الطيب فرصة والجمايـل توافيـق ومن لاتوفق ماكتـب لـه جمالـه
ومن لارقى للطيب روس الشواهيق مازان له وقته علـى مـا بدالـه
وما دام لفعول الجمايل عشاشيـق كسب الجمايل ما يجـي بالسهالـه
ولو أنها تشرب مع فكـة الريـق كلن خذاله كل مـا أصبـح بيالـه
والطيب منوه للقلـوب المشافيـق كلن يتـوق ومنوتـه راس مالـه
والمدح ما يزهي على الرجل ويليق إلا لا صـارت وافيـات خصالـه
يستاهله رجلـن يفـك المزانيـق اللي يقـال ونعـم لا جـا مجالـه
ومن ساقته نفسه وهو ما بعد سيق لأجـل الجميـل يزيـن الله فالـه
والمرجله ما هي بتحتـاج تنسيـق مـن قلـب اللـي عشقهـا وبالـه
ومن عادة الدنيا تخـون المواثيـق تفتـر مكرتهـا سـوات المحالـه
ولولا اللوازم ما عرفنا المخاليـق ما نعرف الرجـال ليـن انعنالـه
والكفو تظهر فزعته حزة الضيـق وينشاف في الشدة بعيـن العدالـه
نسل الرجـال متعبيـن الملاحيـق متوسطن من بيـن عمـه وخالـه
واللي يطيق ولا بغى قال ما أطيق تحرم عليـه المرجلـه والشكالـه
والهينه تكبر على اللاش والهيـقله في الرخا قاله وفي الضيق قاله
والطيب شاره والضماير صناديـق واللاش طيبه مـا تعـدى ظلالـه
وأنا أسبر قلوب الرجال المغاليـق والصامت أقطع غايته مـن مقالـه
وما دام في الدنيا رجال ومطاليـق نصيتهـم والـلاش مالـي ومالـه
