تقرير عن ماركة beyu بالصور والاسعار،،، من تجربتي

بنات انا جم مره اقول حق نفسي لا ادش هالقسم وتحكني ايدي وادش ؟؟ :eh_s(4):
هالقسم يحرضني على الفسق والفجور
و اقعد اطلب من التاجرات حتى لو عندي نفس المكياج
واتشوق اروح للسوق حتى لو عندي اكتفاء ذاتي و زياده
انا اطالب باغلاق هالقسم ياجماعه مايصير جذي ليمتى
خخخخخخخخخخخخخ

ينات انا اليوم موضوعي عن ماركة بيو beyu الالمانية !
هالماركة ناجحه على كل المقاييس وبدت تسوي غزو على اغراضي وانصدمت بان ثلث ترباع مكياجي منهم
ويابنات كل الي بحطه لكم اهني ياي من تجربه شخصية لي ،
لان مستحيل اتفلسف على مستحضر وانا مادري شلون صاير وتالي ابتلش فيكم :D
خخخخخخخخخخخ :

مميزات هالماركة،، على قد ماهيه جودة عالية، على قد ماسعارها مناسبه، اغلى منتج مايتعدى ال10 دنانير!!!!

اولا نبلش بالاساس :
* هذا الفاونديشن استعمله من سنة 2009 !! وبالمختصر المفيد روعه
والحلو فيه ينفع للاستخدام اليومي والمناسبات لانه يسوي تغطية كاملة !!!!
سعره 6 دنانير،، عمر بشرتي ماشتكت منه .. لا حبوب لا خطوط لا تنشف للبشره ولا شي!!
وعلى فكرة ترى خالي من الزيوت بعد، ويعطي الملمس المخملي للبشرة وانعكاس طبيعي للاضاءة
http://www.ideaalkosmeetika.ee/sites...yu_400x400.jpg

* هالفاونديشن اسمه light reflecting واتوقع اسمه يبين مهنته !!
تركيبه هالفاونديشين فيها شي مثل الجلتر، لمعه خفيفه .. تعطي على اللون الؤلؤي تقريبا،
تحت الاضاءة تنعكس ، ويعطيج لوك تقريبا مثل لمعه الفازلين، ويبين مكانه على الخدود اكثر شي
ينفع للمناسبات وللتصوير، لانه انعكاساته تعطي ايحاء ان لج خدود وبشرتج صافية.
سعره 7 دنانير
http://www.ideaalkosmeetika.ee/sites...foundation.jpg


* وهاذي الكومباكت بودر، قوامها سميك ومتماسكه حيل وماتنشف الويه الوايد
سعرها 5 دنانير اذا ماخاني الظن،، لكن الحق ينقال، بهالمجال اهيه مو الافضل
ماركة استي لودر و كوليستار و قيرلان ، عندهم الافضل خصوصا حق الي يقدسون البودرة
اما الي نفسي، البودرة يعتبر شي ثانوي .. فـ بيو تعطيكم حل ممتاز وجودة عاليه باقل الاسعار.
http://www.beyu.net/imggen/product/b...powder_1_1.png



* وهذا الكونسيلر مالهم ، والحلو فيه انه مو دفاشه .. لان احنا مودايما نبي كونسيلر ثجيل خصوصا حق المناسبات العادية
او الطلعات .. او الي ساكنين عند حمولة وتبي تنزل عندهم تحت ...
كونسيلر تغطيته ممتازه وطبيعيه وممكن تزيدين عليه حبيتين ويعطيج كونسيلر ثجيل ..
سعره يا 3 دنانير يا 4 دنانير ..
http://www.beyu.net/imggen/product/c...oncealer_2.png


الحين خلصنا من الاساس،، نيي على العيون :
ببلش بالشدوات ... والله ثم والله يابناااااات ، انا لمه شريت العلبه الي فيها ثلاث الوان كنت بجرب بس
وماكان املي فيها جبير يعني قلت ماركة يديده والمانية،، شراح تقدم لنا مثلا ؟؟ بتقايش شارمل يعني؟؟
انصدمتتت صدمه عمري يوم خذيت الفرشه ، ومن كثر استهزائي فيها كثرت الي بالفرشه لان ماتوقعت اللون يصير قوي
وبطلت حلجيييي يوم حطييت على عيونيييييييي !! مشالله عليييييييهم لونهم كثافته قوية قوية قوية بشكل مو طبيعي
اللون الي تشوفينه بالست اهوه نفسه اللون الي راح يكون على عيونج ، نفس الكثافه ومايحتاي تزيدين حتى
انا ابتشلت وقمت اخفف واخفف بالكلينكس لان صدمني ماتوقعته جذي !!!!
الالوان الي جربتها :
http://www.beyu.net/imggen/product/b...hadow_19_2.png
http://www.beyu.net/imggen/product/b...hadow_49_1.png
http://www.beyu.net/imggen/product/b...eshadow_29.png
http://www.beyu.net/imggen/product/b...eshadow_40.png
بس بفرع الكويت بتشوفون ان العلبه شوي غير، يعني اطرافها مربعه لكن نفس الالوان ...
سعر الحبه بــ 4 دنانير

* وهم اكو نوع ثاني للشدو الي اهوه آي شادو ستيك ، الاقلام الكريمية
وخل يسمحوولي كل الماركات .. محد يناقس بيو بهالمنتج!!!!! جربت اكثر من ستيك من كذا ماركة
لكن عند بيوو قلت ستووووب !! وصارت ماركتي الاولى بهالمجال ،،
الالوان وايد روعه وثابته ومقاومة للماء، ووتوفر على حجمين، اكو الحجم القلم العادي و اكو الحجم العود
http://www.pinkmelon.de/wp-content/u...adow_stick.jpg
انا خذيت منهم اول ثلاث الوان ، واللون الفستقي والبنفسجي !!
تبون الصج؟؟ حدهم دمااااااااااااار @@
زوجي الي اهوه زوجي الي مايعرف بالمكياج شي، لمه شاف اللون الثالث حاطته على كل جفني
انبهر قعد يقولي صكري صكري عيونج خل اشووف :D
القلم الواحد سعره 3 دنانير او 4 ،، بهالحدود


* اما بخصوص الماسكرا و الايلاينر :
بالنسبة للايلاينر جربت اثنين منهم ،،
اولا هذا :
- الي عجبني بهالكحل انه ريشته ممتازة ومصممة عشان تعطيج خط اضعيف او عريض ، على حسب الاستخدام
سواده حلو لكن مو الافضل من هالناحيه ،، في الي احسن من ناحيه السواد .
بالنسبه لي الافضل من ناحيه السواد ماركة دييقو دالا بالما وماركة قيرلان وايفا قاردن
لكنه عملي وايد ،، وينفع للمناسبات البسيطة الى متوسطة و الطلعات ، وسعره 3 دنانير !
http://www.beyu.net/imggen/product/c...yeliner_10.png

والكحل الثاني هذا :
الوصف ينطبق على الي قبله لكن الفرق اهيه الفرشة،، وايد ضعيفه ومصممه حق هالشي
واستخدمها شخصيا لمه احط الرموش وابي امشي فوقهم كحل،، هالفرشاه لانها وايد وايد ضعيفه
تعطيني مرونه بالاستخدام وتخليني اعبي الفراغات بالاماكن الي صعب الفرشه العاديه توصلها
http://www.beyu.net/imggen/product/b...ye_liner_1.png


اما الماسكرا :
جربت منهم نوع واحد وحييييييييل حبيييتها ،،، ترتب الرموش وتعطي كثافه وانحناء ولونها حيل اسود
سعرها مابين ال5 و 4 دنانير
http://www.ideaalkosmeetika.ee/sites...ra_400x400.jpg


* بخصوص الحمر والمحددات :
بحطلكم اخر اربع الوان اشتريتها من بيوو ،، وعشان تفهمون اكثر وتفرقون
بيو تقسم حمرها الى نوعين، هايدور ستار ولبستك ستار ،، النوع الاول طبي ومتتاز اما النوع الثاني عادي
http://www.beyu.net/imggen/product/h...pstick_467.png
http://www.beyu.net/imggen/product/h...pstick_426.png
http://www.beyu.net/imggen/product/f...pst_off_59.png
http://www.beyu.net/imggen/product/b...ick-72_off.png
اما اخر لون شريته كـ هاي لايت لاول حمرتين حطيتهم ..
الحمره الوحده بـ 4 ،، اول ثنتين يعتبرون حمر طبيه ، فيها نسبة ترطيب عاليه وتعالج تشققات الشفايف ونتايجها اتبين من بعد 30 يوم بحيث ان النسبة الطبيعيه للترطيب بالشفايف تزيد 22%
واهيه شبه ثابته ،،
اما اخر ثنتين فاهمه عاديين .. يعطون لون قوي، لكن نقاوتهم مو مثل النوع الاول
للاسف ان النوع الاول مافيها الوان صارخه تنفع للمناسبات ،، كلها الوان هاديه وبسيطه


اما المحددات :
فعندهم هالنوع بس، قلم كريمي وممتاز لابعد درجة ليدرجة انه ينفع تلونين حلجج فيه وتحطين فوقه قلوس شفاف!
لانه كريمي وناعم حيييل ... فيه منه حوالي 25 الى 30 لون :
http://www.beyu.net/imggen/product/b...erlips_517.png
القلم الواحد اذا ماخاب ظني بدينارين



وبجذي انهيت تقريري عن هالماركة وعن الي جربته انا شخصيا منها --> شبقى وماجربتي