( لغز ٍ وعاجز شاعرك لا يحله )

مدخل :
يازين من بعدك ترا خاطري ضاق
حتى قصيدي فيك . ما سر حالي
صارت حياتي بين حبري والاوراق
حالي ومتغير . ولا هوب بحالي

ماجد بشيت العازمي

السلام عليكم ورحمه الله وبركاته

ياصاحبي والكلمة اللي كما الموس
كلمة . وريقي منو اللي يبله
..
صحيح اعاني منك والوجه معبوس
والدمع عيب ٍ من عيوني اهله
..
قلبي . وحبك داخله حايسه حوس
والخوف من سيف الجفا لاتسله
..
مشاعرك وياي . حط بينها قوس :
( لغز ٍ وعاجز شاعرك لا يحله )
..
يوم المحبه دربها صار ب فلوس
صاحبك . لا يمكن يغير محله
..
عزيز نفس وكارهه ضعاف النفوس
ودربي تعرفه زين . وادري تدله
..
بصبر على الاقدار لو كنت منحوس
كرامتي .. ماتعترف بـ المذله
..
ياصاحبي لو تعطي الدنيا دروس
راسي ترا ما ينحني غير لله
..

ماجد بشيت العازمي

مخرج:
شفني بعينك مالي علاج مغموت
والضيق شوفه . واضح ٍ في بيوتي
شفني اتحرى ساعة ٍ يأتي الموت
والذنب ف رقبتك . اذا شفت موتي

ماجد بشيت العازمي