يا أسيطر على الكل ، يا أزعل من الكل ( شنو طبها )
السلام عليكم ، بنوتات شلونكم؟
بعرض عليكم مشكلة تمر فيها وحدة رفيجتي(ر) حيل تعز علي
و انا طبعا نصحتها باللي يرضي الله، و بطريقة مثالية ، بس مو على حساب حقوقها
أنتو شنو تقترحون ؟؟؟
أتوقع مالها علاج إلا الصبر ، لأن هذول ناس ما ينفع فيهم شي
و أنا كنت مجربة ظروف شبيهة
تقول ( راء )
احنا بالعايلة عندنا الكل الكل أختي الكبيرة
انسانة مميزة
شخصية جذابة جدا
الكل يحبها
قيادية
مبدعة
ناجحة ماشا الله بكل مجالات الحياة
دايما الناس يردولها الراس بالراي و المشورة
فيها خير و طيبة
و فيها من الصفات السلبية ما يلي :
عصبية ، مصرقعة ، تحب الشحاطة والمديح ، و مو عادلة أبدا و لا منصفة، تحكمها العاطفة ، لي حطت على انسان أعوذ بالله ، تصير جهنم و بأس المهاد ، تمنع عنه أي رحمة بيدها
و رحمة ربي أوسع منها
السالفة و ما فيها إن هذي الأخت العودا و بنفس الوقت العوبا
اللي كانت بيوم من الأيام ماسكة خواتها اللي أصغر و تداريهم
خلاص لهت بالحياة و مشاغلها و ماصار لها اي تأثير نافع لهم
صارت أنانية و منعزلة ، بس الحق ينقال ، لازم تشوف حياتها
جزاها الله خير المرا وفت و كفت ايام قبل
لها أفضال بالسابق لكن الحين لهت مع عيالها و مسؤولياتها
خواتها هم كبروا و كل وحدة لها حياتها الخاصة ، تزوجوا بعضهم و اللي استقرت و اللي توظفت يعني ما عادوا يهال مثل قبل.
هذي الأخت العوبا و العودة نفس الوقت
علبالها لي الحين خواتها يهال نفس قبل
بتمشيهم بالزف و السيطرة
و لي أحد عارض اتين
لي أحد قال شي اتين
لي عاملوها باحترام أقل شوي من باب الميانة أو من باب إن اهي أختهم
تزعل و اتين
تبقق عيونها و تزف
تبي تمشي الكل
و لي أحد عارض أو غلط غلطة صغيرة ، أعوذ بالله ، تصير جهنم و بأس المهاد
تهجره أشهر أشهر طويلة
اهي من حقها تقول كلام عل كيفها حاد و لاذع و جارح
و لي أحد رد عليها أو قالها ربع كلامها
مدت الطنقارة أشهر
تبي الناس يحترمونها و اهي ما تحترمهم ، تبي الناس ما يقربون من جنابها المقدس
الحين اهي هاجره أختها ( راء ) لسبب تافه
رغم إن راء لها بوادر ، و محاولات للاصلاح و لكن بدون فايدة
راء ما تبي تقطع الأرحام
و تبي تتواصل لأجل الله فقط ، تقول و الله لو ما إنها أختي جان قطيتها بالزبالة
لكن هذيج مسكرة الجام
كبرت و دبرت
المهم طبعا حاولت ب ( راء ) إن تكلم أختها العودة
لكن تقول ان اهي مسكرة جميع الأبواب ، و ماترد عل احد
تطالعهم بنظرة احتقار و تتأفف بويوهم و تمشي عنهم.
و مغترة بنفسها علبالها ان الناس لازم ايون يراضونها و اهي الكل بالكل
و يخضعولها و يعتذرون لها حتى لو اهي الظالمة
مادري اعتبرها متكبره و مريضة نفسيا
المهم انا قلت ل ( راء ) لا تعتذرين ، لأن اللي سويتيه غلط بسيط ما يحتاج الاعتذار
هذا من باب الميانة بين الخوات ، و حتى لو ماكان ميانة يكفي إن تنبه إن هذا الكلام ما يعجبها و خلاص.
أما تعتذري لها و تطيحين نفسج لها
جذي بتتعود الأخت العودة تتنح و تشوف حالها كل ساع و تنطقر عل اهون سبب
و ما تشوف بالمقابل اغلاطها اهي و اسلوبها الجلف و عصبيتها.
قلت لها:
سلمي عليها
و ابتسمي لها
و خلج رياضية
اذا ردت حياها الله
اذا ماردت
اهي اللي بستاثم ، اهم شي بريتي ذمتج جدام الله
لو انتوا مكانها مع وحدة عوبة و مقفلة جذي شنو تسوون !
المشكلة ان فيه صلة قرابة و فيه احتكاك
