:eh_s(17):مساء الخير ..
موضوعي عباره عن نصايح لفئه محدده من البنات ..(( العصبيه والنجريه والنكديه والزعوليه ))
هالكلام دايماً اردده لحديثات الزواج سواء صديقاتي او خواتي او قرايبي ..
لا تخلين زوجج يكش منج ويكره يسويلج شي ..
راح اوضحلكم شلون ..
وحده من صديقاتي صارلها 6 سنين متزوجه او 7 .. مو عادتلها بالظبط :)
المهم غير شهر العسل ماشافت .. وريلها ماشاء الله بالسنه يسافر 3 او 4 مرات وبكل مناسبه لازم يسافر سواء عيد وطني او عيد فطر او عيد اضحى او راس السنه او عطله الربيع ..
وكل هالسفرات مع ربعه .. يقولها حامض على بوزج تشمين ريحة المطار ..
طبعا بتقولون هالزوج حقير واناني وماستحي على ويهه وبخيل واكيد رايح يخربط .. الخ
وانا اقولكم لأ ..!!
هالزوج انسان طبيعي .. وطبيعي جدا بعد ..!!
تدرون ليش ..!!
لان شهر العسل اللي ساافرو فيه كان من اسوأ ايام حياته اللي مر فيها ..!!
البنت اشتغلت عليه نكد وهواش وغيره وريج ناشف ..!!
على كل كلمه مطنقره .. على كل نظره هوشه .. على كل نفس بوز وطناقر ..!!
كرهت الريال بالسفر معاها .. خلاص خذا انطباع انها نكديه وحرام يقص تذكره وحجز فنادق ويقط جم الف على النكد والهواش ..!!
اهي بعظمة لسانها تقول انا كنت امشي واتزعل .. للاسف حسبالها ان هالاسلوب بيخليه يركظ وراها ويبوس ايدها ويقولها اشفيج حبيبتي ليش معصبه .. ؟؟
غلط يا بنات غلط ..!!
المثل يقول ريلج على ماعودتيه ..!!
اذا عودتيه ان السفر معاج يكون من احلى ايام السنه صدقيني بينطر متى ايي موسم السفر عشان يحجز ويتحمس ويتشوق حق سفرتكم والامكان اللي بتروحونلها وتشوفينه اهو اللي يقترح عليج
اما اذا شاف العكس فشي طبيعي بيشوف ناس غيرج يونسونه ويسافر معاهم بدون نكد لان البني ادم يسافر عشان يستجم مو عشان تطلع روحه ..
وهالكلام ماينطبق بس عالسفر لا على عدة شغلات ..
وحده ثانيه نفس الشي راحت مع زوجها السينما وطلعت الممثله الاجنبيه حلوه ولابسه قصير واستلمت الريال هواش ..!! والمشكله اهي منقيه الفلم واهي حازه تذاكر وعازمته ..!!
انزين ليش تغثين الريال يعني هالانقليزيه خلاص بتطلع من الشاشه وتقعد يم ريلج ..؟؟
ماتهنت لا بالفلم ولا تهنت عقب الفلم ولا تهنت بالطلعه وقطت فلوسها عالفاضي
لو ساحبه ريلج بكل هدوء بدون هواش جان عالاقل رايحين مكان ثاني متعشين ولا متمشين ولا رادين البيت وانتو تظحكون .. كرهت الريال بالطلعه معاها فقير صار يخاف يدش السينما ..
وحده ثالثه ريلها واعليا حاجزلها شاليه ..
ماقصرت طبعا غسلت شراعه ليش قالها باجر الاهل بيون الشاليه عالغدا .. خلته ينام بالصاله واهي نامت بالغرفه من الهواش ..
لييييييييييش ليييييييييييييييش ليييييييييييييييييييش ..!!
يبا قوليله حياهم الله .. قوليله اذا ماوسعهم الشاليه اشيلهم على راسي ليش النكد يعني مو كافي ليله وحده مع ريلج وحتى هالليله الوحده خليتيها هواش ..؟
حرام عليها الصراحه الريال متعني ومافاجئها واهي جذي ردتله الاحسان ..
وحده رابعه رايحه فندق مع زوجها وهم تهاوشو وماصدقو متى يصير الصبح عشان يردون البيت وكل واحد يفتك من ويه الثاني
والامثله وايد وايد وايد ..!!
الصراحه هالفئه من البنات لازم الواحد يوعيهم حرام ..
انتو قاعدين تخربون على روحكم ..!!
قاعدين تنفرون رياييلكم وتخسرون صفات حلوه موجود بشريك حياتكم ..
ترى لكل فعل ردة فعل ..
اليوم يسويلج باجر يقول هاذي مو كفو ..
ديرو بالكم حبيباتي وخفو على رياييلكم والله ترى الدنيا ماتسوى والعمر قصير استانسو بحياتكم ووخرو عن النكد ترى مايطفر الريال ولا يبعده عن مرته غير الاخلاق الخايسه والهواش والنكد في بنات للاسف حسبالها اتصير قويه وريلها يحبها ويخاف منها لما تعامله جذي ..
مو مستوعبه ان هاذا بني ادم .. مثل مايحبج ويموت فيج يقدر يكرهج وينفر منج ..
حتى لو كنتي ملكة جمال الكون :)
تحياتي لكم واتمنى تتقبلون نصيحتي برحابة صدر .. والله ابي مصلحتكم ..:eh_s(17)::eh_s(17)::eh_s(17):
