اغنام - ابل - دواجن - طيور
عامٍ جديد وجرحي العـام مـا طـاب
بيـن الحنايـا ينـزف اليـوم دمّـه
ياكثرهـم حولـي مواليـن واقـراب
مااحدٍ درى عن ضيق صدري وغمّه
وياكثـر مافينـي تناهيـت وعتـاب
وياحرّ دمـعٍ فـي عيونـي تضمّـه
من بعـد ماكنـا مواليـف واحبـاب
اليـوم كـلٍ لـه طريـقٍ ويمّـه !!
في وصلنا كنا مثل سود الاهـداب !
مااحـدٍ يفرقنـا ولا نشيـل هـمّـه
والحين فرقا ماحسبنا لهـا حسـاب
كلٍ يمش الدمـع بااطـراف كمّـه !
اليوم راح وصار من ضمن الاجناب
لا هـو يحاكينـي ولا اروح يـمّـه
هو مادرى بقلبي على مفارقه ذاب ؟!
والحزن في صدري عميقٍ مجمّـه !
يقطعك يافرقا بـلا ذنـب واسبـاب
فرقـا الولايـف مابعدهـا مطـمّـه
عمر الزمن لامن خذا شـي ماجـاب
لا له ضميـر ولا آمـانٍ وذمّـه !!
