رسالة من مواطن الى المجتمع
بسم الله الرحمن الرحيم
انا مواطن سعودي انا طالب جامعي لكن بقول رسالة للمجتمع السعودي ادري ان البعض مب ماخذ مني لاني اعتبر شاب في مقتبل العمر لكن هذا الكلام فضفضة من قلبي واعذروني عن الاخطاء لاني اول مرة اكتب موضوع زي كذا انا بكتب عن بعض العقليات اللي عندنا لذا ساطرق لمواضيع كثيرة مختلفة عن بعض وغير مترابطة في هذا الموضوع وبرتبها على شكل نقاط:
1- مقولة ( الغرب ما درو عنا ): هذا الكلام تقريبا اسمعه من اغلب الناس لكن هذه العبارة غير صحيحة اطلاقا الغرب دائما ما يعرض هيبته الا على الدول المسلمة عشان يبثون الرعب في شعوب المسلمين عشانهم خايفين من اليوم اللي يصحى فيه المسلمين ويبدا يدافع عن حقه كلنا شفنا مقطع لا تنسوا 1907 وسمعتو اللي صار في الاجتماع عام 1907 بين 7 دول بينها بريطانيا ( رابط المقطع لا تنسوا 1907 ! - YouTube ) شفتوا المقطع وشفتوا كيف خوفهم منا واثبت ان الغرب داري عنا عن كل صغيرة وكبيرة لان زي ما سمعتوا خايفين من اليوم اللي يصحى فيه المسلمين
2- الهمجية: يعني هذا الشي اللي يضايقني من بعض الناس يكسر يخرب كانه بزر صغير وانا صراحة ما ادري ليش يسوي كذا كلنا شفنا الاحداث اللي صارت في مباراة الهلال والشعلة وشفنا كيف التكسير والتخريب يعني بصراحة قعدت افكر وش هالعقلية هاذي معليش يعني تراك كبير ياخي عيب عليك تسوي كذا وش خليت للبزران والمشكلة انهم يعتبرونها رجولة وين الرجولة معه هاذي مبزرة ما بعدها مبزرة انتم تشوفون المباريات الاوربية عدد الشرطة قليل والملعب مفتوح بدون سور ومع ذلك ما يطبون للملعب وشوله نروح بعيد شوفو ملعب الجزيرة الاماراتي بدون سور ومع ذلك ما يطبون طبعا الهمجية مو بس في الملاعب لا المشكلة في كل مكان في المدارس في الاعياد في اليوم الوطني عاد اليوم الوطني حكاية ثانية لكن بكتفي بهذا القدر من الكلام عن الهمجية لكن بختم بسؤال ليش هاذي الهمجية عند بعض الناس؟ اتمنى احد يجاوبني
3- ثقافة المجتمع: صراحة اغلب الشعب ما يدري وين الله حاطه يعني مثلا تساله عن الاخبار اللي صايره في العالم ما يدري عنها شي تساله عن ايران وخطر ايران والتهديدات ما يعرف عنها شي تساله عن مظاهرة الرافضة في العوامية ما يدري عنها هاذي النوعية بصراحة اشوفها بكثرة كثير ما اقابل ناس واحس اني المثقف بينهم لكن بعضهم ما شاء الله يعني اذا جلست معه تستحقر عمرك وانا دايم اسال نفسي ليش الثقافة عند بعض الناس ضحله؟ اتمنى احد يجاوبني
4- التعصب القبلي: يعني هذا الشي عليه الف علامة استفهام المشكلة هاذي في اغلب الناس حتى في الزواج يهتمون انه قبيلي اول عشان يزوجونه بعدين يسالون عن الدين وبعضهم ما يسال عن الدين ابد عن ان الرسول اللهم صلي وسلم عليه قال " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير "ما قال ونسبه قال الدين والخلق فقط ومع ذلك يسال النسب ويهتم فيه اكثر من الدين والخلق والمشكلة في الزواج وبس في كل الامور مثلا في البعض القليل واحد قبيلي صادق له واحد خضيري وتكون علاقتهم ممتازة لكن اول ما يدري القبيلي انه اللي صادقه خضيري على طول يتركه وينسى انه صادقه في يوم من الايام فليش هذا التعصب كله؟ اتمنى احد يجاوبني
هاذي اربع مشاكل اعاني منها وشفتها طبعا في مشاكل اكثر من هاذي لكن هاذي اللي شفتها في المجتمع وفي النهاية اسف على الاطالة واتمنى قراءة الموضوع كامل والتعليق عليه والسلام ختام
ملحوظة/ الموضوع من كتابتي وغير منقول من أي منتدى وتراني كتبته بعضويتي في شبكة الهلال ( ابو جون الهلالي ) وتراني كتبت الموضوع بالعامية لان من وجهة نظري ان الكتابة بالعامية قريبة من قلب الواحد
