روايتي الاولى ( دمـــعـة شــقى )

السلام عليكم بناات

انا من 21-2-2011 كاتبه روايه و ودي اعرضها عليكم
ابي رايكم لاني ما كملتها كلها ما تسوى اكملها اذا كانت مو حلوه
فا راح انزلها على اجزاء اذا عجبتكم راح اكملها لكم ..
بس بلييييييييز ابي ارائكم عشان يصيرون حافز اني اكملها ..
قصتي قصه حب .. حزن .. وفاء
و للعلم اول مره اكتب روايه لاني اعشق الروايات قلت اجرب بنفسي و رفيجاتي و اهلي قروها و شجعوني بس باقي تشجيعكم بليييززز :eh_s(22):

اخليكم مع الروايه

الجزء 1

بسم الله الرحمن الرحيم

الحياة مغامرة وتحتوي على مشاكل و حلول بس يا ترى حياتي لها حلول؟
بعرفكم بنفسي انا شاب اسمي مشعل كنت ادرس ببريطانيا طب مع نخبه من الطلبه و الطالبات.. بقولكم قصتي من البدايه للنهايه و بالتفصيل برجع بذاكرتي سنين ورا ..

في يوم من ايام عطله الاسبوع في بريطانيا ..
مشعل:حمود دق على يسوف السخيف شوفه ليش مايرد علي عيزت وانا ادق عليه قوله بيبلش الفلم و اهو للحين ما وصل!
حمود: كلمته bbm يقولي الشارع واقف و توه يمشي ..
مرت ساعه و ماكو لا حس ولا خبر عن يوسف الي كان مواعدهم عند السينما علشان يتابعون الجزء اليديد من فلمهم المفضل.. وفجأه اتصل رقم غريب..
مشعل: HELLO?(السلام ؟ )
الرقم:Mr.Meshail? (سيد مشعل ؟ )
مشعل:Yes,who's speaking? (نعم .. منو يتكلم ؟ )
الرقم:IT's the hospital.. can you come, please? (المستشفى.. ممكن تيي لو سمحت ؟ )
مشعل: What's wrong?( شصاير ؟ )
الرقم:There is some friend of you has make an accident,please come quickly.good bye! ( رفيجك مسوي حادث ... لو سمحت تعال بسرعه , مع السلامه! )

قال مشعل و الصدمه و التعجب واضحين على ملامحه: حمود بسرعه ابيك توديني المستشفى في شي صاير و يبوني ضروري
حمود:مشعل بسمالله عليك فيك شي ؟ مصخن ؟ أي مستشفى أي بطيخ مصدق عمرك انك دكتور ؟
مشعل:حمود بتوديني ولا اركب تاكسي ؟
حمود:يالله اوديك بس تقولي شصاير بالطريج اوكي؟
مشعل:انت ودني الحين ويصير خير

وصلت المشتسفى و سألت الدكتور عن سبب استدعائي و قال:I'm very sorry..your friend is dead !! ( انا اسف جدا .. رفيجك مات !! )
مشعل:What friend ? Who are you taking about ? (أي رفيج ؟تتكلم عن منو ؟ )
وكانت كل معاني الصدمه على وجه حمود واهو يأشر على زجاج غرفه العمليات الطارئه و دموعه تنزل بكثره ولا.. يوسف!!
رفيج عمري و دربي و صديق الطفوله يغطون وجهه بالقماش الابيض والي يدل على ان رفيجي و اعز انسان على قلبي و الي ماقدر استغني عنه مهما صار غاب عني و عن الدنيا للابد ! .. افترت فيني الدنيا من صدمتي مالقيت كلام يعبر قمت ابجي بدون شعور .. اصرخ اقول ما ماات ! لالا يوسف ما مات مستحيل يمووت الحين يوسف بالطريج رايح السينما الحين اهو اكيد وصل هذا مو يوسف لا مو يوسف .. حموود قولهم هذا مو يوسف رفيجي يوسف الحين بالطريج رايح السينما صدقوني و غبت عن الوعي..
___________________________________

بعد 3 سنوات من مجيئي الى الكويت بعد ما تركت دراستي بسبب الكوابيس الي اشوفها و تشتت ذهني بعد ماشفت جثه يوسف المقطعه و الدم الي عليها بغزاره كان شكل مرعب جداً ما اتصور احد وده يشوف هالشكل .. قطع حبل افكاري رنة الجرس
ميري:sir meshail there is a girl in the door wants you (سيد مشعل في بنت عند الباب تبيك .. )
وحده تبيني انا ؟ شتبي فيني؟ ومنو هذي ؟ معقوله تطلع وحده من التعليم العالي تبيني اكمل دراستي ؟؟ لالا ما اظن .. كل هالاسئله كانت تدور ببالي..
مشعل:let her in ( دخليها )
عدلت قعدتي و رتبت شعري عالسريع و كان شكلي يوحي بالحزن و الاكتئاب و المرض و الحاله السيئه..
سارة:السلام عليكم انا آسفه على الازعاج
كانت بنت في ربيع العمر مابين 17-20 جميله لحد ما و شعرها القصير الي معطيها اشراقه حلوه و كانت قصيره و معتدلة الجسم ..
مشعل: لا ما من ازعاج حياج الله بس منو معاي ؟
سارة:انا سارة .. ارتبكت و كملت كلامها: كنت ادرس ببريطانيا و الحين رديت الكويت بعد ما خلصت الثانويه .. و بدت تبجي و كانت دموعها نهر جاري : انا السبب بموت يوسف انا السبب !!
مشعل:يوسف ؟!! انتي كنتي تعرفين يوسف؟
سارة:شلون ما اعرفه .. كان احسن طالب و خلوق والكل يحبه لدرجه ان ربعي فضلوه علي و نسوني و هالشي كان يخليني اغار منه .. فا طلبت من واحد من زملائي يتخلص منه بمعنى انه يكرهون الناس فيه ماكنت ادري انه بيفهمها ان يذبحه !!!
مشعل : يذبحه !!! ....
ساره : ارجوك اسمعني للاخر بعدين قول الي تبيه .. مشعل يوسف كان خطيبي .. خطبني و وافقت كنت بعلقه فيني بعدين اكسر قلبه بس اهو الي كسر قلبي و فصخ الخطبه عشان وحده غيري قبل الحادث بجم يوم عشان جذي طلبت ان يتخلصون منه كل هذا بسبب حقدي و غيرتي و كرهي له ..
ما عمره ضرني بشي انا الي خربت على عمري بس لما فصخ الخطبه كنت بحسسه بغلاتي و ان راح يتحسف .. مشعل والله مو قصدي !!
مشعل : و يايتلي بنفسج و عينج قويه !! انتي تدرين شنو يوسف بالنسبه لي !! براا براا ولا ادق على الشرطه ياخذونج .. براااا
طلعت واهي تبجي و تركض من بعد هذا اليوم ماسمعت عنها خبر ..
كان هذا اليوم مثل الحلم المرعب او الكابوس المزعج الي يراودني بين كل فتره و فتره ..
___________________________________
في يوم من ايام الصيف الحاره كنت اتمشى على البحر مع حمود الي من بعد الحادث صرت ما افارقه بسبب خوفي اننا نفترق بيوم من الايام ..
حمود:مشيعل من صجك انت ترا صار 3 سنين وانت للحين عايش باكتئاب , انت مو شايف شكلك والله مشعل انت كنت شخص و صرت شخص ثااااااااااااااااني غير غير غيييير
مشعل: يعني حمود شتبي اسوي ؟ انسى يوسف بسهوله ؟ مستحييل !!
حمود : مشعل انا عمري ما قلت انساه بس اهتم بروحك شوي .. انت تدري من وفاة ابوك وانت ريال البيت قولي امك شلون بتعتمد عليك وانت بهالحاله على الاقل تعدى هالمرحله موع شاني عشان امك و اخوانك على الاقل .. و حتى لما توفى ابووك ما سويت جذي شدعوه مشيعل والله حاس بس مهما صار حاول تتناسى الموضوع شوي .. الدنيا مو واقفه على احزاننا وانا اخووك ..
مشعل : ان شاء الله بس عطني فتره شوي وان شاء الله ارد مثل اول و احسن
حمود: أي كفو هذا الكلام الزين

بعد ما رد مشعل البيت يحاول ان يغير من نفسه ..
مشعل : صارلي جم يوم مو شايف امي .. انا وين والمسؤوليه وين خل اروحلها اونسها شوي
طقيت الباب و ردت امي : ادخل
مشعل : هلا يما عسى ما ازعجتج ؟
امي : لا والله هذي الساعه المبارك هالي تييني فيها .. يما وينك ولهت عليك جم يوم ما شفتك .. تدري فيني مريضه و ريلي مو شايلتني ماقدر اييلك حبيبي انت ولا جان ييتك ..
مشعل : يابعد جبدي يا يما بس شوي كنت تعبان .. يما انا قررت اغير من نفسي و ارد مثل اول ولا شرايج ؟
امي : يا بعد قلب امك أي زين تسوي يما يالله بس اشوفك مستانس مره ثانيه ولهت على ضحكتك و غشمرتك الي يملون البيت .. وقول امين ..
مشعل : امين
امي : عسى الله يرزقك ببنت الحلال تتزوجها و تنور دربك و تترسلي البيت احفاد ..
هاااه .. زوجه .. انا اتزوج ؟ مر الوقت بسرعه و نسيت الزواج و شايل هالفكره من راسي .. بس ولو عشان امي بدور البنت الي تناسبني .. ابي اونس امي مالي بالدنيا غير رضاها ..

____________________________________
بعد فتره طويييله غيرت من نفسي و رديت مثل اول شاب مهتم بشكله و منظره و اخلاقه و اجتماعي و غشمرجي و رديت حق ربعي الي قطعت علاقتي فيهم من يوم الحادث و صرت مشعل الاولي .. بس شنو الخطوه الثانيه ؟
انا ببدايه قصتي ما وصفت نفسي.. عشان تعرفون عني كل شي
اسمي مشعل طويل جسمي رياضي اسمر السمار الحلو عيوني كبيره عسليه حاط قفل و سكسوكه و حواجبي عراض و مقرع ماعتبر نفسي جميل بس شكلي جذاب ..
و حمود اقصر مني شوي ابيض خشمه سلة سيف عيونه صغار و حاط قفل و عنده غمازه بخده اليسار و لون شعره اشقر مايل للبني و على قولته ( انا براد بت يغار من جمالي) بس ماكان مغرور على غشمره يعني و كان واااااااايد يتغشمر
و يوسف اااخخ يا يوسف مشتاقله .. كان جميل بشكل ما يتصوره احد .. دمه خفيف كان لونه حنطاوي و عيونه عسليه فاتحه و حاط قفل و عنده حبه خاله على حنجه كان لون شعره اسود لون الفحم و يجذب كل الي يشوفه ..
____________________________________
دشيت المخيم الي كانوا متفقين ربعي ان نتلاقى فيه بكل يوم خميس من عطله الشتا .. سلمت على الموجود و اهما : خالد , راشد , يوسف اخوي و مشعل اخو يوسف ( ابوي و ابو يوسف كانوا ربع فا سموا عيالهم نفس الاسامي و صرنا انا و يوسف ربع و يوسف اخوي رفيج مشعل اخو يوسف المرحوم ) و مجموعه من الشباب
مشعل : قوه شباب
الشباب بصوت واحد : الله يقويك
راشد : أي اليوم مباراة برشا و الريال .. مشيع لانت مع منو ؟
مشعل : انا مع الريال حبيبي .. في السراء و الضراء
راشد : ايييييييه خلهم ينفعونك
قعدت اسولف ويا الشباب ليما خلصت المباراة و الفوز لصالح البرشا 0-5
راشد : مشيعل قلتلي ريال مدريد هاا .. واااااااك !
مشعل :مو قلتلك في السراء و الضراء رشود لا تحاول .. شباب انا بطلع بره اشم هوا .. حمود انا بخلي بوكي و فوني عندك دقايق و راجع بس بشرب زقاره و راد ..
_________________________________________
ما احس بنفسي .. انا وين ؟ ليشم وقادر اتكلم .. ااااااه جسمي كله يعورني .. و فجأه صحى مشعل و لقى نفسه بالعنايه المركزه ..
منو الي يمي ؟ بنت بس منو هاذي وليش نايمه عندي و لي شانا هني ؟ منو يجاوبني !!!
فزعت البنت بعد ما حست انه قام
ريم : الحمدلله على السلامه عسى مافيك شي انا اسفه دعمتك بالسياره بس واله مو قصدي انا اسفه كان ظلمه و ماشفتك والله ..
وكانت تبجي بحسره والم .. بس انا نسيت الالم والعوار من شفتها .. مرات اييلنا شعور لما نشوف شخص تقول هذا الشخص الي ابيه يشاركني حياتي .. كان جمالها غريب .. جميله جميله جميله ما شاء الله !! .. جمالها فتان .. بدون شعور ابتسمت و حاولت اتكلم لكنها امنعتني ..
ريم : لا تتكلم انت مو قوي كفايه عشان تتكلم
قعدت ابتسم و شافتني و سرحت .. بعدين تداركت روحها و قالت
ريم : نسيت اعرفك بنفسي انا ريم خالد الـ.......... انا دعمتك بالمخيم كان الوقت متأخر و ظلمه ماشفتك و دعمتك على طول يبتك المستشفى بس ماكان معاك أي شي عشان نتصل على اهلك او نعرف عنك شي .. اذا تقدر تعطيني رقم احد اتصل فيه ابلغه انك هني ..
عطيتها رقم حمود و اسمه و اتصلت فيه
ريم : السلام عليكم .. اخ حمود ؟ معاك ريم .. ممكن تيي مستشفى الـ.......... جناح 2 غرفه 5 خصوصي .. أي ضروري .. تعال و تفهم كل شي .. مع السلامه
مشعل : ريم انا اقدر اتكلم .. مو لي هالدرجه تعبان
ريم : تكفى يا ..
مشعل : مشعل .. اسمي مشعل


يالله بنات ابي رااايكم بلييييييييييييييز