الحرب قادمه ياهلال .. جماهير الزعيم كونوا على الموعد

السلام عليكم و رحمة الله وبركاته
نعم الحرب قادمه ياهلال
اغرب فتره تمر على الزعيم
ويا خوفي من تاليها
حرب تشن على الهلال من كل جهه وللأسف وصلت الى انها تكون مننا والينا
في رأيي الشخصي ابرز ما يميز الهلال عن غيره من الانديه هو
البرود الهدوء التطنيش
والله ماقطع قلوب غيرنا الا سكوتنا ولا كأن شي صاير
الهلال جالس يستفز من كل مكان واحنا متعودين على هالشي
لكن هالموسم مدري وش تغير
حبايبي ماعرفوا كيف يطيحون الهلال فاتجهوا لجماهيره
شوفوا المواضيع والردود وتابعوا البرامج وحكي الجماهير تعرفون وش اقصد
الجمهور صار يخطئ وهو اللي عطا فرصه لهالمندسين انهم يكونوا بيننا ويشوهون الهلال
اثنين انفضحوا قدام الكاميرا وماخفي كان اعظم
من متى جماهير الهلال ترمي الحكام ومن متى تتهجم على البيوت وتكسر
ومن متى تطلق عبارات عنصريه
مع العلم ان المواضيع كبرت واعطيت اكبر من حجمها لكن إحنا اللي عطيناهم الفرصه
موضوع الفريدي اليوم أنا ضد اللي سواه اللاعب ولازم يعاقب اذا كان فعلا الموضوع مثل ماذكر لكن تلقى لك ناس تسب وتقول لاعب اقل من عادي ومع السلامه ابركها من ساعه
خير ان شاء الله مو هذا أسلوبنا ولا طريقتنا الادارة ساكته واللاعب ساكت طيب اعرفوا اول وش السبب بعدين أحكموا الفريدي لاعب كبير ولا زال لاعب هلالي قدم مستويات رائعه مع الفريق ليه اقلب عليه بهالطريقه المخيفة والله اعرف لك ناس غير هلاليين طايرين من الفرحة مو بس من اللي سواه الفريدي لكن من رد فعل جماهير الهلال
أهدوا الين مايبين كل شي وقتها انطلقوا
المشكله كلنا عارفين ان اي خطأ يسويه الهلال هو انتصار لغيرنا والهلال هو المتضرر اولا وأخيرا العقوبات جايه الله يستر
فليه نعطيهم الفرصة بهالتصرفات اللي اثق بأن اغلبها من مندسين اعطيناهم الفرصه لان يكونوا بيننا وللأسف صاروا يمثلونا بعد
هزلت فعلا
جماهير الزعيم الحقيقيه شعارنا الهلال ولا شيء غير الهلال
ثقوا بادارتكم وبحكمتها والله اننا محسودين عليها
لا تفرحوا غيرنا بنا
وتأكدوا ان الحقران يقطع المصران
هذي سياسة نادينا الناجحة اللي عجز غيرنا عن تطبيقها
فلا تغيروها
وانا شخصيا ان ما أخذ الهلال الدوري جعلهم يقفلون الدوري بكبره
والله مايهمني من ياخذه لأن بميزاني الهلال في جهه والانديه جميعا في جهه كلها واحد
رجائي من الجميع أهدوا وركزوا على فريقكم و دعمه
اللي بيروح يشجع بالملعب لسانه لا ينطق بغير الهلال
واللي بيرمي شي من المدرج لا يرمي الا فرحا عندما يسجل الهلال
واللي يبي يطلع بالشوارع ويدور بالحواري لا يطلع الا احتفالا بانتصار الهلال
الهلال ثم الهلال ثم الهلال
واتركوا عنكم الانديه الثانيه والحكام واللجان لا تنجرون ورآهم لان هذا اللي يتمنونه
جماهير الزعيم كونوا على الموعد كما عهدناكم انتم سلاح الهلال الأقوى
وعذرا على الاطاله وشكرا ..