مهما نصحنا بنتنا على المغازل .. ماينفع !!

يسعدلي صباحكم بنات ،،،


مع اني مو كبيرة بالعمر.. مجرد 24 سنة ،،
لكن الي شفته بحياتي من بلاوي ومصايب،خلاني اتعلم الكثيرر
وعطاني دروس ،
وقاعد يبرهنلي يوم عن يوم ، ان كلامي صح ونظرتي للامور أصح !!

موضوعي يهم كل ام ، وكل وحده مقبله على الزواج وتكوين اسرة ...
ايضا يهم كل بنية واقعه في هالمشكلة !!
وكل وحده ودها تساعد رفيجتها ..


عندنا اليوم مشكله اجتماعية كبيرة ... تضر بالدين قبل كل شي !
الا واهيه "المغازل" والعلاقات الغرامية ..

ابي اتكلم عن نوعية البنات الي وايد منغمسه بهالشي
الي تكلم من كان عمرها 14 والا 15 .. والحين صك عمرها ال23 سنة ومو راضية تفج
عايشه بدوامة العلاقات والمغازل و القز والتضبيط!
والنوع المتطور الي وصل مرحلة الحفلات بالمخيمات والشقق
والنوع الي يبي يسوي نفس امريكا، وتعيش بشقه مع حبيبها وتخلي اهدومها اهناك ونص قشها

اعرف بنات من كل نوع من هالانواع
والمشكله ان كل بنت تقريبا، طاحوا عليها اهلها وشبعوها طق
تابت شهر.. شهرين، وردت على نفس الموال لكن بحذر اكبر
بدال ماتقز بالاماكن المعروفه مثل المرينا .. خلت قزتها تصير بالبدع
وبدال ماتواعد رفيجها علني،، حولت لي الشقه !
وبدال ماتروح حفلات بالليل، خلتها الصبح!!

مع انها شافت الموت بعينها !!!!! وكلت طق موتها واهيه عايشه!!
امها بجت عندها وترجتها تترك هالحياة
ابوها ترجاها تترك هالحياة
اهيه نفسها تاثرت وقالت بترك هالحياة
ولكن ترد مره ثانية وثالثه .. لا وعلى درجة اعلى من الحذر بحيث ان صيدتها صارت مستحيله !!!

السؤال الي يطرح نفسه وبقوة
ليش مانفعت معاها لا الدموع ، ولا الطق و لا التنكيل!
ليش مانفعت معاها النصايح بشتى اشكالها؟؟

والسبب وبكل بساطه
هو ابتعاد تلك النصايح عن الواقع!!

الام لي طاحت على بنتها على طوووووول بتقول
" هذا يلعب عليج هذا مايحبج هذا يستغلج"
ولكن بنظر البنت ، شكثر هالنصيحه واقعية ياترى؟؟
البنت تشوف ان هالصبي يحبها! وتشوفونهم صج عايشين قصه حب!
البنت تملك كل الدلائل الي تثبت للام انها على غلط ، خصوصا اذا كان الصبي مضحي بوايد اشياء عشانها!!
الام مهما نصحتها، مراح تاخذ نصايحها على محمل الجد، لان قاعده تشوف بعيونها الثنتين ان الصبي فعلا يحبها!!!!
سوى كيت عشانها وكيت وكيت وكيت !!!
بعد هذا كله ، اتيي الام وتقول " والله هذا مايحبج؟"
البنت بتسمع النصيحه من اذن واطلعها من الاذن الثانية !!!

ابتعاد النصايح عن الواقع ،، مايسوي شي غير انه يثبت البنت اكثر واكثر على الطريج الي اهيه سلكته!
وعشان جذي البنت تسمع لنصيحة رفيجتها الي تفضفضلها ،، اكثر من الام!
لان رفيجتها على دراية بالموضوع وعارفه الريال ولو نصحتها مثلا انها تخليه لانه فيه العيب الفلاني والعيب العلاني
اشكره بتسمع كلام رفيجتها !
ليش بدت كلام رفيجتها على امها؟؟؟
لان رفيجتها ادرى بواقعها من امها !!!

عزيزتي الام او الاخت ،
اوجه لج كذا نصيحه في حال اذا عرفتي انه بنتج اتكلم!
اولا :
الطق ما اييب ولا يودي ، بالعكس ، اذا استخدمتي العنف
راح تحن اكثر على حبيبها!! وتكره اهلها ويصير حبيبها اهوه ملاذها الاول والاخير

ثانيا:
كلميها واخذي تفاصيلها علاقتها معاه بكل اريحية
خلج مستمعه جيده ووخري الغضب على صوب اشوي
ساليها عن كل شي .. و خلج مرحبه بالموضوع ومهتمه ،،
تذكري : انتي تبين تكسبين بنتج، ماتبين تنفرينها منج!
وبعد ماتخذين التفاصيل،،
دسي السم بالعسل !!
وحطي ابالج زين ان اغلب العلاقات العاطفية مبنية على عاطفة محضة!
مراح تلقين بينهم توافق عقلي ، ويمكن يكونون تماما مختلفين عن بعض، اهيه شيعيه واهوه سني
اهيه حضرية واهوه بدوي ..إلخ!
فانتي كلميها بمنطق عقلي سليم .. وقوليلها اشلون راح تختمون طريجكم باجر؟
هل تنفعون للزواج؟
واذا اهوه مايفكر بالزواج ، عيل ليش قاعد يكلمج؟؟
انتي حل مؤقت له ليمه تتزوجين؟ وهل ترضين على نفسج تكونين تقزوره وقتية ؟
اذا اهوه ماينظرلج كزوجة، معناته مو قاعد ينظرلج اي نظرة ثانية غير انج ( ----- )

عطيها وقت وقوليلها، كلميه بموضوع الزواج وشنو راح يرد عليج
وتالي كلميني!!
وانتي يالام ابني ردتج فعلج على ردة فعله تجاه فكرة الزواج

نصيحها من واقعها
انسجي لها نصيحه من واقعها ،،
اقنعيها ان هالشي غلط مو باستخدام الاسطوانة المشروخة والكلام المستهلك مثل
" هذا مايبيج هذا يلعب عليج إلخ" انا والله عن نفسي طقت جبدي من كثر ماسمع هالكلام ينكتب بالمنتديات والمواقع لمه وحده تبي تنصح الثانية !!

كل ماكانت نصيحتج ملامسه للواقع كل ماكان وقعها على القلب اقوى!