السلام عليكم ورحمة الله وبركاته
* الحمدلله الذي اطعمني هذا الطعام ورزقنيه من غير حول مني ولا قوة *
ياهلاا بخواتي الغاليات..اشلونكم.. يعل يطيب لونكم..
ما اطول عليكم..جربوا هالدجاجه المشويه بالفرن مع حمسة الكوسا والبصل المتكرمل.. فعلاا لذيذه ..
سووها غدا ولا عشا.. اكله صحيه ومقاديرها متوفره ..
وعلى فكره ترا الكوسا تعتبر من الخضار الخفيفه والي تنهضم بسرعه في المعده..ماتغث.
ما اقول الااا...هني وعافيه عليكم..ان شاء الله.
اول شي نغسل الدجاجه وانظفها عدل..وننقعها في عصير ليمونه وملعقة خل ابيض وملعقتين طحين لمدة ربع ساعه ..علشان تروح اي زفره ممكن تكون فيها.. وعقب نرد نغسلها وندهنها بالخلطه الي راح اذكرها لكم ...
مقادير الخلطه أو التتبيله:
اول شي اذكر اهم مكون بالخلطه والاساسي لها علشان يعطيج الطعم الحلوو المميز
الزعتر..مو زعتر السندويتشات والفطاير..لا الزعتر الي نستخدمه بشاي الزعتر والي ما يعرفه راح تشوفون صورته مع مكونات التتبيله.
نص ملعقة اكل بهارات مشكله( استخدم بهارات القوطي الاخضر الي مرسوم عليه سفينه).
ملعقة أكل فلفل اسود
نص ملعقة اكل كركم
نص ملعقة اكل كزبره مطحونه
ملعقة متوسطه كمون مطحون
ملعقة اكل سماق
3 ملاعق اكل زيت زيتون
4 ملاعق ماي
ملح وكميته حسب ذوقج
نخلط المكونات عدل مع بعض
ندهن الدجاجه من داخل وبره ..ونخليها مو اقل من ساعه تتشرب الخلطه
وعقب نحطها بصينية فرن ..وندخلها الفرن عقب مانسكرها عدل بالقصدير
وعقب 45 دقيقه نشيل القصدير ونحمر الوجه علشان يتحمش..تقريبا نخليها ربع ساعه او 20
وانتي تراقبينها ليما توصل للتحمير والتحمش المطلوب.
حمسة الكوسا
نقصص بصلتين كبار واذا حبيتي تزيدين ما في مشكله
ونحمسهم بزيت زيتون ليما يذبلون..وعقب نضيف حوالي فصين ثوم مقصصينهم شرايح ضعيفه..ونحرك
عقب نضيف حوالي اربع حبات كوسا حجم متوسط مقصصينهم مكعبات او نص دائره
ونحمس..نخلي البصل يتمازج مع الكوسا..واهم شي تحمسين بخفة..لان الكوسا حساسه..فلا تهرسينها بالقفشه ...ونضيف ربع ملعقة بهارات مشكله وربع ملعقة فلفل اسود وربع ملعقة كركم وربع ملعقة كزبره مطحونه ..ونحرك
ونحمس على نار متوسطه.. ونضيف ربع شدة كزبره مع الاستمرار بالتقليب..والي ماتحب الكزبره تقدر تضيف بقدونس او اشبنت.. وكل الي ذكرتهم يعطون طعم ولوون محبب للحمسه.
وعقب حوالي عشر دقايق..نضيف نص قلاص ماي على الحمسه..واخفف النار حيل..واخليها تستوي على راحتها..وعقب تجيكين على الحمسه ..لا شفتي الكوسا استوت ..تسكرين الجوله وبالنسبه لي..ما احب الكوسا تكون مطبوخه حيل ..احبها تحتفظ بقوامها..
وسويت فتوش لذيذ مع هالغداا..وطريقته
طماط
خيار
خس
فجل احمر
بصل اخضر
اوراق نعناع صحيحه
واوراق زعتر صحيحه
والكميه حسب ذوقج..تقدرين تزيدين وتنقصين باي مكون من الي انذكروا..
اقصهم بحجم متوسط نوعا ما..ما احب الفتوش يكون مقصص صغار
احب حجمه مثل مطاعم لبنان..فتوشهم يهبل..وحجم مكوناته وسط
نخلط المكونات ونضيف عليهم الدريسنج الي هو عباره عن:
عصير ليمونتين+ 3ملاعق زيت زيتون+ نص ملعقة فلفل اسود+ ملعقة أكل سماق
وعلى الوجه ننثر خبز لبناني..قصيته صغار وقليته بزيت زيتون..يعطي نكهة.
وتفضلواا هالوصفه بشكلها النهائي،،،
حبيبااتي..لو تكرمتوا ..لحد يرد على الموضوع..بكمل تنزيل الصور...
