ستايلج بالبيت مع patcholli

http://styletips101.com/wp-content/u...2/cute-pjs.jpg




مساء الخير ..

هالموضوع كتبته لافادة حديثات الزواج ..


اغلب البنات يحطون فبالهم ان الزواج وخاصه بدايته يقتصر على قمصان النوم والملابس المغريه والمثيره ..
وبعد فتره من الزمن تستغرب ان الملابس المغريه ماعادت تأثر بالزوج .. نفس السابق ..
للاسف هالفكره غلط x غلط

اولا البقاء على نمط واحد من اللبس راح يولد فتور واعتياد عند الزوج ..
اعتاد يشوف صدرج وفخوذج وبطنج وظهرج بشكل مستمر بالتالي ماراح يكون في اثاره لانه عينه اعتادت مجرد انج تغيرين لون اللبس وحده مايكفي ..
الرجل مخلوق بصري تحتاجين تنوعين بلبسج وشكلج وستايلج عشان تظل الاثاره موجوده ..

ثانيا التنسيق في اختيار ملابس البيت ..
مثلا لاتلبسين بجامة النوم الساعه 4 العصر
ولا تلبسين قميص نوم الساعه 1 الظهر وتقعدين فيه
ولا تلبسين نفنوف سهره وانتي تتغدين ..

في الفتره الصباحيه تقدرين تلبسين فستان قطن ناعم ومرتب او بلوزه قطنيه وبنطلون مقلم
في فترة الظهر والعصر لبسي تي شيرت وبرمودا او جمب سوت او بلوزه وشورت او تريننق سوت
في الليل لبسي فستان حريري او ستان او شلحه او قميص النوم وفوقه الروب ..

ثالثا بالنسبه لقميص النوم ..
مو شرط يكون فاصخ وفاضح
احيانا المستور يكون اجمل واكثر جاذبيه
واحيانا فستان السهره يكون له حاذبيه اكثر من قميص النوم
واحيانا الشلحه الناعمه الستان تجذب بعض الازواج خاصه اللي يحبون الستايل الاجنبي البسيط

ملاحظه : لا تتظايقين اذا لبستي وكشختي وزوجج ماعطاج ويه لان هالموقف يحدث لاغلب المتزوجات والعلاقه الحميمه تحتاج لراحه نفسيه وجسديه وفكريه وانسجام واندماج
فلما يكون زوجج مكروف طول اليوم بالدوام او متظايق ويحاتي امر مهم او يعاني من ضائقه ماليه فهالشي طبيعي ماراح يخليه بمزاج مناسب ولا راح يكون متهيء للعلاقه
لبسي وكشخي لنفسج اولا بحيث انج اذا مالقيتي اهتمام من زوجج ولا تعليق تكونين مرتاحه وسعيده انج كاشخه وتتعودين ان شكلج يكون جميل ومهتمه بروحج في كل وقت مو للزوج فقط وجذي ماراح تنجرحين ولا راح تتأثرين اذا ناعطاج ويه .

رابعا : لبس طلعه في البيت ..؟؟
ليش لا ؟؟
وايد زوجات يعانون من مشكله ان الزوج برى البيت كثير الخز ..!!
وخاصه اللي تلاحظ ان زوجها يخز بنات بستايل معين ..
مثلا التنانير القصيره والكعب العالي .. او الجينز الضيج والتي شيرتات او غيره من الستايلات
شلي يمنع انج تلبسينه لزوجج بالبيت ..؟؟
بالعكس خليه يشوفج بكل الستايلات عشان قلبه لايزوغ على برى ولا يلفته ستايل معين واهو طالع
تكونين انتي تارسه عينه وقلبه ومشبعته


ملاحظه اخيره : كل النقاط السابقه ماتنفع بدون نفسيه حلوه وابتسامه وحسن خلق
لو تكشخ الزوجه وتكون على سنقة 10 .. لكن نفسيتها خايسه وريجها ناشف ومغروره مع زوجها وماعندها اسلوب ولا كلمه حلوه كل هاذا ماراح يغير شي لو تلبس اجمل لبس وتكون اجمل الجميلات

واللي عندها اي اضافات او تعليق على النقاط لاتتردد بنتظار مشاركاتكم واضافاتكم الجميله


تحياتي ..