!!!!!!!!!!!!!!!!! " شكلين مابحكي" و " ابو عبدالله راع الدرعية" !!!!!!!!!!!!!!!!!

اغنام - ابل - دواجن - طيور

بسم الله
السلام عليكم ورحمة الله وبركاته
مساكم / صبحكم الله بالخير

أحبتي اليوم صار معي موقف ماني داخل بتفاصيله العميقه لكن ابي اكتفي بخطوط عريضه
الموقف وبكل صدق يحكي حال رجال نسمع بقصص طيبهم لكننا لم نقف عليها لكننا نرفع رؤسنا بهم وتذاكر احوالهم وكأنهم نحن
وبدون مبالغة اليوم فقط صدقت ان الطيب بالرجال عرق مهو طبع

الموضوع باختصار انا من حائل
وابو صالح " شكلين مابحكي و " راع الدرعية " اظنهم من الرياض

إلا أني توسطت لإمرأة لا أعرفها مجرد أني بعت عليها بيعه ثم ارسلت لي تبحث عن بيض دجاج زينه تنوي بداية مشروع صغير لها ولعيالها
تواصلت مع الأخ أبو عبدالله راع الدرعية ثم الأخ ابو صالح " شكلين مابحكي" من خلال هذا المنتدى المبارك حفظ الله القائمين عليه وبارك لهم في مالهم وذريتهم
ولم يكن الموضوع الا عملية شراء وبيع بحته
ثم جاءتني رساله منها على الايميل هذا نصها
( ابو عبدالله السلام عليكم ورحمة الله وبركاته وصلني صاحبك ومعه الاطباق واعطان اياها ورفض ياخذ مني المبلغ كله وما أخذ الا جزء منه ومع هذا اعطان طبق وقال هذا نية خير مني واحد وواحد من ابو عبدالله وحلف لي انه يبيها لوجه الله الحقيقة انا تعاملت مع رجال بيض الله وجيههم ورفع منازلهم ورزقهم من حيث لايحتسبون والله العظيم يابو عبدالله انهم اثبتوا لي ان الرجال اللي نسمع عنهم مازالوا موجودين ، والله يابو عبدالله اني ادعيلهم من كل قلبي ياعل ربي يوسع لهم وين ماغرسوا . أما بخصوص خوفك من البيض وتلقيحه اقولك الصدق ؟ ماعاد يهمني الناس اللي هذا تعاملهم مابي منهم الا بركة بضاعتهم وفالاخير الله يتقبل ما ادعي لك ولهم بظهر الغيب والسلام عليكم )


سبب كتابة الموضوع
اولا
من لا يشكر الناس لا يشكر الله
وهذا أقل حقهم علي
وثانيا
نصيحة أخوية مالي فيها لا شارد ولا وارد والله من فوق سبع سموات يعلم سريرتي وما اعلن ولا والله عالم الغيب والشهادة ان الاشخاص هذولا بيني وبينهم اي علاقه غير المكتوب أعلاه ولا رأتهم عيني
لكن الناس اللي هذا تعاملهم مع إمرأة استبعد كل البعد ان يكون للغش المتعمد في تجارتهم طريق وبالتالي من أراد ان يشتري منهم فالتجربه خير برهان وأنا على يقين أنكم ستتعرفون على رجال في أقل الأحوال

والله من وراء القصد



الأخوة ابو عبدالله / ابو صالح
بيض الله وجيهكم
هذي الهقوة ولا هو كثير من عيال الاجواد