اذگريني

قصيده اعجبتني للشاعر /ناصر مناحي الدوسري


مابرد عزمي ولاغير لهيب الحب لوني
دام...لي قلبٍ من عروق الوفا يسقي ...وريده
والهوا حظ ونصيب ودمعتي عذرا جفوني
وللجفون سلوم والدمعه تخاف من النقيده
ليه يامن تسرقين الود من نظرة عيوني
ماحسبتي غيبة اللي لانوى الغيبه!فقيده
وليه لاعزمت ابنسا من على الدنيا نسوني
ماذكرت الا انتي وجرحٍ مساحاته عديده
ليت عذرگ عن وفاك وغلطتك يلغي شجوني
وليت لي قلبٍ بدون احساس واحكامه شديده
كنت اظنك ماتعيشين العمر لحظه بدوني
واثر ما للظن غير اللوم ولحون القصيده
اذكريني..كل مافاظت عيونك وافقدوني
وكل مادمعك نشد خدك وقال شصار بيده
واذكريني لاغزا البرد الظلوع ومالقوني
ولاجبرك الوقت في ممشاه واطباعك عنيده
واذكريني..كل ماجاتك من العالم لحوني
عقب ماكنتي من لساني تعرفين الجديده
واذكريني كل ماحتجتي تخونيني وخوني
في غيابي كل ذكرى بيننا كانت سعيده
والا انا لامن ذكرتك ماذكرت الا طعوني
فالزمان اللي تجمعنا به الله لايعيده
ماربحت الا جفاك وماخسرت الا جنوني
ولابعد هذا سوى النسيان والفرقا الاكيده
سامح الله غلطة احساسي قبل غلطة عيوني
وسامح الله هاجسي في ماهدالك من رصيده
لو ظنوني يوم واحد تشعر بخيبة ظنوني
مايصير الحزن سيد الصدر وافراحي عبيده
سامح الله ذنب كل اللي على الظيقه حدوني
لين صرت اواجه الايام في بسمه وحيده

الشاعر/ناصر مناحي