يغنيك عن بعض الحكي غمزة العين//ويغنيك عن بعض المتاعب سكوتك
[poem=font="Simplified Arabic,6,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
يا صاحبي يلي على العسر واللين = يا صاحبٍ ما كل جزله تفوتك
الوقت شان وشينوه العدوين = اللي تحسدك صفو فكرك وقوتك
لا شك بالعربان ناسٍ مريضين = تدفن جررها وسط صحرا ثبوتك
اكبر مهادفها تجرك على الشين = تفرح بزلاتك وتهنا بموتك
لو ودها ياخوك والامر تمكين = ما تستمع صوتك وتقرا بيوتك
الحقد موت وتالي الحقد نارين = نار القهر يوم السعد ما يفوتك
والثانيه لا شك نار الخسيرين = خسران نفسه يوم تكسب بشوتك
تكسب من الامداح زينٍ على زين = ويعرف بك القاصي ويطرب لصوتك
يا صاحبي اسمع كلام القريبين = لا تقرب الكِبْره يطوّل سبوتك
واخذ النصيحه دام حنّا نصيحين = زرعك خضر يا خوك جمّل نبوتك
يغنيك عن بعض الحكي غمزة العين = ويغنيك عن بعض المتاعب سكوتك
ويغنيك فعلك لا لفت ساعة الدين = ويغنيك عن بعض الفعايل ثبوتك
لا شك هذي هرجة العسر واللين = يا صاحبٍ ما كل جزله تفوتك
[/poem]
