السلام عليكم ورحمة الله وبركاته
هذي قصة وفاة ماما الله يرحمها بكل التفاصيل
حبيت انزلها (عشاااان تدعون لها بالفردووووس الاعلى .. مدري وش اقدم لها بعد فراقها .. ويارب دعواتكم تدخل عليها السرور في قبرها)
طبعا جبنا لها شيوخ وكلهم اكدوا اصابتها بعين قوووية هي السبب في مرضها وموتها(ومن كل قلبي اقول حسسسسبي الله ونعم الوكيل ياااااااارب انتقم لها ولنا ممن كان او كانت السبب)
-------------
والله يالغاليات لو احكي لكم وش صار لماما الله يرحمها
والله ثم والله ثم والله رح تعرفون اني كل ماذكرتها ما اكون على الارض اصلا
اكون بعالم ثاااااااااااااااني معها بس
والله اني انسى كل شي
والله كل ماتذكرتها اصيح لين احس عيوني تنفخت
واني الحين اكتب وانا والله ما اشوف الكيبورد زين
هذي القصه اللي صارت ..
ماما يالغاليات كانت انسانه ناجحه في الحياة جدا كانت من المعلمات اللي تحصل دائما على لقب المعلمة الاولى على المنطقه الغربية
كانت انسانه انيييييييقه جدا لدرجه انها تصمم ازيائها بنفسها
تحب تكون متميزه
كانت انسانه متحمله مسؤولية كبيييييرة جدا
اي شي نتمناه بالدنيا ماتقصر علينا فيه اذا كان مايغضب الله (حنا 4 بنات بس ماعندنا اخوان بس بنات وانا اكبرهم عمري 23 سنة)
لدرجه انها لها سنه متوفيه ولليوم الحريم يتكلمون عن شخصيتها ولباقتها واناقتها
ومديرة المدرسة تقولي فقدنا افضل نعمة في مدرستنا
وبعد زواجي كانت دائما تقول لزوجي
انت ولدي اللي الله ماكتب لي اجيبه
وانا اعطيتك اغلى بناتي لا تضيعها وحطها بعيونك
وقالها ابشري
وبعدها لو صارت اي مشكلة ما اقدر احلها كنت افضفض لها وكانت تقعد معنا لين تحلها
كانت هي الحياة بالنسبة لي
وبعدها حملت ببنتي شادن .. وبالشهور الاخيرة من حملي تقاعدت ماما من مهنة التعليم
وبعد تقاعدها بيوم واحد بدأت معها اعراض غريبه صارت ماتقدر تاكل زين
كل ما اكلت شي تتعب عشان تبلعه وبعدها بكم يوم صارت ماتقدر تبلع
بس تعتمد على السوائل الشربه والماء والعصيرات
وبعدها صارت تشرب ويطلع من فمها كأن احد يدفه على برا
حتى الماء ما تقدر تشربه
وصارت تدوخ علينا
وصرنا باليوم ثلاث مرات نجيب الممرضات يعطونها مغذيات عشان تقدر تعيش
وبعدها ساءت حالتها اكثر واخذناها مستشفى بجدة وسوينا لها فحوصات وطلع عندها ورم بالمريء
وحجمه 7 سم
ولابد من استئصاله
واتفقوا انهم مايعلمون ماما بالحقيقه ولايعلمونا حنا بناتها العايله كلها تعرف الا حنا
وقالوا لنا ان ماما عندها التصاقات بالمريء وصدقنا ولابد عملية عشان يفكون الالتصاقات
ونقلناها لمستشفى الجامعة بجدة بالقسم الخاص وسووا لها العمليه
من الساعة9 الصباح الى الساعة 6 المغرب
مت من التعب وانا انتظرها وقال بابا لزوجي خذ ام شادن وخواتها وودهم بيت خالتهم خلهم يرتاحون لين تخلص امهم من العمليه ونتصل عليكم
رفضت وزعلت وقعدت بالممر اللي عند العمليات وقلت لهم ماني متحركه لين تطلع ماما
وبالقوة اقنعوني ورحنا
ويوم جت الساعة 6 المغرب اتصلوا علي وقالولي انها طلعت وانها بخير والعملية نجحت
ونروح بسرعه وادخل غرفتها والسرير فاااااااااااضي
صرت اصيح وينها
قالوا بالعناية المركزه لابد تقعد 48 ساعة وعقب تطلع
رحت للدكتور قلت له بشوفها قال ممنوع
قلت والله لو ماخليتني اشوفها ابخليكم تكرهون شي اسمه مستشفى وبجلس عند باب العناية ولاني متحركه 48 ساعة قاااعده وبنام عند الباب
قال الدكتور لا خلاص خلاص
ادخلي انتي وخواتك بس بدون انفعال وبدون كلام
ياااااااااااااااااربي يااااااااااااربي
دخلت واشوف من بعيد ماما كأنها جثه وربي شكلها يقطع القلب
ماتتحرك ولاشي
وكلهاااااااااا اجهزة واسلاك مدخلينهاببطنها وظهرها
ويطلع منها دم
ودخلت وانا رجليني ترجف ماتوقعت اشوفها بمنظر مثل ذا
وقربت منها قلت لها ماما الحمدلله على السلامه ياقلبي
قالت لي بصوووووووووت ضعييييييييييييييف جدا بالقوة اسمعها
تقولي ياااااااااااااادكتووووووو ووووو ر يعووووووووووورني يعووووووووووورني اعطيني دوا
قلت لها ماما انا مين؟
قالت انت الدكتور ابي ابرة ابي دوا تعباااااااااانه
ااااااااااااااااه ياقلبي
تحطططططمت ولاقدرت اقول شي
بس جيت اترجى الدكتور يعطيها ابره
قال ما اقدر
حاولت رفض
وبعدها طلعنا من عندها وراحوا عايلتنا
وراحوا خواتي مع خالتي لبيتها لانها بجدة
وانا جلست بجناح ماما قلت ماني متحركه
وزوجي جلس معي ونام هو وانا عيا يجيني نوم
ماما اعرفها زين بالليل ماتحب تنام على مخده وحده تجيها شرقه وتصحى مخنوقه
لازم مخدتين
وانا يوم شفتها كانت شفايفها نااااااااااااشفه
وانتظرت زوجي لين نام وطلعت ورحت لباب العناية المركزة
ووقفت ورى الزجاج ساعة ونص لين اخر شي جاني الدكتور قالي روحي نامي وريحي نفسك قلت مابي ابي ادخل لماما
قال مافي زيارة
قلت الله يجعلك من اهل الفردوس الاعلى خلني ثواني اشوفها والله ما اتكلم واطلع
قال وش تبين قلت له بحط لها مخدتين وببلل شفايفها بماء واستودعها الله واطلع
قال طيب
ودخلت وسويت اللي ابيه وهي ماتدري عني ابد
وطلعت ومن بكرا سويت نفس الشي بس يوم دخلت شافتني قالت لي الله يرضى عليك يابنتي من اول اقولهم لازم مخدتين ماصدقوني
انا مسكت نفسي وطلعت برا انفجرت صيااااح
وبعدها طلعوها من العناية المركزه واخذوها لجناحها وكلها اسلاك بجسمها
وحطوها بسريرها
وتركوها 10 ايام ممنوعه من الشرب والاكل بس مغذي
وبعدها جا اليوم اللي يسحبون فيه الاسلاك من جسمها
جا الدكتور قالي اذا تتحملين تشوفين اوقفي واذا ماتقدرين اطلعي
قلت والله ما اخليها لحالها معكم انا اتحمل عادي
وقالها يام فلانه الحين بنسحب الاسلاك بتحسين بالم خفيف بس معليش
قالت له حط لي بنج قال ممنوع لازم بدون اي مخدر
تخيلوا 10 سم داخل جسمها من كل سلك و40 سم خارج جسمها
ويجي الدكتور ويمسك السلك اللي داخل معدتها ويسحبه قدام عيوني وماما تصرررررخ واخر شي اغمى عليها من الالم
وطلع وقالي اليوم واحد وبكرا واحد وكل يوم لين ينتهي العدد (الاسلاك عددها 6) ااااااااه ياقلبي عليها
وبعدها بساعة فاقت وقالت لي والله يعوووور
قلت معليش ياماما معليش تحملي
وانا قلبي يتقطع عليها الف مره باليوم
وكل يوم يسوون فيها نفس الشي وكل يوم يغمى عليها لين انتهى العدد
وانا كل يوم اعاني الالام الطلق لاني كنت بالشهر الاخير واذا نامت بالليل
انزل الطوارى اخذ ابرة مهدئه للالم واطلع لها
واخر شي صرحوا لها تطلع من المستشفى وكان يوم 4 من شهر محرم
وكان بيت اهلي في تجديدات وبويه وريحة ماتقدر تتحملها جروحها والعملية
واخذت اهلي على الشقه عندي وحطيتهم بالشقه ورحت مع زوجي اجيب مقاضي للبيت وكانت الساعة 3 الليل ورجعت الشقه وصلحت المقاضي كلها ورحت بنام وصحيت على الساعة6 الصباح يوم 5 من شهر محرم وجيت عند ماما واضحك واسولف معها وبدأت تجيني الالام كل شوي تزيد
وانا كنت مسؤوله عن جروحها انظفها لها
وجيت انظف جروحها وبدأت الالام تزييييييد وصرت ابتسم لها بالقوة واطلع من الغرفة اقولها بجيب ماء وانا اكذب
اطلع برا الغرفة اتلوى من الالم واذا خف ادخل اكمل تنظيف الجروح
وناظرت فيني ماما قالت والله اعرفك زين انتي في شي يوجعك وماتبيني اعرف
قلت مافي شي صدقيني
ويوم خلصت تنظيف لجروحها رفعت يدينها للسماء وقالت يارب ترضى عليها وتسهل عليها ولادتها ولاتحس بشي
والله الذي لا اله الا هو
يوم صارت الساعة 3العصر اشتد الالم وقلت لها ماما استاذنك انا بروح اتمشى على البحر مع زوجي قالت طيب
واروح المستشفى واول ماوصلت عندهم بدقيقتين ولدت على طول ويعلم الله اني ما ادري شلون ولدت ماحسيت بشي ماشاء الله
حسيت كني بحلم
وتذكرت دعوتها وطاحت دموعي غصب
في كل شي كانت هي خير لي
وبعدها طلعوني غرفتي واتصلت اكلم ماما وقلت لها ابشرك جاتك حفيده
تبيني اسميها عليكي ؟
قالت لا
سميها اللي انتي تختارينه
قلت طيب وسميتها شادن وصااارت شادن اغلى شي بحياة ماما
وبنفس اليوم كلمت المستشفى وقلت لهم ابي اطلع اروح البيت قالوا لي لازم 24 ساعة قلت مايخصني انا بروح لماما طلعوني
قالوا تطلعين على مسؤوليتك قلت عاادي
واتصلت على ماما وقلت لها شوفي انا بطلع عشانك وبجيب لك حفيدتك الاولى
لازم تشوفينها ماني مخليتك تنامين وانتي ماشفتيها
وجيتها وفرحت فيها
وبعدها رحنا لبيت اهلي وجلست الاربعين عندهم وماما كانت على سرير طول الوقت
وانا بالاربعين زوجي قالي اللي مع امك تراه سرطاااااان بس خوالك وابوك ماحبوا يعلمونكم عشان لاتتضايقون
ويومها صححححححت وصحححححت وصحححححت لين خلصت دموعي
وقلت يعني ماما مارح تعيش انا ما اقدر بدونها
هذي كل شي عندي ما اقدر
وبعدها المستشفى عطونا اوراق انا وخواتي اعذار عشان دراستنا تغيبنا عنها ومكتوب لمرافقتهم مع والدتهم التي تعاني من السرطان
وطاحت ورقة اختي بيد ماما وشافتها وتعبت نفسيتها فترة
المهم عقب العملية صارت ماما كل يوم ينقص وزنها زياده
وبالنسبة لشادن
كانت ماما تحبهااااااااا بجنووووووووووون لدرجه قالت لي انا وزوجي هذي البنت اوصيكم عليها وصيه لو احد يزعلها سواء انا حيه او انا تحت التراب والله لا اغضب عليكم دنيا واخره
وكانت متعلقه فيها بشكل مو طبيعي الى درجه بنتي تحبها اكثر مني
ودايم تدورها
وبعدها بسنة وشهرين حملت انا ببنتي الثانية
وكانت ماما حالتها كل يوم تسوء اكثر وكنا كل فتره لازم ندخلها المستشفى وتعذبت لين قالت امين
ويوم انا كنت حامل ببنتي الثانية بنهاية الشهر الثامن بدأت ماما تتعب كثير
لدرجه والله العظيم اننا نتحاشى نمر من جنبها نخاف نصتدم فيها بالغلط وينكسر فيها شي
وصل وزنها والله العظيم الى 32 كيلو تخيلووووووووا هيكل عظمي قدامي
اجلس معها وامسك الدمعه واذا طلعت انفجرت
وبـ ليلة 27 رمضان سااااااااااءت حالة ماما الصحية على الاخر
وصارت ماتاكل كل الاكل والشرب يطلع من فمها
والمفاجئة انها ماهي قادره تمشي ويوم اخذنا لها فحوص طلع السرطان انتشر في جميع اجزاء جسمها ونخر لها العظم وانكسر الحوض عندها
وحطيناها على سرير مثل المستشفيات برموت كنترول
وجبنا لها كرسي متحرك عشان اذا بغت تغير جو عن السرير
طبعا هذا كله بالبيت
لان المستشفى قالوا لنا خلاص مافي علاج
وصرت اترك شقتي اللي تحتهم وانام عندها
ويوم صحينا الصبح قلت لها صباح الخير يا ماما اجر وعافيه ان شاء الله
قالت لي من انتي ؟؟؟؟؟؟
يوووووووووووووووه بغيت انجن
قلت لها بنتك !!!
قالت انا قلت لبناتي يجهزون القهوة حياكم الله تفضلوا اقعدوا الحين بناتي يجيبون لكم القهوة
تكلمني انا وخواتي على اساس اننا ضيوف
في يوم وليلة ماا صارت تعرفنا
وجلسنا ودموعنا تطيح وتقول هذا هم بناتي جابوا لكم القهوة تفضلوا
مافي احد جا يتهيأ لها
ترى ماما ماهي كبيرة بالسن بس المرض خلاها تفقد كل شي
وصارت تناديني كل يوم باسم جديد
وصرت اروشها وهي بمكانها بالقطن والصابون والبسها وهي بمكانها
حتى الله يعزكم الحمام ماتقدر تروح
صرت البسها البامبرز ويااااااااااااااااااالله كانت تعاني اذا جيت اغير لها ملابسها او اي شي لانها ماتقدر تتحرك من كسر الحوض وتجلس تصرررخ وتصيح لين نخلص من لبسها
وكل يوم كنت اروح مع السواق اجيب الممرضات من المستوصف اللي جنبنا عشان يساعدوني
وكل العايلة صارت يوميا عندنا بالبيت
وبعدها من كثر السدحه على السرير بدأ يصير عندها تقرحات اسفل الظهر
وكل يوم تزيد وتكبر
وتعااااني منها معاناه
لدرجه يوم 29 رمضان شلتها انا واختي وحطيتها على الكرسي المتحرك وقلت لها ياماما شوفي هذا فطور رمضان وهذا التوت اللي تحبينه وعطيتها
واخذت التوت وصبته بداخل البامبرز اااااااااااااه بس ااااااااااه
قلت لها ليش؟ قالت مدري وتصيح
وبعدها اخذت مناديل وحطتها بداخل البامبرز اللي هي لابسته
وصرت اتجنب اسالها لانها تتصرف وبعدين تنحرج وتصيح
وصارت ماتقدر تمسك ولاشي بيدها كل شي يطيح
وجوالها اذا احد بيكلمها تمسكه تقول الو ويطيح وتغيب عن الوعي وترجع بعد دقايق
ويوم 1 شوال اول ايام العيد
نقلناها لمستشفى الجامعه بجدة لنفس جناحها
وبدات كل يوم تتعب اكثر
بدا الجرح اللي اسفل ظهرها يكبررررر وصار مفتوح مقدار 10 سم ومجوف من الداخل اكثر من 8 سم والله العظيم العظم اللي باخر العمود الفقري اكثر من فقرة شفتها بأم عيني والدم اشوفه قدامي يااااااااااااااربي وش كثر تعبت
وبعدها صارت ماتطلع الفضلات من جسمها وقالي الدكتور ان الكلية والكبد توقفت عن العمل !!!!!!
وبعدها جاني الدكتور وقالي بسبب الجرح اللي اخر ظهرها صار عندها تسممم بالدم !!!!!
وبعدها صارت معد تعرف احد وقالي الدكتور ان السرطان وصل لخلايا المخ وبدأ يأثر على الذاكره
وصارت خلاااص ماتاكل ولا شي بس مغذي وخلاص
وبعدها بدأ جسمها يتنفخ مرررره بالذات اليدين والرجلين بسبب احتباس الفضلات داخل الجسم لان الكلية توقفت عن العمل
وبعدها جبت لها شادن بنتي ومسكتها لها وقربتها منها وسلمت عليها
وابتسسسسمت ماما
من زمااااااان ماابتسمت
وقالت شدونه حبيبتي انتي
يووووووووووووه عرفت بنتي
قلت لها وانا قالت انتي الغالية بنتي البكر
الله يسعدك ويوفقك ويقومك بالسلامه وتولدين على خير
وهي متعوده تعطيني بالولادة هديه
قالت لي خذي بطاقة الصراف وانزلي اسحبي 4 الالاف قلت ليش
قالت هذي هديتي لحفيدتي الجديدة
قلت ولايهمك اذا ولدت انتي تعطينها
ابتسمت وقالت معليش انا مارح يمديني اشوفها خذي هديتها عشان ما اروح وانا ما اعطيتها
ضااااااااااااقت فيني الدنيا وسكت قدامها
ومسكتني وحضنتني وقالت لي الله يرضى عليكي دنيا واخره
وقالت لزوجي الله يرضى عليك وهذي بنتي امانه عندك
وبعدها مسكت خواتي كلهم وعرفتهم وحده وحده وحضنتهم وقالت لهم الله يرضى عليكم
وقالت لي خذي لخواتك من فلوسي كل وحده الفين ريال وخليهم يشترون اللي يبون
وعطيت خواتي الالفين
وبعدها نمنا وصحينا وماما ماصحت
وجيت اصحيها ولا صحت وحاولت وحاولت ولاترد علي
ورحت اركض للدكاتره واصرخ اقولهم ماما ماما وجوا كلهم وقالوا لي لا عادي عشان عطيناها منوم ماتصحى الحين
ويومها خالاتي كلهم جوا عندنا بالمستشفى وخوالي وبابا
والكل
وبعدها الدكتور قال يا ام شادن ابغاكي شوي
وجيت عنده وقالي شوفي امك قالت لي
اي شي تبيه اسال بنتي الكبيرة وهي المسؤولة عني
وامك بصراحه دخلت غيبوووووووووووووبه
والاعمار بيد الله لكن طبيا امك قدامها 24 ساعة وتغادر الحياة
ياااااااااااربي وين ارووووووح
قلت له وش تبي
قال هذي الورقه ابيكي توقعين عليها بحكم انك المسؤوله
قلت وش فيها ما شوف شي من الدموع
قالي امك جسمها جدا ضعيف ولايحتمل شي
وابغاكي توقعين اذا امك توقف قلبها تبين نسوي لها صدمات كهربائية وضغط باليد
ولا نتركها تغادر بسلام
ااااااااااااااااااااااااا ااااا ااااااااااااااااااه يااااااااااااااربي ااااااااااااااااااه
اوقع على موت ماما
اااااااااااااااااااه من الدنيا ااااااااااااه بس
وقلت له انت وش تشوف
قال الصدمات والضغط باليد بيكسر لها ضلوع صدرها كلها ومارح تستفيد شي
قلت امري لللللللللله
ووقعت على تغاااادر بسلام
وقمت وانا رجولي ماتشيلني من الهم ورحت انتظار النساء وصحت وصحت ودعيت ربي يقومها من الغيبوبه
ورجعت الغرفة اللي فيها كل العايلة وشافوني قالوا لي
تعبانه حاسه بولاده
قلت لا اللي فيني اكبر من كذا
قالوا وشوا قلتلهم صرفوا اختي الصغيره توها بالابتدائي
وبعد ما طلعت اختي قلت لهم كل شي
خواتي صاااحوا لين خلصت دموعهم والعايله كلهم يتماسكون قدامنا ويحاولون يصبرونا
وبعدها صاروا الممرضات يجون يغيرون لماما ملابسها ويقلبونها يمين ويسار وهي مثل الجثه ماااااااااااتدري عن شي
وبعد الغيبوبة بثلاث ايام
جا الدكتور وقال ترى الحالة اصبحت سيئة والافضل تكونون بجنبها والله يصبركم
وانا لازم احط لها جهاز القلب واحط لها اوكسجين
وصرت جالسه جنبها ويدي بيدها ويدي الثانيه على راسها واقولها باذنها ماما ادري انك بغيبوبه بس انا متاكده انك تسمعيني
ماما حنا نبيكي حنا نحتاجك
والله نحبك والله نحبك والله
طلبتك اللي تبين اسويه احب رجولك بس قومي كلميني
طيب حنا والله اشتقنا لك
انتي ما اشتقتي لنا ؟؟
بعدها شهقت على طول شهقه ورجعت لحالها
كلهم قالوا لي وش قلتي لها قلت لهم اللي قلته
قال الدكتور ترى هي تسمعك
وشهقتها دليل رد على كلامك انها حتى هي مشتاااقه لكم
وبعدها بدا النبض بجهاز القلب يضعف ويضعف
وبدا الاوكسجين يقل ويقل
وصرت اقولها باذنها ماما قولي اشهد ان لا اله الا الله وان محمدا رسول الله
واعيدها عليها لين طلعت روحها على يدي وانفجرررررررررت يومها انفجرررررررررت
فقدت عمري كله معها
فقدت الدنيا ومافيها
وبعدها تماسكت وجلست عندها وجو الممرضات وحطو لها برجلها ورقه وعليها رقمها
ودخلوها بكيس
وكل هذا وانا اشوف
وبعدها جات سيارة الموتى وشالوها ورحت انا وراها مع زوجي
ووصلنا المغسله وشفتها قبل الغسيل شفتها وهي على الحديد يبون يغسلونها
وبعد الغسيل جلست معها وحضنتها وسلمت عليها وعلى رجولها
وقلت لها ماما روحي الله معك ودعتك الله اشوفك بالجنة ان شاء الله
وحفيدك (ولدي اول مولود لي توفى) موجود هناك انتي جدته انتبهي له واستودعتك الله انتي وولدي
وسبحان الله كان ابهامها اليمين مرفوع وعلى وجهها ابتسامه عريضضضضه الكل شافها
وشالوها للدفن
وبعد العزا بـ 13 يوم ولدت ورحت لحالي بدون ام
وانا بغرفة الولادة اتصلت على خالتي اللي هي مقام ماما قلت لها انا متعوده اسمع صوت ماما واسمع دعواتها لي
انتي مكانها ابي دعواتك ودعت لي وصاحت لين تعبت
وولدت وكانت مثل مادعت لي ماما قبل الغيبوبه
ولادة ماحسيت فيها بشي سهله وميسره من ربي
وبعدها رحت بيتي وقضيت الاربعين بلا ام اسوي كل شي بنفسي وادبر نفسي
وهذي قصة وفاتها كامله
يمكن دخل الكلام على بعض وماهو مرتب
بس اعتبروها فضفضه
مشتااااااااااااااقه لماما ولاادري اقول لمين ولا ادري اكلم من
سامحوني
