تجاربي الفاشلة والناجحة مع الرضاعة الطبيعية

السلام عليكم ورحمة الله وبركاته

صباحكم مساءكم ورد :eh_s(17):

بصراحة انا من زمان حبيت انزل هالموضوع لان مريت بتجربة فاشلة 100٪ وكذا تجربة ناجحة مع الرضاعة الطبيعية وحبيت افيد غيري ويتعلمون من اخطائي مثل ما انا تعلمت من اخطائي

اول شي لازم تعرفون ان الرضاعة مو شي سهل باول الايام خصوصا انج توج والدة وخياط ولوية وكل شوي بتقعدين عالخياط بس تذكري انج ام واجرج عظيم عند رب العالمين وتذكري بعد ان الحليب الطبيعي نعمة وهبة من الله سبحانه للياهل فلا تحرمينه من هالنعمة ومن حقه

المهم راح ابدا خطوة خطوة

** اوول خطوة واهي الاهم الاراااادة لان بالارادة راح توصلين حق الهدف مهما كان صعب وانا عقب بنتي اببجر اللي ماقدرت ارضعها من اول ما حملت بحملي الثاني قررت ان ارضع طبيعي لو شيصير عشان جذي اول خطوة سويتها لما راجعت قسم الحوامل بالمستوصف كلمتهم والدكتورة خلت السستر تقعد معاي وتصحح كلل مفاهيمي الخاطئة عن الرضاعة واللي كانت السبب بفشلي يزاها الله الف خير وانا ذكرت هالنقطة عشان اللي تواجه مشاكل او واجهت مشاكل من قبل تقدر تروح حق قسم الحوامل اللي تابع المنطقة وفي اماكن عندهم اجهزة خاصة عشان يعالجون مشاكل الحلمة وغيرها ويهيأونها حق الرضاعة

** ثاني شي وقت الولادة كلمي الدكتورة او السستر اول ما يطلع البيبي تحطه ع صدرج لان سبحان الله هالشي يساعد على ادرار الحليب وانا قلت هالنقطة لان اطري ان الخاص يسوونها بس الحكومة نحححس عشان جذي كلموهم من قبل

** ثالثا لااا تحطين اليبي بغرفة وانتي بغرفة اول الاشهر خصوصا بالاربعين لان سبحان الله اثبتوا علميا ان وجود الياهل معاج بالغرفة يساعد على ادرار الحليب

** لاااا تفكرين تعطين البيبي ممية اول اسبوعين الا بحالة الضرورة القصوى مثل مراجعتج للطبيب او عندج ضيوف واذا كانو الضيوف ويمونون حاولي تغطين وترضعين يكون احسن لان الياهل راح يتعود عالممية وبعض اليهال يتنحرون وماراح يرضون ياخذون من صدرج عقبها فبالبداية خلليه يتعود على صدرج تابي دخلي الممية ولا تقولين مابي اعطيه ممية حتى لو تشفطيله بس احيانا تضطرين تطلعين فالاحسن يتعود عالاثنين بسسس اذا قللتي الممية وخليتي الطبيعي اكثر راح يحب ياخذ من صدرج

** في شي واايد مهم وهم عملية المص ،، المص اهو الشي الرئيسي اللي يخلي الحليب يدر عشان جذي اول ايام لاا تشفطين الا للضرورة يعني يكون الحليب زايد يكون الياهل شرب بس صدرج بعده مترووس بس اذا مل شوي بتشفطين على بو ان ماياخذ راح ينشف الحليب وانا بنتي شفطت اسبوعين وعقبها اختفى الحليب
انا يتلي فترة ما كنت اكل عدل فالحليب قل ومرةحسيت ان اللي قاعد يطلع نتتتفة ما يكفي بنتي قمت وشربت حليييب وخليت بنتي تمص مع ان ماكان يطلع وايد بس خليتها تمص جنها مصاصة عقب لما يأست ووصلت حدها صرخت فعطيتها ممية مرة او مرتين عقبها در الحلييب وكملت رضاعة عادي
عشان جذي اذا شفتي الحليب قل خلي الياهل يمص شوي بعدين عطيه رضعته بالممية حتى لو صار اكثر من مرة حاولي

** وفي شي يخلي الوحدة تمل من الرضاعة الطبيعية اول الايام وتعطيه صناعي واهو ان الياهل ما يشرب رضعة كاملة اول ايام يشرب شوي وينااااام ومن نخلي الياهل بفراشه عشان ينام يقعد ويرد يصرخخخخ ويبي يكمل ادري بيصير فيج جذي:eh_s(11)::eh_s(11): وصج يتلي ايام كنت اببببجي من هالحركة لان كان الخياط يعورني واقعد عليه بالساعات وبنتي كانت كل شوي تنااام وما تكمل الرضعة بس ماعليه صبري لان الصعوبة بس اول الايام والسبب ان الياهل باول ايام مو متعود عالرضاعة فتصير العملية مو منظمة وثاني سبب اهو ان الياهل يكون قريب منج ويسمع نبضات قلبج وهالشي يحسسه بالدفا ولحنان والامان فيناااام

** النفسية وااايد مهمة حاولي لا تتنرفزين ع اسباب تافهة لان انا كان الحليب حيييل يقل اذا تضايقت طبعا مو الضيقة العادية لا انا اتحجى انا عن الضيقة والزعل الجايد

** في غلطة شنييييعة كنت ارتكبها بحق بنتي واعليا وهالشي اهو السبب الرئيسي اللي خلاني ما ارضعها كنت انومها عقب الرضعة واخليها تيووووع عشان تنجبر تشرب مني ولما تقعد تكون ميتة يوووع وتصصصصصرخ وانا كنت موترة الجو وكنت اقول بيني وبين نفسي انا بحرب يا انا افووز يا اهيا >>>> مجرمة هههههههههه مع اني كنت احط صدري بحلجها بس مااااخذت ولا مرة ولا مصت ولامرة وهالشي غلللط
والصح ان يكون الياهل هاااادي وانتي هااادية ومافي شي يوترج وقتها وتحطين الياهل ع صدرج وخليه اهو يدور الحلمة لييين يلقاها طبعا اول ايام يطولعلى ما يلقاها بس صبري ومرة على مرة راح يصير الوضع اسهل وعاادي

** بالنسبة حق تشققات الحلمة اول ما تحسين ان حلمتج مجروحة عالجيه على طول لان اذا زاد الجرح ما راح تقدرين ترضعين من الالم علاجها موجوط بالصيدلية وانا جربت كريم بيبانثين بس يقولون في علاج طبيعي واهو حلييبج عقب كل رضعة اخذي من حليبج شوي ومسحي فييه حلمتج وخليه يطقه الهوا لين ينشف بروحه

** لااا تنسين التغذية عشان لا يقل حليبج اهم شي شربي ماي بالهبل وكوبين حليب باليوم كافي والاشياء اللي تدر الحليب بعد العدس بس يسبب غازات ساعات ماياثر وايد عالياهل من ياهل لي ياهل يفرق والبقدونس بعد والجزر والتمر وشاي النعناع

ومن مميزات الرضاعة عشان نشجع الامهات رجوع الرحم لمكانه يعني اذا اول 3 ايام تقريبا عقب الولادة حسيتي بالم قوي بالرحم لا تحاتين هذا الرحم قاعد يرد مكانه
والرضاعة بعد ترد البطن وتنزل الوزن بشكل اسرع وهذي الميزة عجيييبة لان الرضاعة تستهلك الدهون اللي بالجسم

اتمنى اكووون فدتكم وسوري الموضوع سايح على بعضه بس لان كتبته 3 مرات وانمسسسح فكتبته بسرعة عشان اضمنه وماااعرف احط صور

واللي تستفيد لا تنساني بدعوة حلوة

واي سؤال انا حاضرة