غلطتي خلتني ادور بولدي على المستشفيات لمدة سنه

السلام عليكم

انا بتكلم عن الموضوع واتمنى الكل ينتبه على عياله
ولدي الحين عمره 3 سنوات ونص , من عمره 6 شهور وكان ذكي فديته
نقوله وين شعرك ويأشر عليه واعضاء جسمه يأشر عليهم وجي
بس كان يحب يتابع التلفزيون
طيور الجنه وقنوات الاطفال مع الوقت صار مدمن عليها وانا مخليته لدرجة اني ما انتبه
انه طول ما هو واعي قدام التلفزيون .. مع الوقت صرت الاحظ عليه السرحان كله سرحاااان
اناديه ولا يرد واللي كبره واصغر منه يقولون كلمات وهو ولا كلمه ويستغربون منه الاقارب
ان عمره سنتين بس ماما بابا قاموسه مايتعدى 10 كلمات والباقي خرابيط كأن عمره سنه
وكله مايحب يلعب مع اللي كبره يعني كل اليهال يلعبون مع بعض وهو في غرفه بروحه ولا يبي يطلع لهم أنا عاد خفت ليكون توحد قمت على طول رحت ابحث عن التوحد وشفت فيديو ولد توحدي كبر ولدي نسخة حركاته حسيت قلبي بيوقف وصرت كله افكر واطبق عليه اشياء
واحاول الفت انتباهه اشوف اذا يحط عينه في عيني بس ارتحت انه عادي يركز واذا قلت له شوف هناك القطوه يلتفت بس فيه اشياء مب مرتاحه لها مثل اني اناديه ولا يرد مع انه يسمعني
مايرد الا اذا الشي عاجبه مثلاً اوقوله تعال شوف صورة القطوه
خذيت له موعد مع دكتور سوى له فحوصات وقال انه طبيعي الحمدلله بس اللي خلاه على هالحاله هو التلفزيون والأيبود نسيت اذكر انه مدمن العاب الايبود والايباد يقول هذي الاشياء تدمر الطفل
المفروض ساعه او اقل في اليوم وهو طول الوقت حتى مايحب الألعاب اذا بوديه ملاهي يبكي لين يطلع .

وقتها كان عمره سنتين ونص تقريبا الدكتور عطاه مواعيد سبيتش ثيربي علاج النطق مرتين في الاسبوع وقطعنا عنه التلفزيون والايباد تحسن الحمدلله اول شي قام يلعب مع اللي في سنه
صار يحب يطلع يروح الملاهي ويلعب بالسيكل والاهم من هذا كله ابتدا يتكلم ويكون جمل
سجلناه بالروضه عشان يختلط مع اليهال وجبت له اخصائي نطق خاص يجي البيت
والحمدلله قدرت الحق عليه والتطور هذا في سنه يوم ابعدناه عن الرسوم بس مرات اخليه يشوف بارني والاشياء التعليميه بس مب بأسراف
مع انه هالفتره قعد يشوف ام بي سي 3 بزياده ويبكي يبيها بس اليوم مسحتها لأن هو يعرف رقمها
ومرات يلعب في ايباد اخوه بس طبعاً مب مثل قبل
بس فيه شي ليلحين مخوفني الولد اللوز عنده متضخمه والدكتور قال شي بس مب متأكد منه
انه اذا رقد اللوز تضيق دخول الأكسجين ويقل الأكسجيل اللي يروح للمخ اثثناء النوم مما يسبب قلة تركيز اثناء ماهو واعي وقال بيسوي تصوير مقطعي ولانه صغير طبعاً بيخدره كامل
بس فات موعده لأن كان فيه حراره الأسبوع اللي طاف
وأن شاءالله خير ادعوا له

وقللوا من مشاهدة عيالكم للتلفزيون والرسوم مامنها فايده