فرحت لـك وأنـا معاليقـي حطام
والصدر مـن مـا فيـه بيّـح كنينه
فرحة يتيم ٍ ليلـة العيـد مـا نام
خـالاتـه وخـوالـه مواعديـنه
مواعدينه بشت وشمـاغ بـسّـام
ويلّعبونـه فـي مـلاهـي المديـنه
مانـام واحـلامـه تـحّـراه قــدام
كنه يطـول أحلامـه بـ راحتينه
صبحه تجّلا نـوره بـ عيد الاسلام
وقبـل يـروح المسـجـد ملّبسيـنـه
جده مـا بيـن العين والجيم واللام
خلّـيـه يافـلانـه ولا تأخريـنـه
تراقبـه بـ عيونهـا حـب وهيـام
وعيونهـا ممّـا تكـنّـه حزيـنـه
يعرض لها الماضي مثل عرض الافلام
لماضـي ابـوه وغـلاه وحنيـنـه
يرجيه لـ سنين القسـا درع وحزام
وجنـب ٍ علـى صكات بقعـا يعينه
ابـو ثلاث أعـوام والا 4 أعـوام
يغار منـه البـدر مـن كثـر زينـه
صلّى وجاء وأمر الله اللي قضى تام
ماهـوب داري عنـه زينـه وشينـه
بشتـه عليـه مهنـدم ٍ خيـر هنـدام
واللـي بـ عمـره كلهـم محترينـه
يوم اطلعوا للشارع انقسموا أقسام
وأهم مـافـي القـصـه ؟ ملّعبينه
تداعـب رموشـه ذعاذيـع الانسام
ويابردهـا يـوم آيبـسـت شفّتينه
وعلى تراب الأرض بأصبعه رسّام
أمـا رسـم لـه طيـر والا سفينـه
العيد طعمه كان في الشارع العّام
ماهـوب عـن رغبـاتـه مقيديـنـه
رجـع ولكـن فرحتـه ضايعـه دام
كل ٍ مشـى وأخـذ ولـده بـ يمينـه
صاروا خواله في نظر عينه اصنام
آحيـوا بـ داخلـه الجـروح الدفينـه
ولا عنده الا أمـه وناب القهر سّـام
جاهـا يبـي منها اليـديـن الأميـنه
شعوره اللـي حـس به مثل الإلهام
وأول سؤال في باله أبـوي وينـه
سؤال لكـن كان مثـل النبا الهّـام
لازال باقـي فـي المسامـع رنينـه
جته تعـدي ماهو تخّطي بالاقدام
وشالتـه بيديهـا وحـبّـت جبيـنـه
أبوك جاء البارح وقبـل الفجـر قام
وشرى لـك ألعـاب وهدايـا ً ثمينـه
تراه حبّك وأنت غارق فـي الاحلام
وراح لـ دوامه والشغـل مرسلينـه
لحظه وهو بيـن الحقايـق والأوهام
والدمـع الازرق حايـر فـ مقلتيـنـه
يمّـه تـرى مانمـت والعالـم نـيـام
ماجـاء ولا لمسـت يدينـي يدينـه
مدام رقمـه معـك مـن بيـن الارقـام
بـ أكلمـه يـوم إنـك تكلميـنـه
طاحت ماكن آلها من الصدمه عظام
ولاعـاد فيهـا صبر ولا سكيـنـه
قالـت بـدون شعـور وإدراك وإلمام
أبـوك فـي تـراب القبـر دافنينه
العام مات ومـتّ مـن موتـه العـام
وكنـي بعد ما مات عنـي سجينه
أبـوك جنـدي للوطـن ضد الإجرام
عـطـاك عـمره دون داره وديـنـه
تفجّـرت مـن تحـت رجلينـه ألغام
ولاعاد لي بعـده حصـون ٍ حصينه
بكّت وطاح الدمع مـن حر الآلآم
وبكى وطاح الكون من مـوق عينه
كـل ٍ عذلها بيـن عاتـب ولـوّام
تصّبـري خلي ضلوعك متينه
ماهو صحيح ان الضروره لها احكام
اكبـر خطـاء يـوم إنــك تعلمينه
بكره تنسّـيـه الليالي والايـام
هو فيـه أحد ينسى حـدا والدينه
طير السعد فـي عالمه مابعد حام
والله يعـلـم وش تـخـبـي سنينه
أنـا كذا ساكـت وصابـر ومنضام
لكـن كـان الفـرق بيني وبيـنه
الدمـع لـ عيـون الأرامـل والايتـام
ودمـع الرجـل ذل وهـوان وغبيـنـه
مجهول
