اشلون قدرت احصل نسبة 83 % ( دليلج لضمان على الاقل نسبه 80% )
السلام عليكم بنوتات ،،
اول شي انا ديناصور، متخرجه من سبع اسنين من الثانوية ..
لكن ياني سؤال على الاسك ، وذكرني بالماضي !!!
وبما انه احنا على اعقاب كورس يديد ..
اتوقع موضوعي بيكون بمحله ومناسب جدا ...
* جم وحده ماتحب الدراسة ؟؟
:krkrkr:
* جم وحده طفارتها الامتحانات ؟؟
:krkrkr:
* جم وحده لمه تمسك الكتاب وتشووف عدد الصفحات ، يضيق خلقها ؟؟؟
:krkrkr:
* انزين جم وحده لو بقولها الحل السحري عندي، بتسانس ؟
:krkrkr:
اولا ،، انا بتكلم كوني وحده عشت ايام اولى ثانوي وثاني وثالث قبل لا يتغيرون
وعلى الرابع غيرونا وكنا نضحك على رقم 12 ، ومرات ننسى ونكتب 4 ، الله يا الدنيا !!
مادري ليش احس ذاكرتي صار لونها ابيض باسود ؟؟؟ :D
خلوني اعطيكم نفس النظام بالضبط الي كنت اسويه مع العلم ان نسبتي المفروض تكون 93% !! لولا العربي!!
تخيلو كل المواد ، انا اقل من الدرجة الكليه باربع او ثلاث درجات ، والانقليزي فل مارك والفرنسي فل مارك بعد!
والصدمه، الفلسفه كنت اقل بدرجه وحده من الفل مارك والتاريخ بعد !!
بس العربي كان 52 !! هذا الي خسف فيني !! @@
بس اصلا الحمدلله على كل حال لان الادبي شنو مصيره ومجالاته غير العلوم الاجتماعيه الي كانت حزتها تقبلني فوري والاداب الي قبلتني فوري والتربية الي هم راح تقبلني فوري ؟؟
فكانوا اثنينهم نفس المصير، 83 او 93 .
المهم ،، كان عندي جدول يومي وجدول لامتحانات الفاينل وارد اقول، الي تبي تضمن على الاقل 80% خل تطبق نفس الجدول بالضبط وراح تدعيلي !!
-------------------------
اليومي :
- كل يوم خصصيلج بالضبط ( ساعه ) . الوضع مايحتاي اكثر من ساعه بس !!
خلال هالساعه ،،
- اقري الدروس المقررة عليج باجر
- خلي يمج ورقه تلخيص،، اقري كل جمله مهمه وحطي تحت خط وسويلج الاساله بعدين املي الورقه فيها
( هالورقه خشيها عندج تساعدج حق الامتحان باجر وتوفر عليج التلخيص )
- اي معلومة تقرينها باي كتاب، دوري عليها بقوقل ، واقري عنها !! مثلا مثلا درسكم عن الخليفه العباسي الثاني!!
دشي ويكيبيديا واقري ، وشوفي المقالات واقري ..
اذا نوعتي مصدر المعلومة هالشي راح يخلي المعلومة تركز براسج !!
وخصوصا ااذا ناقشتي احد فيها !! مثلا دشي اليوتيوب وشوفي الكومنتات وصححيلهم المعلومة، اذا مثلا احد كاتب تاريخ وفاته غلط
بطلي الكتاب وصححيله المعلومة ودشي بنقاش معاه!!
هالشي اصلا راخ يغنيج عن دراسه الامتحان !!!
- الافلام مهمه جدا !! اي ماده علمية او ادبيه، راح يكون في عنها فلم وثائقي، لنفرض عن الحرب العالمية الثانية الي يدروسنها في رابعه ثانوي،
دشي اليوتيوب وجيكي على الافلام الوثائقيه اهناك!!
انا عن نفسي، على ايامها ماكانا نعرف اليوتيوب، فكنت احط على قناة الكويت الثانية :D، واشوف افلامها الوثائقية !!!!
وثلث ترباعها مو مترجم بس كنت مبلتعه بالانقليزي وهذا الي غفرلي :D
و هم القنوات الوئاثقية العربية المتخصصه ماطلعت ذيج الفتره !!
طبعا ايام الامتحان مو بس اجاوب على قد السؤال لا !! وكنت ازيد من عندي لان معلوماتي صاروا اكثر من الي موجودين بالكتاب فـ اتفلسف على الابله عشان تحس اني خابزه الماده !!
لوووول ،،
اما امتحانات الفاينل ،،
كنت احسب فتره الاجازه واسويلها تقسيم على عدد المواد ، مثلا 30 على 7، يطلع معاي اربعه
يعني كل ماده اخصصلها اربع ايام في فترة الاجازه،، راح يمديني اخلص السبع خلال شهر .
طبعا اربع ايام وايد ، اذا كنتي مطبقه الحركة الي فوق بحذافيرها .. يومين بس راح يكفونج !!
وهالشي اقل مافيه راح يضمنلج الــ70 اذا مو 80 ..
لان الفكرة فيها، راح تفهمين الماده ، مراح تحفظينها ! والفهم معناته مراح تنسين اي معلومة !!
اما الحفظ ، بمجرد انه يخلص الامتحان راح تنسين كل شي وتردين تدرسين من يديد حق الفاينل !!!
انا هالشي اعتبره سر نسبتي الي لولا العربي جان صرت بالتسعينيات !!!!
عاد لا اقولكم هالمعلومة @@
يوم دشيت الجامعه كان فيني حقد كبير على العربي، قلت ياربي شهالماده الي سقطتني جذي؟
قمت وشديت حيلي من مدرسين من فهم من اني ادش منتديات متخصصين لغه ، واسالهم واعرب جدامهم ويصححون لي،
وانصدمت بالجامعه لمه يبت A في العربي !!!!!!!
وصار الاعراب بدمي لدرجة اني قمت اعرب لوحات الشارع ، مثلا قف هنا !! اقول قف ، فعل امر مبني على السكون، فاعله مستتر تقديره انت، هنا ظرف مكان مبني على السكون همن !!
خخخخ
وصارت هاذي مهنتي بالشارع ، امشي واعرب اللوحات !!
:krkrkr:
وهذا بس عشان انتقم منها @@
حطيت تجربتي واتمنى اني قدرت افيدكم :eh_s(17):
