امنيتي الامومة

السلام عليكم

هذي اول مشاركة لي بالمنتدى

دايماً ادخل اقرا واطلع ووالله العظيم اني ادعي لكل وحده محتاجة لدعاء

المهم بدخل بالموضوع

ادري ان مابيدكم شي تسوونه لي بس انا اطمع بالدعاء

لان دعاء المسلم لاخوه المسلم بظهر الغيب مستجابة بإذن الله

لان المَلَك يقول امين ولك مثل ذلك
:eh_s(7):


------------------------------------------------------

بنات انا لعبت بنفسي قبل لا اتزوج ادري اني غبيه ومينونه ووديت عمري ب60

داهيه

شنو السالفه:bbbiu:

كنت متزوجه من شخص كل ما تأخرت علي الدورة لو يوم واحد استلمني بهذله

وطق على بطني يعني على ابو انه ضحك وغشمرة وانا عارفة له انه جذاب وحقير

وانه مايبي عيال

انفصلت عنه لانه واااااايد تعبني وبهذل حياتي وكبرني 30 سنه مع انه عمري بوقتها

19 سنه

تقدموا لي وايد وكلهم رديتهم واللي اهلي ما ايوزون لهم ولما تقدم لي واحد بعد

انفصالي عن الأول بخمس سنوات

وشفت انه اهلي موافقين وخلاص وعرسنا باقي عليه شهر تقريباً رحت ركضه عالدكتور

وقلت له انا لي 6 سنوات متزوجه وماحملت ( بالعربي جذبت عليه لاني خفت ان رحمي تقطع

بسبة طق الحقير قلت خل الحق على عمري)

سوا لي تحاليل كلها سليمه بس الحليب مرتفع عطاني علاج له اللي ينزل هرمون الحليب

وعطاني كلوميد وانا اخذتهم وقالي الجماع يكون يوم الجمعه وانا عرسي السبت قلت له

(هم هذي جذبه ان زوجي مسافر وبيرجع السبت قال عادي) ونسيت السالفه عقب العرس ولويته

بس كنت عارفه ان عقب العرس ب4 ايام اتييني الدورة بس مايت وطنشت الموضوع

وعقب قامت اتييني آآآآلااااام فضيعه بخواصري وبطني وظهري وجنه قمت احس تحت اخر بطني

في انتفاخ ع جنب واحد بس وكل ما اشتغلت بالبيت قمت انززززف قلت الله يلوع جبدج يالدورة

شفيج هالمره امبهذلتني جذي وقمت ما انام من العوار كله اصارخ وابجي وكله تعبانه وبموت

وويهي صار اسود محتقن والله لدرجة ان بنت عمة زوجي تقولي شفيج صرتي سمرا

رحت مستشفى لندن قالوا لي سوي تحليل حمل قلت سويت تحليل بول الله يعزكم مافي شي

قالت لا سوي دم سويت مافي شي قالت سوي هرموني وسويت والا الهرمون بالعلااااالي

قالت مبروك حامل وعطتني مثبتات وارجع البيت وارجع انزف بعد يومين سوت لي تحليل

ثاني قالت لي الهرمون زاد دبلات اقولها سوي لي سونار مو راضيه اسبوعين نوموني

عندهم وحيل ابر مثبته وتحاميل وانا اتقطططططع رحت حق نداء بو خضور سوت لي سونار وانا ابجي من اعواااار قالت الرحم نظيف ومافي شي خارج الرحم

عصب ابوي وقال حق زوجي بودي بنتي

لعمرو الصياد وودوني قالي حمل خارج الرحم وحرام عليهم هالمثبتات ولازم عمليه منظار حالاً

مت بجي انقهرت واحتريت ع روحي وماني عارفه شسوي ومو فاهمه شسالفه قلت مابي اسويها

زدت وبموت قلت خلاص اسويها وسويت المنظار وطلعوا البيبي فديته

ومن يومها وانا انطر الحمل ماحملت نطرت جم شهر عقبها بلشت علاج كلوميد وبلاوي وسويت

تلقيح صناعي مانجح ورحت لأم عبدالله اللي بالمنقف وعند ام مشعل العقيله ومحد منهم فادني

قريت البقره شهر كامل من نهاية الدورة لي بداية اللي وراها وماحملت بموت يابنات والله بموت

رحت العمره قلت يمكن ربي يبيني اتقرب منه اكثر وتوني من اقل من شهر راده من العمره

وانصدمت بعد ماصليت انها نازله علي

اي نسيت اقولكم سويت اشعة الصبغه الملونه اطلعت سليييييمه 100% والانبوبين سليمين

وما جنه مسويه عمليه ولله الحمد ما شا الله تبارك الرحمن ربي يجازيك يا دكتور عمرو الجنه



ذبحني كلام الناس وذبحني شوق زوجي للبيبي ولهفة امي بإنها تصير ماما عوده وانتظار ابوي

انه يكون يد, وخالتي كل ما كلمتني او شافتني قالت ها ما تتنسين :eh_s(16):

ياربي والله ماني عارفه شسوي

حلمي وأملي وامنيتي اصير ام

ابي احس بتعب الحمل ابي احس بألم الطلق والولاده ابي اشم ريحته ابي احضنه واضمه ابي اسهر

عشانه ابي يزعجني ابي ارضعه ابي العب بشعره ابي اناغيه ابي اسمع كلمة ماما ابي اذا طلعت

يبجي يبيني وان شافني رفع ايده يعني شيليني ابي يركض وراي ويمسك بطرف ملابسي ابي اذا

نمت احضنه وابوسه ابي احطه على صدري ابي دنيتي تنترس بوجوده ابي يملي علي وحدتي

ويسعد قلبي ابي اشوف احلامي تتحقق فيه ابي اشوف طموحي بعيونه ابي يمسك ايد ابوه

ويروحون مع بعض المسيد ابي يحفظ القرآن ويطلع الاول على قرّاء الكويت والخليج بعد

يااااااااااااااااارب حقق حلمي واملي فيك كبير يا الله

ربي لا تذرني فرداً وانتي خير الوارثين