@@ (( الحب يولد لايصنع هاك الدليل وانت الحكم ،،، لأبوهليبه )) @@

اغنام - ابل - دواجن - طيور

السلام عليكم ورحمة الله وبركاته ،،،

مساء الخير والمسرة للجميع ،،،

الحقيقة الليلة حبيت اتحفكم بهالمشاركة اللي ارجو ان تنال على اعجابكم ورضاكم ،،،

وهي عبارة عن قصة وقصيدة والقصة هذي يمكن تكون غريبه من نوعها واحتمال تكون

محزنة بس اللي انا متأكد منه انها جذااااابه بقدر ماتمتلكون من ذوق جذاااب ورائع 0

نبداء بسم الله ،،،

هذي القصة فيها من روعة الحب النقي مالله به عليم وبها من حسن التصرف وكرم الاخلاق


مايجعلنا نقف لها احتراماً وتبجيلاً 0

وسنجد من خلال سردها دليلاً قاطعاً على ان الحب يولد لايصنع اطلاقاً0

كان فيه فريقين متواليه بيوتهم على منازل الربيع مثل عادت البدو في عصر ٍ مضى يلمهم الربيع

ويطشهم القيض وهلم جرا ،،،

وكان في احد الفريقين رجل فارس وشهم وشجاع وكريم وشاعر وكل صفات الرجوله حاويها ومحتويها

وكان متزوج وزوجته عقيم ماتنجب وكان يحبها حب الجنون اللي يقولونه والناس تشهد له بهذا ،

وكان الرجل منصا ومضياف يعني كانوا ربعه ماغير جلوس عنده

وتعاليل وسعة صدر ومايملونه ابد وهو مايملهم ،

وسمعته سابقه الريح بكل ماتعنيه كلمة الرجولة ولاهان من يتابع 0

وكان في الفريق الثاني بنت مزيونه فيها من الزين مالله به عليم وهبها الله الجمال اليوسفي من

غير حساب فأجزل لها العطاء وخصها بلي ماخص غيرها من البنات في جيلها وكانت شاعره قوية 0

وكانوا الرجال يهذون ابها وكل ٍ وده انها تكون حليلة ٍ له مما يسمعون عن جمالها وقوة شاعريتها 0

وكانت البنت قلبها خاوي مابه نزول ولا يوم عرف الحب ابد 0

ماغير تارد العدود وتعود ، وفي الليل ماغير تنفض ذوايبها

وسوالف مع خواتها اللي ماخلت لهن من الزين شي 0

المهم جاء ليلة من الليال وابوها جالس مع امها يسولف عن هالرجال اللي من الفريق الثاني

ويعدد مافيه من الصفات العجيبه ويمدح فيه مدوح ٍ عجيبه بعد 0

عاد هالسوالف قابلت قلب خالي وجنس ناعم وشقت طريقها وبقوة لين تربعت بوسط قلبها0

هاك الليلة البنت مانامت ماغير تشيل وتحط في هالرجال اللي ابوها حكى لأمها عنه ويوم جاء

الصبح واليا والله الحال ماهوب الحال اللي خابرته البال مشغول والقلب يدق والجبين عرقان ودها

تشوف هالرجل اللي ماتعرفه لو من بعيد ( تدرون ليييييش ؟؟؟؟؟ )

لأنها هاويته هوى ً ماهوب معقول غرس الله حبه في قلبها بين ليله وضحاها 0

وكل ماشافت هالورعان والبنات الصغار قالت تعرفون فلان تبيهم يورونها اياه

قالوا لها انتي خبله منهو اللي مايعرف فلان الطيب الكريم الحبيب الفارس وقاموا يعددون كل مافيه0

ثم زادوا جنانها وولعها لين بغت تجنن من هواه اللي ماكمل 24 ساعة (( لاحووووووول ))

المهم جاء الليل وهي ماشافته لأنه كان برا يدور الصيد لعيون بنت عمه وحليلته وعقب ماوصل

للبيت جاه واحد من ربعه بينه وبينه معزة قوية وغلا ً مبطي 0

وقال له يافلان ابيك في لزوم ضروري 0

قال خير ان شاء الله وراك ماتخليه لين بكره 0

قال لاوالله انا انتظرك من اليوم مير ارواح معي وابي فزعتك لاهنت والبس بشتك 0

المهم لبس بشته القرم وهو عاد لالبس بشته لو هي رقبه فكها من السيف من طيب جاهه 0

ويوم تولم للمشى قال لرفيقه وين الوجهه 0

قال نبي الفلاينه ابيك تخطب لي فلانه بنت فلان تكفى يابو فلان ضوها علي بالحلال ومعروفك

دين في رقبتي لين اموت 0

(( عاد هالبنت اللي يبيها هي اللي تولعت بالهوى بول القصة اعلاه ))

المهم مشوا لين اقبلوا على بيوت معازيبهم وشافوا الضو شاعل والبيت صاحين هله 0

ويم شافهم راع البيت وابو البنت رحب فيهم ترحيب يلفت الانظار ويسحر الالباب واخذ

صاحبنا هذاه وجلسه جنبه وماغير كيف حالك يافلان ويالله حي فلان والساعة اللي جابت

فلان وخويه والبنت تسمع في الشق وسط خواتها وامها وهي تختلف ويقوم قلبها

يرزم مثل قلب الخلوج وبخت عرقتها وارتعشت يديها واختلف كل مافيها 0

(( تدرون ليييييييش !!!!!!! ))

هذاه والله الحب مجفف القلبان وملين الصمان ومليم الخلان (( لاحوووووول ))

ودها تشوفه مير امها وخواتها حالوا بينها وبينه ماتقدر تخاف يطالبونها !!!!!!!!!!

المهم جلسوا الرياجيل وجات القهوة ومد الفنجال له وقال تقهوى يافلان 0

اخذ الفنجال ووطاه قدامه بحشمه 0

تفاجاء المعزب وقال تقهوى يافلان وارفع صدرك عني ومطلوبك ملبى 0

قال له فنجالك نشربه لا اعطيتنا مطلوبنا ؟؟

قال تقهوى وابشر بلي تبي والله لو انها رقبة ولدي فلان انها تفداك يابو فلان 0

قال حنا جيناك طلابة حسب ونسب نبي بنتك فلانه لولد عمي فلان اللي تشوفه جنبك 0

قال من يمي جتكم الا من المشورة 0

قالوا شاورها والله يريد اللي به خير 0

راح العود للشق وقال وين فلانه وجاته وعلمها بالعلم اللي ماسرها والله 0

وقالت البنت انا موافقه بس بشرط 0

قال ابوها وش هو يابنت هذاه فلان ماتملا عليه شروط انتي مجنونه !!!

قالت ابد هذاه شرطي وان كان تبي تغصبني يابوي قل لهم تم وخلاص آآآآآآآآه 0

قال ابوها وش هو شرطك 0

قالت عندي ابيات ابيك تهلها عليهم وعقبها تسمع جوابي يابوي 0

قال وش هي :

قالت البنت وليتها ماتت قبل ماتقول هالابيات اللي غيّرت كل السالفه واخلفت كل المواضيع0

ياهن ضامينك على غير ميـــــــــــــــــراد

ومن الضما دوك الرشا بالمحـــــــــــــاله

طردي حقاق وطرد مثلك هجـــــــــــــــاد

ومن الغيا جبت السراب بعجــــــــــــــاله

ليل ٍ نزل بدره علينا بالاشهــــــــــــــــاد

وسط المروبع مير ماهو لحـــــــــــــــاله

ياوي لو انه لفانا ونشــــــــــــــــــــــ ـــاد

جت له عربنا طوع مابه جمــــــــــــــاله

قل للصميدع مالنا فيه نقــــــــــــــــــــــا د (( تقصـــد رفيقه ))

ولا ينكره 00 جعل التوافيق فــــــــــــاله (( مالي به هوى ))

مير الطراقي حطحط الزمل بجهـــــــــــاد

وثـــنــوا ركايبهـــــــم ولا فـــــيه قــــاله

حنا نزلنا وسط سوق ٍ له اسياااااااااااااااد (( تقصـــــده هو ))

واخذوا بضايعنا وجابوا ريـــــــــــــــــاله

ماعاد باقي كود مذخور الاكباااااااااااااااد

امــا شـــروا والا غــــديـنـا بحــــــــــاله

عاد يوم اسمعوا هالقصيدة وهم كلهم شعار عرف القرم ان البنت هويانه ولد عمه بالحيل

وان ماله بها قسم ابد 0

وقاله ولد عمه والله يابو فلان ماعندي خبرعن هواها 0

قاله ماهنا خلاف وانا ولد عمك وانت تستاهل كل طيبه وكيف اشك انك اتهواها وانت جاي

معي تخطبها لي وبديت بجاهك العامر لجل هذاه الشي حاشاك والله من الزلة 0

وقام بكل كرم وطيبة نفس وخطبها لولد عمه اللي هو اصلاً جاي ٍ معه جاهه يخطبها له

وفعلاً خطبها مرة ٍ ثانية لولد عمه وراح شاورها ابوها ووافقت المزيونة 0

وسلامة تسلمكم جميع ،،،

القصة والقصيدة (( لابوهليبه دت كم 000 ))

ليست في الكتب او المجلات دمتم بود ياغالين 0

اتمنى اني امتعتكم ،،،