الدجاج المتبل والمشوي بالفرن .. فوق العيش مع الحشو اللذيذ..عليكم بالعافيه
*السلام عليكم ورحمة الله وبركاته*
..الحمدلله الذي اطعمني هذا الطعام ورزقنيه من غير حول مني ولا قوة..
صباح العسل..ومساء الورد والنوير..كلن وظروفه..
اشلونكم حبيبااتي..عساكم بخير وعافيه
ياحلات هالاكله..لذيذه..وسهله..انشال له تجربونها وتعجبكم..وتدعون لي:yaaaaaarb:
ما ابي اطول عليكم..ندخل بتفاصيل الطريقه...
اول شي..تغسلين الدجاج عدل..وتفركينه بشوية طحين وتخلينه عشر دقايق ..يوخر الزفره عنه
وعقب تغسلينه وتنقعينه بهالخلطه اللذيذه..
ملاحظه: هالخلطه لدجاجتين..تقدرين تنقصين كميتها حسب جم دجاجه طابخه..
4ملاعق معجون طماط
1ملعقة صويا صوص
ملعقة اكل خردل(ماسترد)
ملعقة اكل كاتشاب
ملعقة أكل دبس رمان
عصير ليمونتين
ملعقة اكل دبس الرمان ماكنت احط ..بس جربتها بناء على موضوع ملكة الفرس عن التتبيله الي منزلته قبل مدة..وفعلا عطى طعم رووعه..
ملعقة اكل بهارات مشكله
نص ملعقة اكل فلفل اسود
نص ملعقة اكل كزبره مطحونه
نص ملعقة اكل هيل مطحون
نص ملعقة اكل كركم
ربع ملعقة اكل كمون مطحون
ملعقة اكل ملح..وتزيدين اذا حسيتي ان التتبيله ماصخه شوي
نمزج ونخلط المكونات ونتبل فيها الدجاج..عقب مانسوي فيه شقوق بالسكين..وحسب رغبتج..علشان يتشرب التتبيله عدل..ونخليه بالثلاجه قبلها بيوم..احسن..واذا ما مداج..قبلها بساعتين..علشان يبين طعم التتبيله عدل.
هني تبلنا الدجاج قبلها بيوم
وعقب غلفت صينية الفرن بالقصدير.. ووزعت الدجاج فيها ..ودخلتها الفرن على نار عاليه
وطبعا تسكرينها بالقصدير علشان يستوي عدل من الحراره
وعقب 45 دقيقه تكشفين وجه الصينيه وتردينها للفرن ..وعينج عليها تلاحظينها..ليما تتحمر وتاخذ اللون المطلوب..المحمش..يمي يمي
طريقة العيش:
نجيب جدر على النار نحط فيه ماي يكفي لسلق كمية العيش الي عندج
تضيفين عليه 3فصوص ثوم ناعمين وملعقة اكل بهارات مشكله ونص ملعقة اكل فلفل اسود..وملح الكميه المناسبه..وشوية لومي يابس ونص ملعقة كزبره مطحونه ناعمه واذا حبه تضيفين مكعب ماجي..يعطيج طعم روعه..بس البعض ما يحب..لاسباب صحيه..
ونضيف العيش على الماي عقب مايغلي.. ونضيف عليه علبة بازيلا خضرا ونحرك بالقفشه(الملعقه) نوزع العيش والبازيلا داخل ماي السلق
واذا شفنا العيش استوا ثلاث ارباع استوا
نشخله بالمشخال..ونحطه بجدر ثاني..على نار هاديه حوالي نص ساعه.
طريقة الحشوو:
نحمس في مقلاة بصل شرايح كميه وفيره
واذا ابتدا يذبل ويتشوقر لونه..نضيف شرايح الفلفل البارد والجزر وتكونين قاصتهم شرايح خفيفه..ونحمس عدل..بخفه
ونضيف نص ملعقة اكل هيل مطحون وربع ملعقة اكل فلفل اسود وشوية لومي يابس مطحون
وشوية بهارات مشكله وملح
ونحمس..ليما تمتزج المكونات..ويجهز عندج الحشووو
نحطه على صوب في الجدر قبل لانطفي النار بعشر دقايق..يشرب العيش من الحشو وياخذ من نكهته اللذيذه..ويفضل تحطين بعد على وجه العيش..قطعة زبده صغيره..تسيح وتعطيه طعم ولون ولاا ارووع...
وتفضلواا غالياتي العزيزات..هني وعافيه على قلوبكم ان شاء الله
هني بديت بنجاب العيش..ووزعت الحشو الذيذ عليه
وسدحت الدجاج المحمش المحمر فووووقه..يمي يمي
ونثرت شوية من الحشو عليه
صحني...المتواضع : )
