبيبااتي الغاليات..رجاءن بكمل الموضوع لو تكرمتو لحد يرد
