اخواتي المسؤلين عن الفعاليات بالصناعيه عندي تعقيب

السلام عليكم اخواتي جميعا ..
بعد حضوري لكم فعاليه اقيمت بالجبيل الصناعيه ..كان في خاطري اوصل كلمه او تعقيب للمنظمات والتاجرات والمسؤلات .. واتمنى الجميع ياخذ رايي بحسن نيه وغرضي انو اطرح نقد بناء ولا اجامل احد كوني شخص خارج الدائره وحضرت حالي حال اي زائره اخرى ..

طبعا انا حضرت بزارين العام احدهم بقاعه الفرقد التابعه لفندق كران والاخر في منتزه الشراع .. وبعض الفعاليات الاخرى

راح احاول اسرد كلامي على مجموعه نقاط واجزاء فقط حتى يكون كلامي واضح

1- (بنسبه للاعلانات ) احنا من قبلنا نطمح جدا لاي فعاليه تقام بالصناعيه كون مجتمعنا مغلق وهادئ .. لكن السييء في الموضوع انو مافي استعداد قبل البزار او اي فعاليه لازم قبلها اقله 3 اسابيع دعايه واعلان !! يعني لو كل بزار يصير تواصل مع الزوار الي حضروا من خلال الايميل لان الي حضروا مره بيحضرون مرتين باذن الله .. عشان نتفادى فكره ان التاجرات يخسرون والزبائن في بيوتهم مايدرون.. يعني ارجوا ان تاخذ مصلحه الجميع في عين الاعتبار يفترض انو الي يسعى لهذا التنظيم يحط في باله انه يكون سمعه لنفسه قبل اي اعتبار اخر!!

2- النقطه الثانيه في بزار قاعه الفرقد انا اشهد امام الله انهم ارسلوا رساله بجوالي لذلك ظنيت انو المهرجان على مستوى كبير ! .. وكنت وقتها حامل خليت زوجي يوديني اكتشفت انو القاعه جدا صغيره و مزدحمه لدرجه من اول لفه حسيت اكتفيت لانو البضاعه كانت مش زي ماتصورت .. ومن احراجي لااقول لزوجي يجي ياخذني وهو توه موصلني الله يجزاه الخير .. قلت ادور كرسي واحد اجلس عليه ماحصلت !! وانا ماحصلت كرسي لان عدد الكراسي كانت قليله من سبق لبق !! صراحه كانت تجربه سيئه لي بهذا البزار مع احترامي للعاملات هناك .

3- الشي الثالث خلينا نكون صريحين ولا حابه اعمم ياجماعه (الكولتي ) حقت البضاعه .. انا معاكم ان الواحد وده يسترزقك دام الرزق حلال .. بس ليه البزار ما ينطلق من مفهوم التميز والاستثنائيه .. ليه احصل ثلاثه ارباع الطاولات شباصات فسفوريه و اكسسورات النوع الرخيص الي احصله باسواق الرخيصه .. واذا دورنا شغل يد حصلت تاج عليه شريطتين يعني وصلنا للابداع الحقيقي !!
مابي ازعلكم والله ولا استهين بحد لكن ياليت ياليت يكون في نظره جديده للبزار النسائي .

4- النقطه الرابعه (نفسيه التاجره) بينها وبين الزبونه او تعاملهم مع بعض .. والله ان اذكر ببزار الشراع في ناس كانت تشتغل بهمه لكن احس انو في عدم احترام بين بعض التاجرات لدرجه تضايق المتسوقه ..وايضا تعامل البعض مع المتسوقه تلقينها رافعه الخشم مادري كيف تكسب زباينها !!


5- النقطه الرابعه (العمليه في التعامل مع الزبونه) ..يعني والله صراحه بعضهم كان ينشب لعرض بضائعه لدرجه اذكر وحده قمت انحاش منها بالاخير وتلحقني !! .. والمسكينه تقولي الحين شسوي ببضاعتي مابي اخسر !مالقيت مفر الا انو اقولها باخذ لفه وارجع لك عشان اهرب هههههه وقالت لي ادري انك بتهربين !! بصراحه المفروض مايوصل التعامل مع الزائره لهذي الدرجه من المضايقه وارجع لنقطه الاولى واقول لو في اعلان على مستوى ماكان صارو بعض البائعات كذا ولا اعمم

6- ياليت الي يدخلون في تنظيم هالفعاليات يكون عندهم خبر قبل لاتكون القضيه حجز طاولات وبس .. ياليت يكون عندها جدول يتضمن تحضير للاعلان و كذلك علم بالبضاعه الي بتستضيفها على طاولتها لان اكثر شي القاه معروض هو الشباصات وجلابيات الخفيفه الي نحصلها 15 ريال بسوق .. نبي بضاعه نفخر في شراءها لاهنتوا .. اشوف واجد مصممات وفنانات وبائعات في بعض منتديات الجبيل وهنا باسواق سيتي .. ياليت لما تتنظم بزارات نشوف بضاعتكم على ارض الواقع ..





وشكراااااااا لكل الي اطلع على نقدي .. جزيتم خير وانتظر منكم كل جديد .. الي حاب يعطي مداخله حياكم جميل انو نفيد ونستفيد ..