شعر (صباح الخير ياعمري)

عقب ذاك الظلام اللي غزا فجره شعاع النور
كتبت لصبح تنويرك (صباح الخير ياعمري)
صباحن ما اقدر اوصفلك شعوره وانظمه بسطور
عجز ياصف لساني لك بعض ماجال في صدري
صباحن كل مايطري علي اذكر بنات الحور
ولا ادري كيف تصويره ولكنه علي يطري
صباحن سكره طعم الشهد من نحله ودبور
طبيعي ماصنع في مصنع سعودي ولا مصري
صباحن ماهو لغيرك .. ولك انتي فقط محصور
ولو كل العرب تدري .. وابي كل العرب تدري
وذا احساسي عجز ينطق ابافضح ستره المستور
واذا مابحت بحساسي ترى صبحي مثل عصري
عسى دايم صباحك مايخالط جوه الديجور
الى بين جبينك للفجر همي معه يسري
صباح الورده اللي تنتشي لاهزها العصفور
إلى غرَد عزف له باللحن ياعمري القمري
صباح الطفله اللي غرَها في شعرها المنثور
حريره لا التوى فوق المتون بلونه الخمري
صباح النسمه اللي حركت بالخايع الممطور
ذعاذيع الربيع وهيضت مكنونه العطري
صباح البصره اللي عزها في وقتها المنصور
قبل يدنس تراب ارض العراق السافل الممري
وانا تحلى صباحاتي إلى قلتي صباح النور
عقب ماقول ياحلوه(صباح الخير ياعمري)