آسعار المواصلات بماليزيا -تجربتي وبعض الآحداث- البرية والجوية حياكم حبيباتي

ا

السلام عليكم ورحمة الله وبركاته
شلون البنات الحلوين مرتادي هالقسم عساكم كلكم بخير:eh_s(7):
طبعا آنا اليوم الصبح او الفير وصلت من ماليزيا كانت رحلة حلوة وممتعة بكل المقاييس اللهم لك الحمد ربي حبيبي باركلنا

طبعا بتقولون هذي شفيها مستعيلة توها رادة وبتكتب موضوع هههههه
بس السبب اللي خلاني اكتب اهوا حرة القلب من موضوع بهالقسم كاتبينه عن المواصلات توني اشوفه والله شكله ريال وراعي تكسي حاطه مفروض يحذفونه
كاتب اسعار امبي شي مو طبيعي استغلااااال واحنا يا غافلين لكم الله
بنات كنت حاطة الموضوع هذاك كمرجع عندي وقايلة حق ريلي خنطالعه كل شوي لحد يستغلنا آثاري الموضوع اللي حاطته مرجع اهوا الاستغلال بعينه وعلمه!!
بنات تدرون شنو مشكلتنا؟ الحمدلله تبارك الله احنا ديرة عز وبنات عز والفلوس تحت ريولنا ماتهمنا وين نقطها عشان جذي مايفرق ويانا شكثر نقط عالتاكسي ولا غيره واكيد بتقولون مثل ما إنا قلت بقلبي آنا بالطقاق وفدوة راحتنا كلها جم دينار يوم نحسبها هذول اللي نقطهم بالجمعية ولا نعطيهم عيالنا يروحون البقالة

بس والله تبون الصج؟؟؟؟

إنا اللي خلاني حريصة عالمبالغ وان ماينقص علي شيين:
الآول: إنا كره حياتي وعقدتي بالدنيا احد يستخدمني اداة حق مصلحته ويكون استخدامه لي استغلالي
اكيد كلمن يبي مصلحته لكن الاستغلال والاستغفال والجذب اللي يجذبونه علينا هالشي إنا مارضاااااه إنا كرهي اطلع مقصة جدام احد سواء ريلي ولا غيره ماحب الغباء مولية


والشي الثاني :
بنات ريلي مسكين اهوا اللي كان يدفع وإنا ماحب استغله لو فلوسي جان يمكن ماكنت عليها حريصة كثر حرصي على فلوسه اخاف الله يحاسبني واهوا مسكين يقولي فداج مو مهم هالجم فلس بس إنا وربي الشاهد ماااااارضى ربي فوقي وانا اعرف ريلي كلما قدرتيه يقدرج زيادة فحيل حرصت على هالنقطة
وبيني وبينكم عقدتي آني اطلع مقصة اهي اللي طغت على كل شي فكنت ادقق بالاسعار

هذي الاسباب الخاصة فيني آما السبب الاهم حقكم بنات عشان تستفيدون والله الاستغلال بكل مكان شي يبط الجبد علبو كويتيين ولا عرب يدفعونا ولعلمكم كل تاكسي تركبونه يسآلكم انتو من وين بس يسمع الكويت يقول اوووه آلوت اوف اويل يعني شكثر نفطكم صارت فينا جريب ال3 مرات وشكثر قالولنا عملتكم مرتفعة حييييل وانتو اغلى عملة بالعالم ومن كثر ماهي غالية مانصرفها تخيلوا
فخليكم واعيين


امبي قرقت مخكم سوري بس هذي مقدمة طويلة نوعا ما عشان تفهمون حيثيات الموضوع النفسية هههههه

الحين نيي للآرقاااااام واهيا اهم شي:

آول نقطة الطيران:

حجزنا على طيران الخليج تقريبا قبل السفرة بسهر ونص وكانت التذاكر رخيصة حيل إنا وريلي 280 تقريبا وكنت انا وايد مستانسة علبو كنا حاطين ميزانية 450 حق التذاكر فقلت نقط عالفلوس عالسوق

طبعا سبب اختيارنا للخليج ريلي يكره الكويتية وانا ماعندي فكرة عن الطيران قريت عن الماراتية والقطرية وقالوا احسن الجميع دشيت سايتهم شفت اسعارهم قلت اوكي ويناسبون الميزانية اللي حطيناها وعقب شفنا الخليج استغربنا من السعر كلمنا واحد من اهلنا قال طياراتهم كلها يديدة واقدم طيارة 2008 وممتازين قلنا ماشي دام فرق بالسعر بدون سبب واضح عادي ناخذ الارخص

ركزوا بالياي
بنات بيووووووم سفرتنا حطوا الف خط تحت كلمة بيوم سفرتنا دقوا علينا الخليج الظهر ولا الصبح نسيت وقالولي طيارتكم تكنسلت عندنا مشكلة !!!! انا ويهي :rgewrg::rgewrg::rgewrg:
وغلطة حياتهم دقوا ع ريلي وقوموه من النوم
بنات ريلي انجليزيته عادية ايام الجامعة كان اييب سي بس يسولف بكلمات بسيطة وانا الحمدلله انجليزي توب بس والله هذاك اليوم ريلي انطللللق بلبل بلبل والله زفهم زففففففف انا انصدمت منه لووووول:krkrkr::krkrkr::krkrkr:

قبل السفرة ب10 ساعات قرروا يكنسلون @@
والله انقبض قلبي وضاقت خلوقنا قلت حق ريلي عطني السماعة لان قالت تبون نكمل ولا نكنسل
قتلها شنو اجراءات التكنسل؟ قالت نكنسلكم بلاش لان الغلط منا قتلها ماشي كنسلي
وطبعا قالولنا فلوسكم تردلكم من 3 اسابيع لي 4 قلنا حلفوا بس هم انتو مآخرينا هم عقب شهر تردلنا فلوسنا! قالوا اجراءات البنك المهم قلنالهم استعيلوا قالوا ماشي نحطكم حالة خاصة

طبعا نسينا السالفة من كثر ماكنا مستانسين بجمال لنكاوي وقلنا طاف يبا دفعة بلا بس خلتمشي امورنا ولافجآة بثالث او رابع يوم سفرة نزلت الفلوس بحسابنا واستغربنا من من وين ولانتذكر حركتهم قلنا اييييي الخلييييج لا عااادت والله !

طبعا بيوم السفرة قلت حق ريلي جيك بسرعة ولا الاسعار نار لان بنحجز بنفس اليوم اللي 700 واللي 800 مادري شلون ربي آلهمني قتله دش الاتحاد ولا جم السعر بنات؟ 376 طلعوا مسوين عرض
شنو ارتحت بنات قتله فووووقة
حظنا كان حلو كانت فترة عروض عندهم واللهم لك الحمد تسهلت الامور يعني فرق 100 بس عن طيران الخليج الفقر

بس كان الحجز الساعة 5 العصر وكان جدامنا 3 ساعات فقط
بنات إنا كانت صايرتلي فترة ايمع الاغراض ملوت السفرة واحطهم يم الجناط وكنت بس مسفطة الهدوم جريب اسبوع وانا بس آلملم بالاغراض بدون ماحطهم بالجنطة من العيز والكسل
من صارت السالفة وربي بربع ساعة كل شي دش بالجنطة خذيت وياي جنطتين كبار ووحدة وسط بسرعة البرق ضبيتهم :krkrkr::krkrkr::krkrkr:

طبعا بنات يمكن تقولون ليش مارحت ثاني يوم ويا الخليج وليش حجزت عند غيرهم؟
السبب ان احنا بنخسر وايد اشياء اولهم يوم كامل بيروح علينا بالمنتجع اللي كنا حاجزينه واهم شي الطيران الداخلي بيروح علينا لآن كنا حاجزين للنكاوي
وطبعا الاهم احنا كنا حيل متحمسين ان بنسافر يميع اول سفرة وناسة وشهر عسل لان قبلها كنا رايحين الحج وتعرفون الحج تعببببب وعبادة وهذا شهر عسلنا فحدنا انحبطنا


الحين ننتقل ثاني نقطة بالطيران الجوي:

الطيران الداخلي

بنات كانت خطتنا ان اول شي نروح لنكاوي الجزيرة الجميلة وعقب كوالالمبور وجنتنغ وهالسوالف
فقررنا نحجز بالنت للطيران الداخلي لآن كل حجوزاتنا بالنت عروضهم احلى واقوى وهم محد يستغلج مثل السفريات

الداخلي قررنا نروح على Air Asia على مدح البنات بالتقارير وطلع في مشكلة مايحجزون من كروت بيت التمويل مادري ليش
فقررت بس هالخطوة البسيطة نحجزها بسفريات
راح ريلي سفريات بالديرة نسيت اسمها بس يرد بسئله عنها

قالنا الشخص ب40 تذكرته روحة وردة وآكبر وزن اللي اهوا 30 كيلو
واحنا اذكر كنا حاسبيها الشخص ب32 جنه فكلش الفرق مو ملحوظ والصراحة اشترينا راحتنا مالنا خلق نعابل فقلناله اوكي

طلع علينا إنا وريلي ب80

هذي بعض المعلومات الاضافية عن الطيران الداخلي:

تقدرين تتحكمين بمقعدج وتحجزينه بالنت
تقدرين تطلبين وجبة وتحجزينها بالنت
تقدرين تنقين الوزن اللي وياج من 10 كيلوات لي 30 وهذا اقصى حد
تقدرين تطلبين حماية من عندهم او شي متعلق بالصحة

طبعا كل نقطة من النقاط السابقة لها سعرها احنا نقينا بس الوزن لآن جناطنا ثقال وكنت خايفة ان اتحسف على باجي الخيارات وقالي ريلي خنجز بس اذكر خالي كان ويانا واهوا يشتغل بالمطار ويسوي الرحلات حق الشخصيات المهمة والشيوخ فقالنا سمعوا مني مايسوى وعقب الحمدلله اكتشفت آن كان اختيارنا موفق للاسباب التالية:

بالنسبة للمقاعد ميزة طياراتهم يطلعون من ورا وجدام والطيارات الداخلية نتفة فكللللش ماطولنا بالطلعة ثواني الا احنا طالعين من ورا
واصلا كلما رحتي قصيتي البوردنج ابجر يعطونج اماكن احسن واهما بوردنجهم بمكينة يسوونه

وبالنسبة للوجبة ولاااااا راكب كان قا ياكل فآشوة الحمدلله ماطلع شكلنا غلط وشذينا عالاوادم
وبيني وبينكم وجباتكم مادري شنو طعمها

وبالنسبة للحماية مادري الصحة طلعت السالفة فيها شركة تآمين والسالفة يمكن فيها حلال وحرام فطلعنا منها

وهذي المعلومات اللي اقدر افيدكم فيها للرجلات الجوية وترقبوا الرحلات البرية بالتفصيل من وين لي وين بس بقول الاسعار واشياء بسيطة بدون سوالف لآن طاحت ايدي وانا اكتب وصدعت راسكم بعد هههههههه


بنات مابي منكم شي بس ادعولي الله يحفظني انا وريلي ويبعد عنا عيون الناس