شعر لي قصةٍ عنها اكثر الناس يدرون

لي قصةٍ عنها اكثر الناس يدرون

= مع عالمٍ لا قابلوني تكهربت



ناسٍ اليا مروا مع السوق يمشون

= اضيع ما اعرف الثلاثاء من السبت



ياللي نسيتوا مالكم حق تنسون

= يعني نسيتوني لاأني تغيبت



أغيب وكل الناس مثلي يغيبون

= كم بالقرى ناسٍ لهم ناس بالخبت



صديت واهل الحب عاده يصدون

= لو الغلا بقلوبهم نابتٍ نبت



يخشون ناسٍ يرقصون ويدقون

= هذا جرى يمكن وهذا جرى ثبت



وانا ولو صديت ما زلت مرهون

= وش عاد لو في بعض الاوقات جنبت



أعيش في جوٍ (ن) من البعد محزون

= من يوم عن ديرة حبيبي تغرّبْت



اللي تلوموني كفى لا تلومون

= ولا تضيق خطركم لو اني تعذبت



يمكن بهالتعذيب راضي وممنون

= والا على طول الزمن قد تدربت



وانا ادري ان الناس مثلي يحبون

= لكن ما تعبوا مثل ما تتعبت



اظن ما محدٍ حب مثلي بهالكون

= ولو قص واحد قصتي كان كذبت



شيٍ يخلي كامل العقل مجنون

= ما كنت اصدق بالهوى لين جربت



هذا الخبر والحال من دون في دون

= وانا خلاص من النهاية تقربت

(الشاعر ابن نحيت حجاب)