حلم جميل ~ | أرجو التفسير
السلام عليكم ورحمة الله وبركاته ..
عندي حلمين حبيت تفسرينهم لي اختي مفسرة الاحلام .
الحلم الاول ..
كأني كنت مسافره مع اهلي كلهم وتقريبا كانت الرحله حق مكه ,
كنا ساكنين في فندق حيل راقي وكشخه , انا طلعت من الشقة ووقفت عند الباب اول ماشفت قدامي , حصلت رفيجتي مها " صديقتي معاي بالدراسه واعرفها من زمن " رحت لها سلمت عليها , كانوا جالسين فالشقه اللي قدامنا , وقعدنا انا معاها عند باب شقتهم وسولفنا وكأنه درسنا مع بعض ,عقب تركتها ورديت الشقه مالتنا , وجا وقت العشا نزلنا بالفندق تحت حق البوفيه عشان ناكل , كان المكان كبير وكله طاولات وكراسي كانها صالة اعراس , تركت اهلي ورحت اخذ لي صحن وانا راجعه فالطريق , حصلت اخت رفيجتي مها قاعده على طاوله ومعاها واحد كأنه رجلها كان فالحلم " هي بالاساس البنت مو متزوجه " , انا استانست يوم شفتها وقفت وابتسمت قلت بقلبي اخيرا عايشه تزوجت , ورحت كلت مع الاهل عقب ردينا الشقه , كانو البنات كلهم يسولفون مع بعض وانا كنت جالسه عالارض جمب امي عند الشنط نعدل الاغراض , واحنا نعدل امي حطت بحضني صندوق هدايا وكملت شغلها , انا فتحت الصندوق وحصلت فيه ظرف صغير فتحته , كان داخله خاتم وسوار لونهم ذهبي وكان شكلهم حيييل جميييل , كأنهم شي غالي ومب من اي مكان , اول ماطلعتهم ع طول لبست الخاتم والسوار , ورحت وقفت بنص البنات وقمت اسولف معاهم وكلهم كانو يطالعون يدي من كثر ما شكل السوار والخاتم حلو , عقب بنت عمتي اضحكت الا تقولي من وين اللي بأيدج قلتلها مادري امي عطتني اياه وبس .
الحلم الثاني ..
كنت رايحه مع امي بيت رفيجتي اسمها مريم " هاذي رفيجتي بالدراسه وانا حيل معاها " , وصلنا انا وامي بيتهم وماكان فيه احد, امي قعدت معاي عقب قالتلي انتظريهم لمن يجون وراحت , وانا كأني كنت ابي اكلم ام مريم رفيجتي بموضوع او عندي شغل معاها كذا , المهم نطرتهم شوي عقب جوو وكان الوقت متاخر الساعه 11 ونص تقريب .. سلمت عليهم ورفيجتي كانت مستانسه ومتفاجئه بوجودي في بيتهم , قعدت مع امها فالصاله وكنت اسولف معاها كأنها وحده من خالاتي واعرفها من سنين , راحت مريم رفيجتي قالتلي بروح ابدل واجي , بدلت وانزلت وتمت تسولف معاي وهي واقفه عقب قالتلي بروح انام تعبانه وراحت , وتميت مع امها , " فالحلم ماكانوا كانهم ناس غرب لا .. كانهم اهلي " , وامي تاخرت لين ماجتني وجت خذتني ع 2 ونص فالليل ...
جينا اليوم الثاني بيتهم وكانو اهلنا موجودين كلهم وكأنه كان فيه عزيمه فبيتهم ووايد ناس والبيت زحمه وناس اعرفهم وناس لا .. تمينا قاعديين فالصاله عقب رحت داخل غرفه من الغرف فبيتهم وكانت داخل مريم صديقتي وهدى ومريم بنت عمها " هذول بعد صديقاتي فالدراسه " ومعاهم صديقتي اسمها عايشه بعد " للعلم عايشه امس كانت ملكتها يعني تزوجت " وفيه بنات ماعرفهم ... المهم عايشه رفيجتي كانت لابسه قميص ابيض شفاف وتحته بدي فيه دانتيل ابيض عليه ورود وشكله حييل جميل ,, قمت قلت حق مريم انا بروح البيت الحين وابيج تجيبين لي غراضي راحت مريم وجابت لي غراضي ومع الاغراض كان فيه كيس , قمت فتحته حصلت داخل بدي جديد نفس اللي كانت لابسته عايشه رفيجتي لونه ابيض وفيه ورود بيضه .. بعدين قمت وسلمت عليهم كلهم ولميتهم كل وحده بقووووه وطلعت وبس ...
ياليت تفسرينهم لي .. ومشكوره مقدما :eh_s(22):
