نفنوفي والصرصور المقفوص ومكياجي

السلام عليكم ورحمة الله وبركاته

أنا فتاة عزباء عمري 30 سنه .. أحسب نفسي على خلق ودين

ماكنت افكر بشئ قبل النوم اللي اذكره نمت على طهاره واستغفار ولله الحمد ..

رأيت كأننا انا وخواتي وأمي بصالة بيتنا ((الصاله اللي بالحلم مااعرفها بالواقع)) بس بالحلم انها صالتنا وكأنها بطابق أرضي سرداب ..

وكانت الساعه تشير للـ 12 بعد منتصف الليل ,, قالت أمي فلان (ولد خالي) بيزورنا فقلنا باستغراب منو بيزورنا هالحزه و فجأه طق باب المنزل الخارجي فقالت أمي ماقلت لكم هذا أكيد فلان ((ذكرت اسم ولد خالي الكبير وهو كبير بالسن ومتزوج وعنده عيال صغار بالسن واسمه ماله معنى ))

قالت لي روحي البسي لأنها سمعت صوت حريم معاه ((للعلم انا محتشمه))

الحريم اللي معاه كانوا ناس من معارفنا من بعيد وحده منهم تصير خالته ومعاها بنتها الكبيره يعني تصير بنت خالته اسمها رحاب

بعدين دخلت غرفتي وكانت ماتشبه غرفتي فيها كبت لونه أبيض وطاوله والفرشه بس ..

الطاوله كان عليها مكياج ,, فتحت علبة كريمي الأساس فلقيته فاضي مخلص , فتحت ثاني لقيته لمعه قليتر , فتحت الثالث لون غامج ((للعلم ماعندي الا كريم واحد بالواقع)).. خليتهم قلت مو لازم بس احط حمره ومسكره

طلعت نفنوف من الكبت وعلقته بره عشان البسه كان لونه بيج في بني ..

فجأه طلع صرصور يطير ووقع فوق الثوب وأول ماطب عالثوب على طول مات وتقفص وطلعت مصارينه ((يعني كأنه مطقوق بالنعال مع انه بس طب عالثوب ما انطق ولا شي))

دخلت اختي تقول يالله للحينج ماخلصتي كلنا نزلنا فقلت لها اللي صار ونادت خدامتها وشالت الصرصور فقلت للحين مصارينه عالثوب ماراح البسه ,, ورحت طلعت ثوب ثاني من الكبت وكان لونه احمر معاه جاكيت احمر وكان الثوب مخصر وكششخه ,, قلت لا ماراح البسه حيل أوفر

وخلص الحلم ,,

للعلم حلمت بالبنت اللي اسمها رحاب قبل اسبوعين وانا مالي احتكاك فيها بالواقع ,, شفتها مره او مرتين وشوفتي لها بأعراس

حلمت اني داخله خيمة كبييييره مثل خيمة الاعراس وكانت مليانه حريم منسدحات كأنهن والدات معاهم اطفالهم الرُضـّع ((يعني منفسات)) وكنت أمشي سيده بنص الخيمه فجأه نادتني رحاب وقالت تعالي شوفي ولدي او بنتي ناسيه وقالت حلو صح فابتسمت لها ,, وبس

أدري انكم ماتقبلون بحلمين بس قلت يمكن مرتبطين في بعض