تتبيلة الكنادره اوصلت حق اللحم و الدياي ... صفطي على جنب و طلي على الموضوع...

مراحب بالغاليات...

اليوم قلت أنزل لكم وصفة تتبيلة الكنادره للحم و الدياي المشوي ... نبتدي أول شي باللحم...

تتبيلة اللحم ...

3 كيلو لحم ( يستحسن يكون أسترالي او لحم غنم عربي ) و يكون معاه قليل من الشحم..
5 روس بصل مفروم فرم ناعم
2 علبة روب
نص علبه لبنه حامضه
4 ملاعق طعام ليمون أسود مطحون
4 ملاعق خل
عصير ليمونتين
1 و نص ملعقه صغيره ملح
شوية فلفل أسود
1 ملعقه صغيره كمون
1 فنيال قهوه سفن أب ( سر الخلطه لأنه يخلي اللحم يكون طري )

الطريقه:

يغسل اللحم عدل ويترك في المصفى لين ينزل منه الدم تالي تاخذينه وتغسلينه مره ثانيه...
طبعا اللحم تكونين مقصصته مكعبات لا هي صغيره ولا كبيره ...
تالي تخلطين جميع مقادير الخلطه و تضيفينه على اللحم ويترك ليخمر بالتتبيله ليله كامله...
وقت الشوي ترسي الدوا بالفحم وشككي اللحم بالأصياخ وتعالي سوي أحلى باربكيو... على الفحم يكفي انه شغل البيت ونظيف ... و لا تنسين الخبز الأيراني و سلطة الروب بالخيار و غوصي عاد...




تتبيلة الدياي:

3 ديايات مقطعين 4 قطع ... ( مغسولين عدل من الزفره بالطحين والليمون و الخل )
4 ملاعق معجون طماط
علبة روب
2 ملعقة طعام خردل
1 ملعقة طعام ( معبوج الاخضر )
3 ملاعق طعام لبنه حامضه
2 ملعقه طعام دبس رمان
2 ملعقه طعام خل
عصير ليمونتين
1 فنيال سفن أب

* تضربين المقادير السابقه في الخلاط لين يصير مثل العصير ... تالي تضيفين البهارات من:

1 و نص ملعقه صغيره ملح
رشه خفيفه من اللون البرتقالي
1 ملعقه صغيره كركم
1 ملعقه صغيره بهارات التندوري
1 ملعقه صغيره كمون
نص ملعقه صغيره فلفل أسود
1 ملعقه صغيره كزبره
1 ملعقه صغيره بزار الدياي

- تضيفين البهارات على الخلطه ألي ضربتيها بالخلاط و تضيفينها على الدياي و خليها تخمر ليله كامله ...

وقت الشوي ترسي الدوا بالفحم و شويه على الفحم و يا سلام عاد و لا تنسين السلطه بالروب و الخيار و الحمص و هم قطعي طماطه و بصل و خليه على الفحم ينشوي شوي ...

و عاد جهزي الخبز الأيراني و لا تنسين البيبسي ... وغوصي بالخمس...

و عليكم بالعافيه ... عاد أستغلو الوقت بما أنه الجو براد و هذا وقت الشوي...
ولا تنسون تدعون لي عاد ....


أختكم
أم فارس