@@ (( قصة من قصص دواهي البادية وصعاليكها تموت ضحك اللحق ماتلحق )) @@
اغنام - ابل - دواجن - طيور
السلام عليكم ورحمة الله وبركاته ،،،
الله يمسيكم بالخير والمسرة جميع ،،،
الحقيقة انا الليلة ابيكم تسمرون ويا الوناسة وفلة الحجاج والفكاهه لاسيما وانها في ايطار المباحات ،،،
عااااااد انا قلت بلاش من الوجد والحن والاهات نغير الليلة بهالقصة الضريفة والمضحكة هالله هالله جاكم العلم !!!
نبداء بسم الله ،،،
طبعاً العنوان يكفي عن المقدمة ونبداء بسرد القصة ،،،
القصة هذي حصلت على اثنين من اهل البادية وكانوا متخاوين على النهب والسرقة مثل غيرهم في ذاك الوقت الشين
المهم كانوا رغم اللي هم فيه ويسوونه الا انهم يمتازون بالفكاهه والطرفه ما يسحر الالباب ومواقفهم واجد وموجودة
وستطرح تباعاً بعون الله والليلة اخترت لكم هالموقف الطريف اللي حصل بينهم في آخر حياتهم ،،،
في يوم من الايام مروا اثنينهم على عرب قاطنين باول الصيف على قلبان مشهورة وجلسوا يناظرون من طرّاف البيوت
ويخططون على سرقتها ويوم اضلم الليل بداء تنفيذ العملية وكان واحد منهم فيه لقافة ومعه شلم ( شجع )على كل شي
يشوفه مايقنع الله يدفع البلا وخوية اركد منه حيل وكلهم دواهي ،،،
المهم دخلوا يم البيوت ودوروا البيت المنصى يعني البيت اللي يرودونه الناس عشان البيت اللي هاللون اكيد انه انه بيت عز
وجاه وثراء وهم مايبون الا مثل هالبيوت وجلسوا في راس الطعس لين غطلس الليل وهجعت الناس وقاموا يسحبون رجليهم
وهم حذرين بالحييييييييييل لين دخلوا البيت اللي يبون ولقيوا صرة من الجنيهات الذهب مليانه خذوها وجوك ظاهرين من البيت
قام خوينا الملقوف ومسك يد صاحبه وقال اصبر اصبر العيبه العيبه !!!!
قال له خويه يارجل امش مالك بطوالها كب اللقافة عان الدراهم اترك العيبة واللي فيها ؟؟؟
قال الملقوف :لاوالله الا بجيك ابها ماولله فيها من اللي يقعد الراس !!!
طبعاً العيبه وجمعها (( عياب )) هي نوع من انواع السلال قديماً تصنع من الجلد الفاخر او سعف النخل ويوضع بها القهوة
والتمر والمضير (( الإقط )) وبعض مايخص رجل البيت من الثمينات وعادةً ماتعلق بوسط البيت لأهميتها ،،،
المهم خوينا ابو لقفه راح صوب العيبه ويوم جاء حدرها وتناولها بيده ماعاد باقي الا انه يقفي بها ،،
ما التفت الا وخشم البلجيك(( نوع من انواع البنادق واشهرها )) على علباه والشر يفوح ريحه من خشمها الله يدفع البلا ،،،
وقال له راع البيت وط العيبة ياعايب وقام ودار كتافه على عامود البيت وشب الضو وقال للقهوجي دق النجر وازعج
الصوت والتموا الرياجيل ووجيه القبيلة (( وطاحت الصخرة على الصفصاف )) مثل ماقالوا هههههههاي ،،،
المهم خويه سمع الصوت وشاف الضو وعرف ان ابو لقفة طاح ولازم يطلعه من هالورطة قام وخبا الجنيهات وجا مسوي نفسه
عابر سبيل حداه عليهم قل السلاح وكثرة السباع الضارية عشان ماينكرون جيته المهم جاهم وجلس والربع ماهي داخله مزاجهم
انه عابر سبيل وشاكين فيه بس ماهنا دليل والجنيهات لهالحين ما احد درى عن سرقتها المهم جلس يفكر كيف ينقذ خوية من
هالورطة وقام يناظر بوجيه الربع ولا والله الشوفة اللي ماتسر كل وجيههم شر والسيوف مهندات والبنادق معمرات ويدين خويه
في العمود مربطات وهيهات وهيهات تجي الليله سلامات (( ناشبه في الصفا )) ههههههههههههاي ،،،
عاد هو يوم عرف انه مافيه امل بالخلاص قام يفكر كيف يرمز لخويه انه مايقدر يساعده وان اللي هو فيه ماله سبب غير لقفته
بس بدون ما احد يحس فيهم عشان الربع ما غير يناظرون فيه اكلوه بعيونهم يحترونه يرثع باي كلمة ويربطونه وزان خويه ،،،
المهم قام ورمى هالكليمات على خويه يتعذر منه بشماته لأنه ماطاعه يوم نهاه عن العيبة وطرقتها ،،،
وقال :
(( اشياء في الصحف قد كتبت ،،، ويدين في ماخذت نشبت ))
ناظروا فيه ودهم يربطونه مير الشيخ قام وقال صدقت ياضيف الرحمن اشهد بالله انك حكيم وماقلت الا الصدق ،،،
ويوم سمع الملقوف هالكلام عرف انه ورط وان خويه بيخليه مافيها كلام وانه شمتان عليه لأنه ماسمع كلامه وكب
العيبة مثل ماطلب منه ،،،
ويوم عرف ان الدعوة هاللون قال لازم اورطه معي واربطه في العمود اللي وزاني وقام وقال ياشيخ لو تسمح لي لاهنت
ابي اقول كلام قبل تذبحوني !!!! هههههاي مسوي حليل اخينا ؟؟؟؟
قاموا عليه الربع (( اقطع واخس يالحرامي ،،، ماتعقب احسن لك ،،، ولك وجه تهرج هااااه اقطع بس اقطع ))
وقام الشيخ وقال لالالا خلوه يالربع خلوه يحكي ونشوف وش عنده الحنشل 0
هاااه عاد خوية يوم سمع هاللون عرف ان فيها طبخة ملعونة
والدين ونكبة مثل نكبة حزيران حاول يصرفها ماقدر ههههه0
تنحنح الملقوف وقال هالكليمات اللي نكبت عفش خويه
وجرته للتهلكه (( ياشين النذالة شيناه )) ههههههههههههاي
المهم قال ابو لقفه :
(( صدوف واقدار ماتخلف مواقيتها ،،، اما انها جتك والا انك برجليك جيتها ))
هاااااه يوم سمعوا الربع هالكلام قطعوا الشك باليقين وعرفوا انه خويه مليون في المية واطرحوه واربطوه جنب خويه ،،،
واعترفوا بسرقة الذهب ،،، رااااااااااااااااااااااح فيها هالله هالله والف سلامة تسلمكم جميع ،،،
وجيتكم هالحين وهم مربوطين في عامود واحد يالله دخيلك من النكبات هههههههههههههههاي
والقصة من حديث المجالس وتبادل سير دواهي البادية وصعاليكها ليست في الكتب ولا في العم قوقل ،،،
تحياتي لكم جميعاً
(( ابو هليبه ))
