حيآكم بمصنع إذآبة الكروؤش ( من 70 كجم وتحت )~

السلآم عليكم ورحمة الله وبركآته

شلونكم بنآت ورشيقأت المستقبل p;

هالموضوع مخصص حق الي أوزانهم مو كبيرة لأن الي أوزانهم كبيرة رآح ينزلون بشكل أسرع من إلي أوزانهم متوسطة ! يعني التحدي بيكون من وزن 70 وتحت

أول شي كل وحدة تكتب طولها ووزنهآ وعمرهآ ورجيمهآ وشعورهآ وإهيآ متينة .. عشآن التشجيع..
وبعد بعطيكم طرق تساعدكم على مقآومة الكآكآو والوجبآت المغرية p;

وأنآ أول وحدة ببدي والتسجيل رآح يكون بس اليوم (؛

بيآنآتي :

العمر : 17 سنة
الطول : 161 سم
الوزن : 64 كجم
الرجيم : نظآم غذآئي رأح أنزله الحين حق إلي يبي يتبعه معآي
الشعور : طبعأ فرق فرق بين لمن تكونين تختوخة ولمن تكونين رشيقة .. أنا جربت الاثنين بس مآكو مقآرنة الصرآحة..الرشآقة لمن تلبسين النفانيف عليج غيييير..حتى بينج وبين نفسج صحتج غير نشاطج غير..تحسين إنج رشيقة وخفيفة..والشعور الأحلى لمن وحدة تشوفج تقول شنو هذآ خلصتي !! أكلي أكلي p;


وهآذي نظآمي إلي بلتزم فيه لين أوصل هدفي إلي أهوا 55 يعني يبيلي تقريبا 14 كجم أطيرهم قبل شهر 5 إن شاء الله


الريوق :
طآسة ( صغيرة ) كورن فلكس + حليب قليل الدسم

الضحى :
اختآري بين هالاختيارات ( برتقالة - تفاحة - 2 أفندي - كيوي - شريحتين اناناس متوسطة - شريحة رقي كبيرة )

الغدآ :
إلي موجود بس بكميآت معتدلة وخليج مدققة على كلمة معتدلة يعني تقريبا ( 4 قفاش عيش + نص كف ايدام + صحن سلطة صغير قليل الزيت والملح ) وجذي

المغرب :
نفس الضحى أي نوع من أنواع الفواكة الي حطيتهآ

العشآ :
نفس الريوق


ملآحظآت:
1- قبل كل وجبة حتى السنآك شربي كوبين مآي كبير..ولا تشربين مع الأكل أو قبله لأن يسبب انتفاخ..والسنآك ضروري قبله كوبين مآي لأن راح يحشج إنج شبعآنه عدل

2-الريوق لا تتأخرين فيه ولا تلغينه لأنه أهم وجبتين اهما الريوق والغدآ أمآ العشآ فممكن تلغينه واذا يعتي حزتهآ أكلي أي كمية من الخس وأنآ مرة جربت لغيت العشآ ونزلت الحمدلله

3- السنآك لا تفكرين تلغينه لأنج جذي تيوعين نفسج واذا حسيتي باليوع معنآته إن جسمج يحتاج طاقة وإن عملية الحرق قآعدة تصير أبطئ..فكل مآ يعتي أكلي خس..والتزمي بالسنآك مو تحذفينه وتقدرين تبدلينه بخس أو خيار بعد

4- مآبي أكلف عليكم بالريآضة .. أنآ إلي أسويه كل يوم ( 30 مرة معدة ) + بدآل الاصنصير استخدمي الدري..وأي مهمة انتي سويهآ مثلا سمعتي أحد يبي مآي قومي فزي يبيله حتى لو مآ طلب منج p; إنتي بروحج تطوعي حتى لو أخوج الصغير و حتى التلفزيون لا تعتمدين على الريموت الا اذا صج مآلج خلق..واذا انتي من مدمنين الموبايلات..لعبي فيه وانتي تفترين بغرفتج يعني لا تقعدين كله امشي ورآكضي وطآمري p; .. وقللي اعتمآدج عالخدآمة والله تصيرين صحية .. ( احنآ استغنينآ عن الخدم نهائي وبالأول كنآ نتعب وأجسآمنآ تعورنآ بس الحين رآحة نفسية وجسدية ووزني مآ يزيد بسرعة مع إني قاعدة أكل طبيعي مو أقل من العالم ! ) يعني زبدة هالكلآم خليج حركية

5-إذا شفتي كآكآو سوي هالطرق ( حسسي نفسج إن رآح يحوشج حآرج قوي + تذكري شكلج وانتي متينة وان اللبس رآح يكون شكله فلم عليج خآصة أمآكن انتي مإ تشوفينهآ مثل ظهرج لمن يكون مجفس ولا فخوزج من ورآ فيهم سيلولايت ولا منآطقج الانثوية اذا كبرت بشكل بشع قصدي يصير فيها سيلولايت يعني جنه حفر فيها مآ تقدرين تضعفينهآ بدون لآ تذوب ! يعني بتظلين طول عمرج ميتنة وهالشي مو زين لا
للصحة ولا النفسية + تذكري ممثلة عاجبج جسمهآ وقولي أنا بصير مو بس أضعف منها بصير بعد أحلى منهآ + تذكري المدح إلي بييج من النآس لمن يشوفونج ضعيفة وشلون حيآتج بتغير للأحسن )
وكل وحدة وطريقتهآ

6- اخيرآ .. خلي ريوقج مبجر وعشآج ضروري يكون قبل الساآعه 7:30 عقبهآ لا تفكرين تحطين شي بحلجج إلا اذا لقيتي نفسج ضعفتي وبتنحرفين اكلي خس ( وانا انصح فيه لان الخس متروس الياف والالياف تحرق الدهن عدل )


وبس وبالأخير انا حبيت أقول اني من اليوم بديت الرجيم وحيآكم الرحمن ~

وترآ في عقآب حق إلي مآتلتزم أسبوعيآ بوم السبت الصبح ولقت نفسهآ وزنهآ ثابت او مو نآقصة راح تمشي لمدة ساعة متواصلة p; عشإن الكل يحرص عالنزول