جدول بالممنوع والمسموح بنظام دشتي +وجبات مقترحه

بسم الله الرحمن الرحيم

حبيت افيد البنات اللي بيسوون دشتي وكانوا مثلي اول احوس مادري شاكل واحيانا انسى الممنوع والمسموح فسويت هالجدول من تجمعيي الخاص ومع وجبات مقترحه من تجميعي ايضا
فما احلل اي وحده تنسخها لمنتدى ثاني من غير ذكر المصدر.
قبل اكتب البرنامج بقولكم المساوى والايجابيات من وجهة نظري الخاصة وتجربت 3 شهور:
الايجابيات:
1- ينحت الجسم بوقت قياسي وممكن بريجيم اسبوعين يتغير مقاس لبسك لو كان صاك ممكن يكون زين.
2-اول اسبوعين ممكن تنزلين من كيلوين ونص الى 3 كيلو, واول شهر من 5 الى 6 كيلو(طبعا يختلف من وحده لثانية).
3-اسرع ريجيم يضعف الفخوذ لان معروف انة الفخوذ من الدهون العصبة اللي ماتروح بسرعه.
4- الدكتور حسين دشتي ممكن تراسلينه من الموقع ويرد عليك صحيح انه بيرد على اخر سؤال بس لوووول بس بيرد يعني لاتكثرين عليه اسالة واجد بالايميل الواحد.
5- اول اسبوع بس صعب بعدين بتجبين الرجيم وبتصيرين مع الوقت تكرهين السكر والطحين.
العيوب:
1_رائحه فم كريهة جدا وماتروح يعني المتزوجة حالاتي ماتقدرين تسوينة ولا الرجال بينحاش لووووول.
2- امساك, ودشتي يقول كثري يزت زيتون على السلطه او كلي من 10 الى 15 زيتونه عالريق وكثري ماي واحتمال يروح.
3- اول الايام يسبب صداع وهذا دليل انك ماشية صح بعدين يروح
4- انا شخصيا سبب لي النقرس بعد فتره من الريجيم يعني بعد 3 شهور ويروح مجرد ما اترك الريجيم وسبب لي هبوط بسكر واستمر معاي كم شهر.
-انتي فكري وشوفي يناسبك ولا لا-

حمية حسين دشتي

المرحلة الاولى من اسبوعين الى شهر (هي بس اللي بتكلم عنها)
ملاحظات قبل البدء بالنظام:
1_ لا تقولين لاي احد انك تتبعين دشتي (لانة نظام صعب شوي وبتتوهقين بالناس الكل بيسالك شلون وش تاكلين وش ماتاكلين وبعد ماتتعبين نفسك بالشرح بتقولك يوة صعب انتي شلون تتحملين وعندك اردة ؛؛انا كنت كذا لمن طقوني عين وصرت ماقدر امشي من اول يوم اسوية وكله من الحنه فماله داعي تشرحين للناس عن ريجيمك)
2_ دوريك بنطلون صاك عليك مرة ويدخلك بس ضيق وخلية مقياس لك كل اسبوع تقيسينة لان الميزان مو مقياس بدشتي لانة يحرق الدهون اكثر شي.

الممنوع

السكر واي شي يدخل فية السكر

التمر والشوكولاتة والكيك
أي شي يدخل فية النشويات
الذرة
الحليب ومشتقاتة ماعدا الاجبان قليلة الدسم فهي مسموحة
البطاطس والرز طبعا
أي شي يدخلة الطحين ومن ضمنة طبعا الخبز
الكاتشب والسمسم والزعتر
الفواكة
الجزر
الصلصات الجاهزة
أي شي مكتوب على علبتة من برى سكر او كربوهيدرات اكثر من 3
لا تغلطين غلطتي وتاكين سلطة الملوفوف حقت كنتاكي لان فيها سكر وجزر
القرع
البقوليات بكل انواعها
أي شي مكتوب علية قليل الدسم ممنوع (هالفقرة توسع الصدر) لان كربوهيدراتة تصير عالية وانتي مو سموح لك الى من 20 الى 30 باليوم وتروح بالسلطة,
العصيرات الفرش والمعلبة
*لوجاتك دوخة اول يومين مسموح لك بتمرة وحدة
اول ثلاث ايام ماانصحك بالمشي لان ممكن تجيك دوخة وصداع شديد وهذا طبيعي مشي باليوم الرابع يتكونين تعودتي استحملي الصداع لان الموضوع يستحق باليوم الرابع بيمون الامر طبيعي وعادي لان الحرق يبدا من 24 الى 36 ساعة

المسموح

البيض
كريما الخفق اللي للطبخ مو للحلويات (جربي تحطينها مع النسكافية والكوفي ميت حطي ملعقة صغرة رائع) ويسد النفس الصبح.
الزيت والزبدة وزيت الزيتون
الكوفي المسموح اللي من غير كافيين
الشاي
المقليات من غير البقسماط يعني لو وجبة كنتاكي عادي بس تقشرين اللي فوق
البروستد
المشويات
الخضراوت حتى لو مقلية( المحدد فقط طماطة باليوم وخيارة بس وربع ليمونة)
من 10 الى 15 حبة زيتون باليوم
المايونيز (ويفضل قودي الايت اللي غطاة ازرق لانة من غير سكر)
الكوفي ميت كامل الدسم مو قليل الدسم لان الكربوهيدات قليلة فية
اللحوم بشكل عام
المشروم
المشروبات الغازية مسموحة 2 باليوم وافضلها السبرايت لان الكربوهيدات فية صغر
مسموح لك ملعقة بنت بتر باليوم تلحسينها لان الخبز ممنوع طبعا
مسموح لك اللحوم مقلية او محموسة او بالفرن او مسلوق
الاجبان مسموحه

بريجيم دشتي اذا خربتي وكليتي شي غلط مو بس ماراح تحرقين باليوم هذا لا انتي بتقعدين يومين قدام تسوين الحمية وماتحرقين الى بالثالث يعني بعد 36سااعة زي ماقلتلك, وهذا شي مايخليك تخربين لانك لوخربتي بتعيدينة من اول
الملوخية مسموح والمرق والباميا والحمسات بعد بس اهم شي مايصير فيها جزر او ممنوعات وممكن تاخذين من اكل بيتكم أي شي الحمسة او الدجاج اللي فوق الرز وتاكينة لحالة مع سلطة طبعا بتستهلكين كمية اكبر لانك تاكينة من غير نشويات بس عادي هو يقول كلي لمن تشبعين
اللي مش مكتوب الكمية معناتة بكمية مفتوحة

مقترحات الوجبات:

الفطور
الكوفي اليومي اللذيذ اللي يسد الهشية (ملعقة نسكافية من غير كافيين +سكر ريجيم+ملعقة كوفي ميت+ملعقة كريما الخفق+ماي حار) يطلع يجنن.
بيضتين مسلوقة مع خيارة وطماطة
بيضتين مسلوقة مع شريحتين جبن سلايس
هوت دوق مع طماط وخيار او مع بيض مخلوط بالجبن
بيض عيون
اومليت بالجبن والزيتون
سلطة تونة
سلطة جبن
خس مع جبن مالح وخيار وطماط
______________________
الغداء:
فيلية بالفرن مع سلطة
سلطة تونة
سلطة يونانية
سلطة وفوقها اصابع داجاج او لحم
همبرجر مقلي وفوقة جبن شرايح مع سلطة
مرقة دجاج من طبخ البيت
ملوخية
مرق باميا
خضار مسلوقة بروكلي وفاصوليا على طريقة تشليز مع سلطة يونانية
دجاج اوسمك
صدور دجاج محموسة مع الكريما والكاري
صينية شرايح باذنجان مقلي وقوفها لحم مفروم وفوقها كريما الخفق بالفرن _ لذيذة جدا
(أي طبخة من ابتكارك الخاص ضمن الاشياء المسموحة وخصوصا ان الكريما مع الجبن السائل ممكن تبدعين فيها بيطلع لذيذ) .
يعني لو طلعتوا مجمع ممكن تطلبين صحن كباب او شيش طاووق مع سلطة وهارديز عندهم وجبه بس مو محطوطة بالمنيو طلبيها منهم همبرجر بالجبن وبدال الخبر خس بس ترى يحطون كاتشب قوليلهم مايحوطونه لانة ممنوع.
بتلاحظين انك بدال ماتكلين صدر دجاجه اول بتصيرين تاكلين اثنين وهذا عادي لانك اول تاكلين مع الدجاج خبز او ببطاطس او رز والحين تاكلينها مع سلطة بس ودشتي عشان كذا مايحد بكمية.
وسلامتكم
مابي منكم الا تقولون اللي يرزقها بالجسم الرشيق بس:eh_s(22):
:eh_s(17):شوكلاتة سويسرية:eh_s(17):