استفسار حول القطط - تصرفاتها غريبه نوعا ما

السلام عليكم ورحمة الله وبركاته

انا شريت قطوه من اسبوع ، و عمرها تقريبــا شهرين ..

وديتها البيطري ( الري ) وفحصتها شامل ، و الحمدلله قالي كل شي تمام ، وقالي بعد اسبوع ايي عشان اطعمها.

القطوه لعوبه ما شاء الله - بس ما تحب أحد يمسكها كلش !

من يمسكها أحد توخر عنه - يعني لي درجه ان اذا يا وقت النوم ومسكتها ، توخر عن المكان وتروح تنام بمكان ثاني !! ليش هذا التصرف ؟ و شلون اقدر اعالج هذا التصرف ؟ واخليها تتقبل الأمر ؟

وفي شي انا مو حابته فيها ، انها تحب تنام يمي - وانا ما ابيها تنام يمي لسلامتها اخاف افعصها ولا شئ . شنو الحل ؟ وللعلم انا شاريه لها مكان تنام فيه ، بس كلش ما تحب تقعد فيه تفضل النوم على الارض ولا انها تنام فيه.

و في شي ثالث - داري كلها وايرات - مثلا شحن تلفون وبلاكات انترنت ووصلات تلفزيون

هالشي يضرها او لا ؟ لأنها تحب تتعبث فيهم.

و فيها مشكله ما تحب تقعد بروحها ابد - يعني من اطلع من الدار او حشاكم ادخل الحمام تقعد تونون ما تسكت.

واخر شي ، انا داري فيها سراميك وايد وفيها قطع زل - السراميك يضرها ولا لا ؟

للعلم انا مسكره الدرايش ومدفيه الدار عدل - بس يعني غالبا السراميك يكون بارد نوعا ما - فيه مشكله ؟

شلون يتم التصرف معاها في تصرفاتها العجيبه !