ايش السالفه ...

حاجه غريبه تصير بالعالمي .. الادارة تجلب لاعبين لهم صيتهم مثل القحطاني وغيره ومن دخولهم النادي متغير لعبهم تقريباً ولا يستفاد منهم فنياً ونادينا يغير لاعبين اجانب ومدربين كل ستة شهور ويجلب محليين وبرضه لهم سمعتهم قبل يوقعون معنا بس مااعرف ايش السر يختفون عندنا .. لو نبي نقول مدربين ..
كم اسم لامع وصل للعالمي ولم يوفقوا وان وفقوا معنا مثل ديسلفا وباوزا يتغيرون ..
لاعبين تقريبا جميعهم جلبهم كحيلان ماعدا ابراهيم غالب وبرضه لم يوفق لليوم نادينا ..
جمهور مافيه مثله بالشرق الاوسط كله وادارة تصرف ملايين ولاعبين اجانب اساسيين مع منتخباتهم لم يوفقوا جميعهم ( اللي وصلوا مع زينقا ) . غيروا الادارة وبرضه للان ماتغير شيء ..
وقت نجح معنا ايلتون خوزيه والمصري حسام غالي وايدير بدأ التخطيط لرحيلهم من النادي وبالتحديد من اعضاء الشرف المسيطرين على عقول ( ... )
ماني من اصحاب الخزعبلات والشك بس بجد شيء يحير ..
موضوع فايز السبيعي برضه شيء يحز بالنفس انسان يواصلون الاتفاق مع وكيل اعماله اكثر من مره ويتفقون ويرجع بعد كم يوم يرفع القيمه ويوافقون والمعلومات التي ذكرت انه تم رفع المبلغ بعد الموافقه اكثر من ثلاثة مرات جميعنا سمع بها وبالاخير يرفضون على شيء تافهه بالنسبه لقيمة العقد واقصد بالرفض من قبل وكيل اعماله . طبعا هذا اللي نسمع فيه ..
الاشياء اللي تغيرت منذ جاء كحيلان ..

_ هو طموح جميع النصراويين ارتفع .. وماصرنا نقبل بأي اخفاق مثل زمن ممدوح والوليد ..

_ الاندية تهاب النصر في صفقات لاعبينها وبدأو يسوون اجتماعات رؤساء الانديه لتحديد الامور المالية وكل ذلك خوفا من البعبع الجديد بعد البلوي كحيلان واعضاء الشرف .. واحسن ماسويت ياكحيلان انك رفضت الفكره ولم تحضر..

_ عرف الجمهور من مع النادي ومن ضده من اعضاء شرف وشفنا الحروب بينهم والسبب بسيط جاء رمز للعالمي جديد بعد عبدالرحمن بن سعود يرحمه الله لو حقق ربع ماأوعد به جمهوره لمات البعض غيضاً من هذا ..

لذلك ياليت ياكحيلان تشوف لك حل .. انت اجتهدت وحاولت ولكن للاسف لم توفق الى وقتنا الحالي .. اذا كنت ترى ان العمل والنتائج التي ترضينا لن تتحقق ارحل قبل ان نفقد الجزء اللي باقي لك بقلوبنا ..

ملاحظة بسيطه :
الرجل الوحيد بالنادي اللي يحقق مايطلبه الجمهور في بداياته الى وقتنا الحالي .. طلبنا منه البعد عن التصريحات الاعلاميه التي تسبب المشاكل وكثرة الاعداء ونفذ رغباتنا ..

اذا صحت الاخبار بجلب صانع لعب برازيلي يلعب خلف المهاجمين .. تخيلوا الوسط والهجوم ..
الوسط ( عزيز وكيم والبرازيلي الجديد وفاجنر ) الهجوم ( السهلاوي وبوقاش )
الدفاع ( هوساوي وعيد وحسين والغامدي )
ياليت الحارس كان السبيعي ..