منوعات & عام شباب ماتحسون انفسكم حاقدين على الحكومه بعد الميزانيه ؟؟

السلام عليكم ورحمة الله
اليوم صاحي بدري وماسكه معي اتكلم فالسياسه
لكن قبل كل شي ودي اقول كلمه عشان ماحد يجي يوطوط على راسي ويقول
انت فيك وفيك يابو عزام اولا نعوذ بالله ان نخرج على ولاة امرنا حتى لو متنا منا الجوع
ولهم السمع والطاعه في غير معصيه لله ورسوله صلى الله عليه وسلم
لكن بصراحه معازيبنا اخذلونا خاصه بعد الاعلان عن الميزانيه الخيره
المفروض ينقطونا ويرشوونا من المليارات هذي واذا مايبغون يعطونا ليه يعلنون عنها
يخلون شغلهم سكتم بكتم ويتبرعون للمغرب ولبنان من تحت الطاوله
ليه يقهرونّا الى متى المليارات مخزنّه في بنوك امريكا ؟
ويش ينتظرون؟
ينتظرون تجي ازمه تاكل هذي الفلوس مثل اللى قبلها 800مليار راحت علينا خساره
في لعبه من بوش والمواطن هنا اوضاعه رايحه وطي
يابو متعب انت ونايف الله يحفظكم ترى امير قطر التفخ هذا ماهو اخير منكم
في اليوم الوطني اعطي كل مواطن 100 الف واسقاط جميع الديون
حنا في اليوم الوطني اشغلونا بالتفحيط
مانبي راتبين نبغى بيوت نسكنها ذبحنا الايجار كل سنه يزيد وكل سنه في شقه
وكل سنه اشيل عفشي في دينّه من حاره لحاره
المفروض يابو متعب كل مواطن تعطوه مليون ريال قرضه حسنه
نبغى نعيش مثل العالم
ياخي اسرائيل واهم يهود يبنون لمواطنيها مستوطنات
وحنا راح العمر ماملكنا مستوطنه لعيالنا
لاتعطونا من قيمة البترول والذهب اعطونا من قيمة عدادات الكهرب ال عشره ريال
اللى تاخذوه كل شهر تخيل كم عداد عندنا في السعوديه
رواتبنا ماتكفينا مصاريف لنص الشهر وبعد ماجاء ساهر زاد الطين بله
تخيل يابو متعب حليب كوست الحجم الكبير الان ب 80 ريال
وانا يوميتي في الحرس الوطني ب 75 ريال !!!
وفوق هذا كله كل مواطن عنده درزن عيال عاطلين في البيت بدون وضايف
ياويلي ان مت ماتحققت احلامي
وياويل حالى ان مت ماحد فطن لي
يشفطني الكهرب وانا مامعي لوح

بروح صلاة الجمعه واكمل الباقي لكم بعدين