اتحداكم ان كانت فيه طفرة الا اذا ........

الله يالدنيا مرت 6سنين من 2006 الى 2012بسرعة البرق .

بعد 2006 انهاروا ناس وانجنوا ناس وطفروا ناس وانتحروا ناس ..... الخ.

الان بعد هذه السنين بدأت الحياة تدب في سوق الفلس ..

رجعت بعض التدبيلات .. ورجعت بعض التوصيات وكان شي ما صار

واحد يقولك (كلمني هامور ووصاني .. )

والثاني يقولك ( الشارت يقول ان السهم رايح 3 تدبيلات) .. اجل الشارت قالك ؟ شيء عجيب ..

حبايب قلبي .. الجديدين والقديمين .. نصيحة لوجه الله اذا ما كان لك مصدر او مصادر موثوقة تجيب لك المعلومة لا تجلس بالسوق هذا ..

سوقنا ما هو سوق شارتات وتوقعات واحلام وامنيات ، سوقنا سوق معلومة فقط لا غير ، (عندك معلومة تسوى كثير ، ما عندك معلومة ما تسوى ريال وسط الحيتان).

انا ما اتكلم من راسي ، ولا بضيع وقت ، ولا بتفلسف عليكم ، ولا ادور مدح وردح ، انا اتكلم عن واقع عشته من عام 2001

11 سنة وانا ادربي راسي وسط هالسوق واكون صريح معاكم ، الحمد لله ربحت اكثر مما خسرت ماليا حتى لوكان شي بسيط ما يعادل تعب السنين اللي راحت والسبب (بعض المعلومات الصحيحة) والسبب الاهم توفيق الله،
لكن في المقابل خسرت نفسيتي وصحتي ووقتي واشياء كثير ما تنعوض.

من خلال 11 سنة ايقنت وجزمت ان السوق سوق معلومة فقط ، واحيان بسيطة جدا جدا حظ .. لكن يجي واحد يقولي الشارت يقول ، اقوله الله لا يهينك شيل شارتك واقضب الباب.

ابسألكم سؤال بسيط جدا .. شوفوا اشهر المعرفات في منتديات الاسهم اقصد اصحاب التوصيات النارية ليه نجحوا ؟ هل نجحهم الشارت ؟ هل نجهم التحليل الفني ؟ هل نجحهم الحظ ؟

لا والله ما نجحهم الا المعلومة ، لاجل كذا نصيحة لكم وفروا وقتكم وتعبكم وجهدكم وخليكم مع اصحاب المعلومة واصحاب اصحاب الهوامير الموثوقين .

صح المسألة صعبة جدا ، لكن ما فيه حل ثاني واللي ما يقدر يدور له مجال ثاني والا راح يكون طعام جحوش وضحية قروبات ..

طبعا كلامي راح يزعل كثير من المهتمين بالتحليل الفني لكن بقول ان اهل التحليل الفني ناس مجتهدين يطاردون الكميات والمؤشرات وبعضهم وهم قلة يقدر يقرأ الشارت ويعرف ان السهم راح يرتفع

لكن هل يقدر يحدد هدف ؟ طبعا اتحداه .. لأن الشارت ما يعطي هدف سعري ، اللي يعطي هدف سعري هو صاحب المعلومة فقط لأنه يعرف السهم رايح فين ومتى راح يتم التصريف ..

عموما الخلاصة جملة واحدة ( اللي ما يملك مصدر معلومة ما يجني الا التعب والعناء والحسرة)

وسلامتكم ..